14
God ami Sinik Tambal ata titil kukuyilin diildiil kaata ko
Rom 12:6-8, 1Kor 12:1-11, Ef 4:7-12, 1Pit 4:7-11, 2Pit 1:3-9
Ibi ti kano titil-daka-bamdipla kusnum imi aket kaata ti suunkup kukaayin-biliwa kayi! Ibi God ami Sinik Tambal ami titil kusnum kusnum kukaayila-yaaba kaami aket uyo kufoyuk o, kala-somla ko. Katale, Sinik Tambal ami titil kipni kuyila talalu kuluulokomip kaa, God ami weng tem uyo ku-fatap-daa bakamin kaami aket kaata dukum-kup keyilula yak fuku-bom-biliwa yo! Kaami miit kaali, dok nolin tunum ata taba abip ma ma imi weng ma utam kaal-kesa disa kaami weng kaata bakama namti, ali weng kaali, tunum numi bakayokoma disa; kaali ti, God almi-kup bakaalokoma. God ami Sinik Tambal alta titil kolaya, God ami aket fukunin yang sawaansu kaami sang uyo baka-mokoma. Lale, kayak kayak ili ami weng bakaba kaa, ma utamsip disa babon. La, tunum God ami weng tem baka-mokoma ami weng uta taba-lomdu unang tunum imi God ami lak duu-yilin iyo, yam-titil-diilula, God ami kukup uyo kukuyilula unang tunum iyo kanolum o, kaliple, uluum tabin diim kawu titil so kukaayokomu. Tunum ma ata abip kusnum ma imi weng ali utamsa disa, ali naknak weng bakayokoma kaayo, ami weng uyo almi aket tem-kup dap-titil-diilokomu. Lale, tunum ma ami God ami weng bakayokoma, ami weng kuuta taba-lomdu ap-tunum kusal Kristen unang tunum kiimi yam-titil-diilokomu o.
Nalmi aket fukunbi kaali, alik ibi abip ma ma imi weng kaa kipni ma utamsip disa, babon uyo kuno bakamin o, kalbi. Lale, nami aket fukunin dukum kaali ti, ibi God ami weng uyo bakayin o, kalbi. Kemin, tunum abip kusnum imi weng ali utamsa dinim, uyo bakama namti, tunum kusnum ata ami weng kaa bakaba uyo fal-siki bokoyilale, Kristen unang tunum iyo weng san-sinomdipla, titil-fak-daalin o. Lale, weng kaa fal-sikilin disa ke-lokoma kaali, mep tunum kaa abip kusnum imi weng kaa babon-bam bakaba ayo tal minlo tem unala, God ami weng tem bakayin tunum ata talaba tam tip kaltoop banokoma no. Nak-tunum kusal, kipyo. Ibi nami weng kala bokoyokomi kalawuuli dotu utamin! Kanola, nali tal kipni diim ababi-kup abip ma ma imi weng kaa kibi utamsip disa, kaami weng uyo bakayokomi disa. Kaata dong dokoyokomu dinim. Nali God ami weng uyo bokop-na ku-fatap-dakaayin aye, God ami mafek mafek tituun-kup uyo kukaayin-bilila, uta-mokomip aye, kiita ipni dong dokoyokomu ko.
Pol ami boko-lomda: God ami weng kukaayup namti, nulmi weng ata-kup baka-bamdupla kukaayum o, kalsa kaata ko
Mak 16:17, Ap 10:45-46, 19:6, 1Kor 12:10,28, 14:1-6,26-40
Kemin ale, nuli mafek mafek sinik dinim o kala, fong ket aa, buung bengkan aa, imi aket kaata fanang daalum; kiimi biileng ayo naan-bam tam-bana tildaak-bana-ke-bam, tambal-kup naanin disa kemip namti, kaa dok kano kaami weng kabak naanbu kabak-ali dotu weng sanalup dinim; ale bikul kaakal tambal-kup naan-tabin disa ke-lokomu namti, waasi dinin tunum ili kalok no, utam-somdipla, Awu, kaali waasi tabu kala kalalipla iyo fak-saalokomip disa. Ultap kemin, kipkal lotu ke-bam abip ma ma imi weng utam-ilom ma kaal-kesip daa, kaami weng baka-mokomip kaa, yak tunum akal weng kusnum kusnum utamin disa bom-bilip, ili dok kano-lomdip kipni weng bakabip miit uyo dotu utamalip disa yo. Kipni weng bakabip kaali, disa yak as diim, tuum diim, dok saanbu tap ke-mokomu. 10 Kabak-ali faneng kemin, tawaal diim kalawaali yakal ilmi weng del e kala baka-bala baka-bala-kemin, uyo yaapkan bom-bilip kemin, alik ili ap-tunum kusal imi bakayin-bilipla, weng kaami iipyak tem uyo utam kaal-kem-tabasip. Lale, 11 nali tunum ami weng bakaba kaami iipyak tem uyo utamin disa keli namti, ali aket fukun-ilomda: Yi, ali tunum miit kusnum o, nokokoma le, nakal, ali tunum miit kusnum o, aka ke-mokomi. 12 Kipkal kanola tunum ayo weng del kusnum ma utamsip disa kaayo, bokoyokoma namti, ibi ami dong dakaalin so, ali ipni dong dakaayin so, iyo ke-mokomip disa. Kemin, ibi ami weng uyo kaal kebip ale, ali ipni weng uyo ma kaal-keba kawu, iltipni diim kawu dong dakaayokomu. Ipni aket fukunin dukum kaali, ti God ami Sinik ami titil ata kuluulum o, kalbip ema? Kanubip namti, iltipni dok nolin dok nolin titil kuluu-lomdip kap-tunum kusal Kristen unang tunum imi yam-titil-saanin kuuta, titil-foko kuluu-bomdiwa kayi!
