7
Adat ema raiklaran la bele nalakon Naꞌi Maromak hakaran
(Mateus 15:1-9)
Baa loron ida, ema Farisi kabuun ida no manorik ukun Yahudi naꞌin hira, mai nosi Yerusalem atu nasoru Yesus. 2-5 Ema Farisi sia kaer metin adat nosi bei uluk Yahudi sia. Sia nalo nuneꞌe: kalo haa, musti fasi uluk liman tuir adat. Nunia moos, mai hikar hosi faꞌan fatik iha nabee dei, musti hariis kedan tuir adat. Toꞌo bahoꞌak uma laran, nuꞌu bikan-mako, musti fasi lai tuir adat, foin bele hodi haa.
Kalo ema Yahudi seluk la tuir adat nia, ema Farisi sia nawan saꞌe.
Tan baa nia, oras ema Farisi sia naree Yesus Niakaan maktuir sia naa la fasi uluk liman tuir siakaan adat nia, sia nawan saꞌe. Hotu, sia mai nasalak Yesus naꞌak, “Tan saa okaan maktuir sia la fasi uluk liman lai tuir itakaan adat, foin naa? Sia nakur tiꞌan itakaan adat nosi bei uluk sia!”
6-7 Mais Yesus nataa naꞌak, “Emi neꞌe, liu resik tiꞌan! Emi katak seluk, halo seluk! Hori uluk, Maromak naruka makoꞌan Yesaya nakerek nela kedan naꞌak,
‘Ema nia sia tonun Haꞌu nodi ibun dei,
la nodi neon.
Tonun oin nunia, butan dei.
Sia la nikir Haꞌukaan ukun.
Sia nikir loos ema raiklaran ukun dei.’
Emi moos halo nunia. 8-9 Emi taliꞌur Naꞌi Maromak ukun, hotu kaer metin adat ema raiklaran. Emi matenek basuk halo nunia!
10 Uluk bei Musa natuun ukun-badu nosi Naꞌi Maromak naꞌak, ‘Ita musti hakneter ina-ama.’ Liu tenik, ‘Kalo ema ida deꞌan nahaat inan-aman, musti taa ukun mate baa ema nia.’ 11-12 Naꞌi Maromak nakara nunia, mais emi hanorin seluk. Emi haꞌak, lalika tulun ina-ama. Lalika foo naha baa sia, surak katak baa sia haꞌak naha mak o atu foo baa sia, o mameno tiꞌan atu sera baa Naꞌi Maromak. 13 Tebes. Hodi nunia, emi taliꞌur Naꞌi Maromak Manfatin, hotu selu hodi emikaan hanorin duꞌuk. Emi halo oin nunia, dala waꞌin tiꞌan.”
Lia mak aat sai nosi ema neon laran
(Mateus 15:10-20)
14 Hotu, Yesus bolu nola ema seluk mak iha nia nodi naꞌak, “Rona, nebee emi hatene diꞌa-diꞌak lia neꞌe! 15 Saa mak tama baa ema kabun laran, la nalo ema kadoor. Mais, saa mak sai nosi ema neon laran, mak nalo kadoor. 16 [See mak no tilun, rona diꞌa-diꞌak!]”*
17 Hotu, Yesus no Niakaan maktuir sia laꞌo nela ema nia sia, tama baa uma ida. Iha nia, maktuir sia nusu lia hatetek nia isin. 18-19 Hotu, Yesus nataa naꞌak, “Emi sei la hatene dauk ka? Lia isin nuneꞌe: saa mak ema naa, la nalo kadoor. Mais, saa mak sai nosi ema neon laran, mak nalo kadoor. Tebes. Saa mak ita haa, tama kabun hotu sai nikar. (Hodi lia nia, Yesus nanorin seluk nosi ema Farisi sia. Tan Nia nanorin naꞌak, ema raiklaran bele naa sa-saa dei. La noo mak luli.)
20 Saa mak sai nosi ema neon laran, mak nalo ema kadoor, toꞌo Naꞌi Maromak moos nakribi, hotu la noꞌuk namutuk no nia ona. 21 Noo lia aat waꞌin mak sai nosi ema neon laran nuꞌu lia aat, lia sala kfoꞌer, lia hanaꞌo, lia hoꞌo ema, 22 lia rotus, lia hakur biti-kluni, lia hahalok aat, lia bosok teen, lia nawan aat, lia tinu aat, lia dale hahaat ema, lia loko aan, lia notar lalek, no lia ulun fatuk.
