9
Paulus neon susar, tan niakaan ema Yahudi waꞌin la fiar baa Kristus
1 Ita mak talin malu ho Kristus, dale mak loos dei. Dadi, saa mak haꞌu kdale neꞌe, lia mak loos no tebes. Haꞌu la kbosok. Haꞌu moos koran iha neon laran kaꞌak, Kmalar Lulik mak babilan haꞌukaan dalen neꞌe.
2-3 Nuneꞌe: koran susar todan baa oras kanoin kola haꞌukaan ema Yahudi duꞌuk, tan kakara nebee sia moos talin malu no Kristus. Mais sia waꞌin la fiar. Kalo haꞌu kbele kona kastikar tan seluk sia, haꞌu kadiꞌa aan simu. Masik Naꞌi Maromak sasa faꞌe haꞌu kosi Kristus moos, haꞌu ksimu, surak haꞌukaan ema sia talin malu no Kristus.
4 Tuir loos, sia ema klubun ida mak sotir tebes. Sia mak Naꞌi Maromak foti baa Niakaan oan sia hori uluk aan. Nia natudu Niakaan beran makaꞌas baa sia. Nia namate mamenon oi-oik no sia. Nia foo Niakaan Ukun-badu baa sia, no nameno atu natudu laran diꞌak baa sia. Sia mak natene loꞌu-sudur baa Naꞌi Maromak nodi naliku Nia.
5 Sia moris nosi itakaan bei uluk, mak Bei Abraham, Bei Isak, no Bei Yakob. (Sia nola naran ꞌIsraꞌelꞌ nosi Bei Yakob naran foun.) Kristus moris nosi siakaan husar-binan. Kristus moos Maromak mak ukun hotu-hotu. Ita tonu-haboot Nia toꞌo nima-nimak. Loos!
6 Mais ema Yahudi waꞌin sei la fiar dauk baa Kristus. Masik nunia moos, ema la bele naꞌak Naꞌi Maromak la nalaꞌok Niakaan mamenon baa sia. Keta haneo haꞌak, ema hotu-hotu mak moris nosi Bei Israꞌel, Naꞌi Maromak nafoli sia naꞌak, Niakaan ema.
7 No keta haneo haꞌak, ema hotu-hotu mak moris nosi Bei Abraham, Naꞌi Maromak nafoli sia naꞌak, Niakaan ema. Tan Naꞌi Maromak katak baa Bei Abraham naꞌak, “Okaan husar-binan mak Haꞌu katene, neꞌe mak, husar-binan mak moris nosi okaan oan Isak dei.”
8 Lia neꞌe naꞌak, hori uluk toꞌo baa oras neꞌe, lahoos Bei Abraham husar-binan hotu-hotu mak dadi baa Naꞌi Maromak eman. Hela mesan husar-binan mak Nia boi tiꞌan tuir mamenon.
9 Tan Naꞌi Maromak namate menon baa Bei Abraham naꞌak, “Takseer tinan oin Haꞌu kmai kikar, baa oras nia okaan feen Sara nahoris oan mane ida tiꞌan.”
10 Lahoos nunia dei. Itakaan bei Isak no feen Ribka moos nahoris oan karuak.
11-12 Oa karuak nia sia sei la moris dauk, sei la natene dauk lia diꞌak no lia aat, mais Naꞌi Maromak katak kedan baa Ribka nosi oan karuak nia sia naꞌak, “Maun atu serwisu bodik alin.” Hodi nunia, Naꞌi Maromak nalore naꞌak, kalo Nia boi nola ema ida tiꞌan, Nia natene nanis atu nodi ema nia nalaꞌok serwisu saa. Naꞌi Maromak boi kedan alin nia atu dadi Niakaan ema. Nia la nein naree alin nia atu nalo saa, tan Nia natene kedan tiꞌan.
13 Iha Hakerek Moon Naꞌi Maromak dale nosi oa karuak nia naꞌak,
“Haꞌu kboi Yakob,
Haꞌu kdudu Esau.”
14 Dadi, ita atu haꞌak saa tenik? Arumak emi haneo haꞌak, “Naꞌi Maromak nakotu lia la nodi moon.” Lale!
15 Uluk aan Naꞌi Maromak katak baa Bei Musa naꞌak,
“Haꞌu duꞌuk mak kboi ema mak Haꞌu kdodan.
Haꞌu duꞌuk mak katudu ema mak Haꞌu kadomi.”
16 Dadi, Naꞌi Maromak dodan ema, la titu nosi ema neon laran, lale ema niakaan hahalok, mais nahuu nosi Naꞌi Maromak laran duꞌuk.
17 Iha Hakerek Moon, Naꞌi Maromak dale baa Naꞌin Mesir naꞌak, “Haꞌu kfoti o dadi baa naꞌin, tan haꞌu kakara kodi o atu matudu Haꞌukaan beran baa ema lear. Hodi nunia, ema iha raiklaran tomak foti-naboot Haꞌukaan naran.”
18 Dadi, kalo Naꞌi Maromak beer natudu dodan baa ema ida, Nia nalo luku. Kalo Nia beer nalo ema ida neon monas, Nia moos nalo luku.