13 Kala kanum bokolu kemin, tunum ayo abip ma ma imi weng kaata-kup bakaba namti, ali taba God ami weng umolala ata kaal-ke-laamin ayo kolaya, weng uyo ifiiyilala, ap-tunum kusal iyo talalu utam kaal-kemin o. 14 Ti kipkal aket fukunin! Kabi abip kusnum imi weng kapni utamsap disa, kaami weng baka-bamdap God ami beten kamaalokomap kaa, kaltapni sinik ukol God ami beten ke-mokomu. Lale, kapni aket tem uyo kapni weng bakabap kuuli, ma utam-ilomdala weng kaami iipyak tem kuu dok nolin i! kalala aket fukunokoma. 15 Kanum bokolu kemin, kabak-ali kabi kalok nolokomap? Kaltapni sinik kabak beten ke-mokomap kaali, kaltapni aket fukunin ukol ti utamu yi, Beten weng kaali, kanolin kaami sang kaata bakaba nu, kalalu utam kaal-ke-lokomu, kaata tambal. Kemin kanolin o, kaltapni sinik kabak-ami God ami baal wii-mokomap kaa, kaltapni aket fukunin ukol ti utamula kanolin kaami baal miit ata wiiba kalalu utam kaal-ke-lokomu kabak ata mokso. Lale, 16 lotu ke-mokomip uyo, nak-tunum kaayo, kanolin beten kemin kukup tambal uyo kambola-lomdap abip ma ma imi weng utamsap disa, kaami weng kuluu-lom babon-bam baka-bamdap God ami yaap ke yo, akan-kaamap namti, tunum ayo kapni weng del kusnum utamsap disa bakabap kakal uta-mokoma disa kemin, kapni mepso kulu tiinba ayo kapni beten weng uyo talalu utam boko-lomda: U faneng, kalokoma disa. 17 Kemin ale, kano tunum kapni beten kaa ke-bam yaap ke yo, kalbap kulaa tambal ema? Lale, uta taba-lomdu kap-tunum ami aket tem uyo dap-titil-molokomu disa yo.
18 Nami suunkup abip ma ma imi weng ma utamsi disa, umi bakan-umbi uta taba kipni abip malo malo imi weng utamsip disa umi bakayila-yaabip uyo, kabaak banula uta uta kesu kemin kaali, God ali yaap ke yo, akan-kaabi. Lale, 19 Kristen unang tunum tala-tala-ke-mokomip kaa, nali kalanolin weng kaata-kup bakayin-bilila, utamin o, kalalila, abip ma ma imi weng uyo ma utamsi disa, kaami weng uta weng batbat kaata bakayin-bilila babonalip kemin, uyo kulaa-somdila, nulmi weng kuuta-kup kuluu-lomdi mep weng duung katip kulaata-kup imi bakayin-bamdi kukuyokomi kaata, weng kabak-ami iipyak tem uyo abiltap-kup uta-mokomip o.
