6
Naꞌi Maromak naseꞌi lia diꞌak bodik ita
Tan ami serwisu hamutuk ho Naꞌi Maromak, ami hakara foo lia tateꞌan baa emi nuneꞌe: Naꞌi Maromak natudu laran diꞌak waꞌin baa emi. Dadi emi keta simu butan dei. Hakerek Moon naꞌak,
“Kona baa niakaan oras, Haꞌu kanono o.
Oras Haꞌu ksori ema, Haꞌu moos tulun o.”
Hanoin diꞌa-diꞌak, tan oras neꞌe kona baa Naꞌi Maromak loron atu sori ema.
Tan lia nia, ami hakara daka aan nebee moris loos. Ami la hoꞌuk saseni ema mak mai buka Naꞌi Maromak dalan moris. Ami dale lia mak loos, nebee ema seluk keta nadois amikaan naran. Ami halo lia hotu-hotu nunia atu hatudu haꞌak, ami neꞌe, Naꞌi Maromak ain-liman mak diꞌak. Masik ami hetan susar ka, ami moris iha tokar lauk klaran ka, ami haterus aan halaꞌok Niakaan serwisu bei-beik. Nunia moos, oras ami kona taꞌe, oras ema natama ami baa bui, oras ema tokar lauk ami, oras ami serwisu susi ruin, oras ami la bele toba, no oras ami horan salaen. Ami neꞌe, Naꞌi Maromak ain-liman mak serwisu hodi neon loos. Ami hatene tebe-tebes Nia. Ami hetu aan. Ami halo lia diꞌak bodik ema. Ami foo leet baa Kmalar Lulik babilan ami. Ami la oin-kotuk hadomi ema. Baa oras ami dale, ami dale lia loos, lahoos lia bosok. Ami simu hola beran hosi Naꞌi Maromak atu hodi halo lia diꞌak. Hodi nunia, ami hoo roꞌat-meik nosi Naꞌi Maromak atu hodi sakar funu no daka moris. Masik ema nakneter ami ka, nadois ami ka, ami haterus nohuun. Masik ema dale nahonu ami ka, daka amikaan naran diꞌak ka, ami haterus nohuun. Masik ema dale naꞌak, ami dale beꞌur ema ka; ema dale naꞌak, ami dale lia loos ka, ami haterus nohuun. Noo ema mak la natene ami. Mais noo waꞌin mak natene amikaan naran. Dala waꞌin ami kreꞌis mate, mais ami sei moris hafati. Dala waꞌin ema tonan ami, mais ami sei la mate. 10 Masik ami horan todan moos, ami neon boot nohuun. Masik ami la hoo osan moos, ami hasoi ema waꞌin neon. Nuꞌu ami neꞌe la hoo sa-saa, mais tuir loos, ami hoo hotu sa-saa.
11 Ami dale malorek baa emi iha kota Korintus, tan ami hadomi emi tebe-tebes. 12 Ami la hatoos amikaan dadomin baa emi. Mais emi mak hatoos emikaan dadomin baa ami. 13 Tan baa nia, haꞌu kfoo lia tateꞌan baa emi, nuꞌu emi haꞌukaan oan sia nuneꞌe: keta hanawa hadomi ami.
Keta talin malu ho ema mak la fiar Kristus
14 Keta talin malu ho ema mak la fiar baa Yesus Kristus, tan ita lahoos nuꞌu sia. Ita, ema makfiar mak moris loos. La fatan ita hamutuk ho ema mak sakar Naꞌi Maromak. Keta toꞌo sia koko ita atu serwisu hamutuk. Ema laran diꞌak no ema laran aat la bele soman malu. Kroman la bele kahur no makukun. 15 Kristus no diabu ulun bele neon ida ka?* La bele! Ema mak la fiar baa Naꞌi Maromak bele simu fafaꞌek manesak no ema mak fiar ka? La bele!
16 Nunabee? Arumak emi haneo haꞌak, emi bele tama uluk baa Naꞌi Maromak Niakaan uma hamulak hodi loꞌu-sudur baa Nia, foin sai atu loꞌu-sudur baa aiꞌoi lulik ka? Hahalok nia la fatan! Tan Naꞌi Maromak, Maromak mak moris. Nia, itakaan Naꞌin. Ita, nuꞌu Niakaan uma hamulak, tan Nia nein iha itakaan neon laran. Hakerek Moon naꞌak,
“Haꞌukaan uma iha Haꞌukaan ema sia klaran.
Haꞌu atu ktama-sai iha siakaan klaran.
Haꞌu kdadi baa siakaan Maromak.
Sia moos dadi baa Haꞌukaan ema.”
17 Naꞌi Maromak moos katak naꞌak:
“Emi musti sai hosi ema seluk klaran no haksasa hela sia.
Keta toꞌo emi dadi nuꞌu sia.
Emikaan neon musti moos.
Emi musti hakdook aan hela hotu-hotu mak nahobos neon.
Halo nunia lai, foin Haꞌu ksimu emi.
18 Halo nunia lai, foin Haꞌu kdadi baa emikaan Ama;
emi moos dadi baa Haꞌukaan oan.
Tebes!
Itakaan Naꞌin mak beran kaliuk, katak nunia.”
6:2 Yesaya 49:8 6:5 Kristus Klosan Lian 16:23 * 6:15 Hakerek Moon lia Yunani nakerek Beliar iha neꞌe. Beliar nia, sia nola nosi lia Ibrani Belial. Niakaan lia isin naꞌak, ‘lia aat,’ ‘lia mak la diꞌak,’ ‘lia mak la noo folin,’ no ‘diabu ulun’. 6:16 Ukun-badu Naꞌilulik 26:11-12; Yeskiel 37:26-27; 1 Korintus 3:16, 6:19; Efesus 2:21 6:17 Yesaya 52:11 6:18 2 Samuel 7:14; 1 Lia Rai Israꞌel no Rai Yahuda 17:13; Yesaya 43:6; Yeremia 31:9