23 Lia aat nia sia hotu-hotu sai nosi ema neon laran. Lia nia sia mak nalo ema kadoor, toꞌo Naꞌi Maromak moos nakribi.”
Yesus tulun ferik ida mak lahoos ema Yahudi
(Mateus 15:21-28)
24 Hotu, Yesus sia laꞌo nela fatin nia, baa leo ida naran Tirus. Toꞌo baa, sia tama lai-lais baa uma ida, tan Yesus la noꞌuk ema natene Nia mai tiꞌan. Mais Nia la bele nakfunin.
25-26 Iha leo nia noo ferik ida. Ferik nia lahoos ema Yahudi. Nia ema maktabar mak moris mai iha Fenisia, iha rai Siria baa. Oras rona Yesus mai, nia baa nakroꞌan nebee Yesus teꞌur nasai diabu nosi niakaan oan feto.
27 Mais Yesus nataa nodi soe lia naꞌak, “Lawarik sia musti naa uluk lai, foin bele foo hahaak resin baa asu.” [Lia isin naꞌak, Yesus musti tulun uluk niakaan ema Yahudi sia lai, foin bele tulun ema seluk.]
28 Mais ferik nia nataa naꞌak, “Tebes, Ama! Mais asu nia iha hadak ohak. Nia moos bele naa haan mumun mak monu nosi lawarik siakaan bikan.” [Lia isin naꞌak, baa oras lawarik sia naa, asu moos bele naa. Masik Yesus tulun niakaan ema, Nia moos musti tulun ema seluk.]
29 Rona nola nunia, Yesus nataa naꞌak: “Kona! Ina dale nia tebes! Tan nunia, diabu nia sai tiꞌan nosi ina oan! Ina bele fila ona.”
30 Rona nola nunia, ferik nia moos fila. Toꞌo uma baa, naree oan toba dukur, tan diabu sai nela nia tiꞌan.
Yesus nadiꞌak nola ema ida mak diuk no la bele dale
31 Hotu, Yesus sia laꞌo nela leo Tirus, tuir tasi tehen toꞌo leo Sidon. Hotu, sia laꞌo liu toꞌo nikar debu boot Galilea baa. Hotu, sia laꞌo liu toꞌo rai ida no leo sanulu, naran ‘Dekapolis’. 32 Iha rai nia, noo ema ida mak diuk no la bele dale. Niakaan mamaluk sia nodi nia baa Yesus hotu nakroꞌan naꞌak, “Ama! Tulun ami lai! Ami husu Ama rai liman baa, hodi hadiꞌak hola ema neꞌe.” 33 Rona nola nunia, Yesus nodi ema nia mesan baa fatin ida, laꞌo nela ema waꞌin nia sia. Hotu, Yesus natama liman fuan baa ema nia tilun karuk-kwana. Nia moos nola kaban, tau baa ema nia nanaan. 34 Hotu, Nia tanaat baa laleꞌan, nola nawan, hotu naruka naꞌak, “Efata!” (Lia fuan neꞌe naꞌak, “Makloke ona!”)
35 Yesus naruka loos nunia dei, ema nia rona kedas. Nanaan makaꞌas nia, moos mamar kedas, toꞌo nia bele dale diꞌak.
36 Hotu, Yesus no ema nia fila nikar baa ema waꞌin nia. Mais Yesus nakahik sia naꞌak, “Rona lai! Keta katak baa ema seluk haꞌak Haꞌu mak kadiꞌak kola ema neꞌe!” Masik Yesus nakahik moos, sia katak luku lia nia keke lema rai. 37 Ema mak rona lia nia, blaar tebes. Sia tonun Yesus naꞌak, “Tebes! Ema neꞌe nalo hotu-hotu dadi diꞌak! Ema diuk, bele rona! Ema mak la bele dale moos, bele dale!”
7:6-7 Yesaya 29:13 7:10 Ema Israꞌel Sai Nosi Mesir 20:12, 21:17; Ukun-badu Naꞌilulik 20:9; Hanoin Hikar Dalan Moris 5:16 * 7:16 Lia tohar sanulu resin neen neꞌe, la tama iha Hakerek Moon tuan balu.