20 Nak-tunum kusal kipyo. Man unaak imi aket fukunin kaali, kukup mafak ayo ma nuumum o, kala-laabip disa. Kemin, kipkal man unaak ililtap kebip kanolin aket fukunokomip kaata tambal. Lale, kipni abip ma ma imi weng kaa ma utamsip disa, weng bakamin kaami aket fukunin kaali, ibi man katip katip imi aket fukunin ultap uyo kemin daa. Unang tunum dukum dukum imi aket fukunin tap kaata kanu-bamdiwa yo. 21 Tunum imi God ami Sukon Tem weng dolsip uyo boko-lomdu:
Kamokim Dukum ayo boko-lomda: Am ma daanula kawu, asuk nakal weng kuliili, unbilin unang tunum yakal ilmi weng kusnum bokoyinsu imi bokoyilila, ita weng uyo kulii-tal kaltamu kufolokomip. Lale, nami weng uyo talalu weng sanokomip dinim o,
kala, Kamokim Dukum ayo kanum bokosa kayi kalsu ko.
22 Kalsu kemin, numi kanola abip ma ma imi weng kaa nuli utamsup disa kaami weng bakamin kaami kukup kaa, God ata titil kaa numi kuuyilala, nuta abip malo malo imi weng kaa numi utamsup dinim uyo baka-bulupla, weng kuuta taba God ami lak duulin ili daa kemin, God ami lak duulin dinim bom-bilip, unang tunum ita-kup kukuyila-yaabu. Kemin ale, God ami weng uyo kuluu unang tunum kukaayin kaami kukup kaata, God ayo titil kaa numi kuuyilala, nuta God ami weng uyo kuluu kukaayin-bulup, weng kuuta taba God ami lak duulin disa kii daa; unang tunum God ami lak duu-lom bom-bilip ita-kup, kukuyila-yaabu.
23 Kabi abip ma ma imi weng baka-mokomap kaali, uta taba-lomdu unang tunum kiili, dong dokoyokomu disa. Kristen unang tunum alik ibi tala-tala-ke alik maakup abip ma ma imi weng kaali, kibi ma utam kaal-kesip disa kaami baka-mokomip kaali, tunum ili kanolin kukup kuuli utamsip disa; aye, tunum God ami lak duulin dinim imi tiltam talokomip kaa kiili boko-lomdip: Daa! Kalawiili babon-bamdipla kanubip ema yo? kalokomip. Kemin, 24 ibi alik maakup iltipni weng kaata kuluu-bomdipla, God ami weng kulii-tal kola-una-tala-ke-mokomip kaali, tunum God ami lak duulin disa; aye, yak tunum ipni kukup kaa kanubip uyo utamsa dinim kaaso, tiltam tala namti, kipni weng bakabip uyo tunum kaami aket tem uyo wan binalin tap kelula utama yi, Kwin i! Nami kukup mafak nun-umbi namti kala nam-fatap-daalip kawi! kalalala uta-mokoma. Kemin, 25 weng alik yak aket tem sawaansu namti kulaata tiltam fatapnu kala, kala-somdala kawu, kamok kamok imi weng umkaayin tap ke-lomdaya, katuun duung fakela daak dabuuna-lomda, God ami win uyo kufon-bamda boko-lom: God ali fan kipni diim kawu bombe no, ke-mokoma no.
Pol ami boko-lomda: Alik lotu kemin kaami kukup kaali tambal-kup kelula yo, kalsa kaata ko
1Kor 14:1-25
26 Nak-tunum kusal kipyo. Nami weng kala bakayimbi kaami miit namti kala bombuu kemin, atam iliwa. Ibi lotu kem tala-tala-ke-mokomip kabak-ali Kristen unang tunum ita yam-titil-diilum o, kalaliwa, alik kanu-biliwa yo, kala-somla ko. Alik ibi ok so ko. Ma ata baal wiimin. Ma ata God ami Sukon Tem weng baka-bamda kukuyin tunum; ma kaata God ami weng bokolale, asiik unang tunum imi bakayin tunum ke-sala; ma ata abip ma ma imi weng ma utamsip disa kaami weng bakayin tunum ke-sala; ma ata ap-tunum imi weng kusnum baka-bala ata fal-siki kukaayin tunum ke-sala kemin o. Kanumin kaali Kristen unang tunum imi dong dakaayin-bam kanumin o. 27 Kemin, ali kanta abip malo ma imi weng kaali, utamsa dinim kaami bakamon o, kala namti, tunum asuumano e? alep e? kiita-kup mep weng kala baka-mokomip kaali ti yaap o. Alik iyo weng kulii-tal kabak-kabak-kemin disa. Ma asiik boko una-una-kemin lale, tunum ma ata weng kaa fal-siki kuu bakayokoma kaali, ti tangbal o. 28 Yale, lotu ke-mokomip kaali, tunum weng fal-kelmin ayo disa namti, tunum abip ma ma imi weng bakamin tunum kaami weng uyo unang tunum imi bakayilin disa; duluma tiin-bomda God almi-kup bakaan-balala yo.