Naꞌi Maromak boi ema tuir Niakaan hakara
19 Arumak emi dale sakar haꞌak, “Kalo Naꞌi Maromak nakotu kedan hotu-hotu tiꞌan, toꞌo la noo ema ida mak bele sakar Niakaan kakotun, tan saa Nia sei tula sala baa ita? Neꞌe naꞌak, Naꞌi Maromak la moon.”
20 Kalo o manoin nunia, haꞌu kataa o kaꞌak, “O maneo o neꞌe see?! O bele dale sakar Naꞌi Maromak ka?” Keta nunia, tan Hakerek Moon naꞌak, “Kalo ema ida naseꞌi buat ida, buat nia bele nusu fila baa ema mak naseꞌi nia naꞌak, ‘Tan saa o malo haꞌu nuneꞌe?’ ”
21 Haꞌu kola knaninuk kosi ema mak nalo sasanan rai. Nodi rai fuꞌak ida, nia bele boi atu nalo hanek molen toꞌo ema mose. Nia moos bele boi atu nalo baa sasanan teꞌin mak la no folin. Nia nalo tuir niakaan hakara dei.
22 Nunia moos, Naꞌi Maromak. Nia noo beran atu nalo tuir Niakaan hakara duꞌuk. Nia bele boi atu natudu Niakaan hahibun no Niakaan beran baa ema mak nalo aat, tan ema nia sia fatan kona kastikar toꞌo welon. Mais Nia moos bele boi atu netu neon no ema mak nalo aat.
23 Nia nalo nunia atu natudu Niakaan dodan baa ema balu, tan Nia boi sia kedan atu foti-nahaas sia nodi foo kabaas baa sia.
24 Ita neꞌe, mak Nia boi kedan tiꞌan atu dadi baa Niakaan ema. Ita neꞌe, balu hosi ema Yahudi, balu tenik hosi ema klubun seluk sia.
25 Uluk, Maromak nodi makoꞌan Hosea atu nakerek nosi ema lahoos Yahudi naꞌak,
“Ema mak uluk lahoos Haꞌukaan ema,
Haꞌu kakara bolu sia kaꞌak,
‘Emi neꞌe, Haꞌukaan ema.’
Ema mak uluk Haꞌu la kadomi,
Haꞌu kakara bolu sia kaꞌak,
‘Emi neꞌe, ema mak Haꞌu kadomi.’ ”
26 Nia moos nakerek naꞌak,
“Noo fatin ida mak uluk
Naꞌi Maromak katak baa ema naꞌak,
‘Emi neꞌe, lahoos Haꞌukaan ema!’
Oras neꞌe, Naꞌi Maromak simu sia naꞌak,
‘Emi neꞌe, Haꞌukaan oan!’ ”
Maromak Mak Moris dale nunia, tan Nia dodan ema lahoos Yahudi sia.
27 Dala ida, Maromak makoꞌan ida seluk, naran Yesaya, katak nosi ema klubun Israꞌel naꞌak,
“Masik ema Israꞌel dadi klubun ida
mak waꞌin hanesan raihenek iha tasi tehen moos,
Naꞌi Maromak atu sori nola sia naꞌin hira dei
nosi siakaan salan.
28 Naꞌi Maromak Niakaan oras toꞌo tiꞌan atu nakotu lia baa raiklaran tomak.
Nia la nein tiꞌan, mais atu nakotu lai-lais ona.”
29 Uluk aan, Yesaya moos katak nosi ema Yahudi naꞌak nuneꞌe:
“Ita neꞌe sotir,
tan Maromak Mak Beran Kaliuk
nabusik itakaan husar-binan balu netan moris.
Kalo lahoos nunia,
ita mohu tiꞌan,
hanesan ema kota Sodom no Gomora.”
Dalan moris bodik ema Israꞌel mak seꞌi kotuk baa Naꞌi Maromak
30 Dadi, ita atu haꞌak saa? Ita hatene haꞌak, uluk ema lahoos Yahudi sia la nanono baa Naꞌi Maromak. Mais oras neꞌe, Naꞌi Maromak naloos sia tiꞌan tan fiar Yesus Kristus.
31 Mais ema Yahudi sia sei la fiar. Sia madinas tuir Ukun-badu nodi neo-neon Naꞌi Maromak atu naloos sia. Mais la dadi falik.
32-33 Tan saa la dadi nunia? Tan sia la fiar baa Yesus, mais sia narui aan tuir Ukun-badu nebee Naꞌi Maromak naloos sia. Sia narui aan no lahan Yahudi, mais nuꞌu la naree Maromak iha siakaan oin toꞌo sidi ain baa “fatuk sasidin” iha dalan klaran. Yesaya katak lia nia tiꞌan iha Hakerek Moon naꞌak,
“Sintidu!
Tan Haꞌu krai Ema ida iha Foho Sion,
iha kota Yerusalem.
Ema nia nuꞌu fatuk sasidin ida,
mak ema sidi ain kona baa.
Ema waꞌin nakloti
tan fatuk nia.
Mais ema mak fiar baa Nia,
la neon kiꞌik kedan.”
Fatuk nia, mak Yesus. Mais ema Israꞌel sia dudu sai Nia. Nuꞌu sia sidi ain nodi nakloti tan fatuk nia.