29 God ami weng kuluu unang tunum kukaayin tunum maakup e? alep e asuumano e? kiita-kup God ami weng uyo bakayin-biliwale, ap-tunum kusal iyo fanang daaliwa yi, God ami weng kaami sang bakabip uyo ifiiyin-bamdip atin ti God ami weng e? disa ye? kala-somdip kanu-bamdipla yo. 30 Katale, lotu ke-bam ale, tunum ma lotu am kaptam tiinba ayo God ata taba tunum kaami aket tem uyo weng ma kolale, asiik tiltam tola weng ma uyo kukaayon o, kala namti, kamasi diil tunum kaa tola-bomda weng kukaayinba ayo duluma bom ilale, ap-tunum asiik tola weng uyo bakayin o. 31 Kanola, kaami kukup kaata, ipta God ayo weng so ma kukuyokoma kawu, alik maakup maakup ibi God ami weng uyo kuluu-lom unang tunum imi bakayin-bilipla, alik yakal utam titil-fak-daalik o. 32 God alami aket fukunin kaali, Ibi alik maakup maakup numi fanang dakabup kaata lotu kaa kemum o, kala-laamin disa. Lale, kipni aket fukunin uyo kulii-tala-tala-ke aket maakup ke-somdiwa, lotu uyo tambal-kup kemin o. Kemin, God ami weng kuluu-lom unang tunum baka-bam kukuyin tunum ayo, kano unang tunum imi weng ilu-lom bakayokomi aye, unang tunum imi weng bakabi disa ke-laamin aye, imi kukup uyo dotu tiin saan-bamdila kayi! kala-lomda aket fukun-bamdala yo.
33-34 Kemin, Juda imi lo kaali boko-lomdu: Unang ili talaba tam God ami unang tunum kii tiin saanin disa. Kiili tal minlo tem uniwa yo, kalsu. Kemin, Kristen unang tunum ibi tala-tala-ke lotu kemip kaali, unang kibi weng yaapkan kaa baka-bamdip tuluk-tulukmin disa; duluma bom-biliwa yo! God ami unang tunum alik abip ma ma bom-bilip ili kanumin kukup kaata-kup kanun-umbip. 35 Kemin, unang uyo lotu tiin molin ami weng bakaba kaami miit kaata utamon o, kalu namti, uyo din am kawu ulmi imak ata dik-daaluya, ata talalu ifi bakawala utamamu. Lale, fan Kristen unang tunum imi lotu kemip namti, unang umi weng baka-mokomu kaali tambal disa yo.
36 Kemin ale, ibi kanimin o, kalaliwa, kukup kalawaali kuyang saak tiibip i? Nuta diil unang tunum kemin, God ami weng uyo unang tunum kusnum ma imi bakayinsup o, kalbip o? Ale, nuta-kup, unang tunum kusnum ili disa, God ami weng uyo kutal-daasup o, kal-bomdip kala-laabip yoko? 37 Kemin, tunum ma ayo aket fuku daa-lomda: Nali God ami weng kuluu unang tunum imi kukaayin tunum te! kala, aa nami titil kalaali God ami Sinik ata kup-nala kutal-fukubi no, kala namti, kaali akal utama yi, Nami weng kala kipni dola kuyi kalawuuli, Kamokim Yesus ami titil-tibin weng uyo bakaya-laaba kaata no, kalala utamak o. 38 Ale, tunum ayo ma boko-lomda: Pol ami weng kaali, Kamokim Yesus ami lo kaata bakaba disa yo, kala namti, kaa nokol utamupya, Ali God ami weng kuluu unang tunum imi kukuyilin tunum disa yo, kala kalokomup o. 39 Kemin, nalmi nak-tunum kusal kipyo. Kibi God ami weng uyo kuluu-lom unang tunum imi kukaayilin kaami aket kaata-kup dakat kalula dukum-kup fuku-bomdiwa yo. Yale, ibi taba iltipni unang tunum imi bokoya-lomdip: Ibi abip ma ma imi weng ibi ma utamsip disa umi bakamin kaa awem kemin, kabak bakamin disa yo, kala fakelmin dinim o. 40 Kemin, alik kipni kukup kiili tambal-kup nuu-bamdiwa, ipni lotu kemin kukup uyo ti tambal-kup ma kutal-fuku kulii-una-biliwa yo!