☰ HIPRUS 1
Hiprus
Nauəuə iətəm kəmətei tuvən kəm nətəm Isrel
Nəghatiən əkuəkɨr rəha nauəuə u Hiprus
?Pəh təmətei nauəuə u? Kitah kotəruru məmə pəh təmətei nauəuə u. Iətəm təmətei nauəuə u təməsəniən nərgɨn e nauəuə. Iətəm təmətei təməsehiən Iesu Krɨsto. Mətəu təmətəu Nanusiən Təuvɨr o nətəmimi pɨsɨn pɨsɨn mɨn nətəm kəmoteruh Iesu. Kəni iətəmi u, in təhrun nəghatiən rəha Oltestɨmɨn, mɨne noliən rəha nətəm Isrel aupən. Kəmə təhro Panəpəs uə Apolos kəti təmətei nauəuə u mətəu-inu ilau kuəhrun natimnati mɨn əha. Kəni ilau kuepət e niməfaki. Nətəmimi nəuvein, nɨkilah təhti məmə Pol təmətei, mətəu nɨkitah təsəhtiən lanəha mətəu-inu e letə tepət rəha Pol, təmələhu=pən nərgɨn, mətəu nərgɨn tɨkə e nauəuə u.
?Təmətei tatuvən kəm pəh? Təmətei nauəuə u kəm nətəm Isrel nətəm kəutəhatətə e Krɨsto Iesu, mətəu nəmə təhro nəuvein kəmohtəlɨg=pən nəuvetɨn e noliən rəha nɨtəu-pəniən Lou rəha Mosɨs. Nəmə təhro ilah kəsotəhrun viviən nəukətɨ Nanusiən Təuvɨr.
?Natɨgiən təhro lanu nian təmətei? E nian əha, nətəm Isrel kautərəkɨn nətəm Isrel nətəm kəutəhatətə e Iesu Krɨsto. Nɨkilah təpəou ohni. Təuvɨr məmə ilah okotətəu məmə nəhatətəiən rəhalah in nɨpəhriəniən, kəni Iesu in Krɨsto iətəm Uhgɨn təməni məmə otahli=pa.
Təmətei nauəuə u o nak? E nian əha nətəmimi nəuvein e niməfaki, nɨkilah təhti məmə noliən rəha nɨtəu-pəniən Lou rəha Mosɨs e Oltestɨmɨn, in ilɨs tapirəkɨs noliən rəha nəhatətəiən e Iesu Krɨsto. Mətəu noliən mɨn lanəha rəha Oltestɨmɨn, ilah narmɨn mɨn əmə rəha natimnati mɨn iətəm Iesu otol. Kəmotətei nauəuə u məmə nətəmimi okoteruh motəhrun məmə Iesu Krɨsto in ilɨs tapirəkɨs natimnati mɨn rəfin, təhmen e iəni mɨn, mɨne nagelo mɨn, mɨne Mosɨs, mɨne Eron mɨne pris mɨn. Noliən rəha nəhatətəiən e Iesu Krɨsto in təuvɨr pɨk tapirəkɨs noliən rəha nɨtəu-pəniən lou rəha Mosɨs. Inu, in nɨpəhriəniən mətəu-inu natimnati rəfin rəha Oltestɨmɨn təmuva mol nɨpəhriəniən lan e Iesu Krɨsto. Kəni nɨmɨsiən əmə rəhan in təhmen əmə məmə otos rəkɨs noliən tərah mɨn rəha nətəmimi.
1
Krɨsto təmol əpu Uhgɨn kəm tah
1 Aupən ikɨn, Uhgɨn təmətəni* nəghatiən rəhan, mətəu təmətəni asoli əmə kəm tɨpɨtah mɨn e iəni mɨn e nian tepət mɨne e suaru pɨsɨn pɨsɨn mɨn. 2 Mətəu rəueiu əha, kɨnotevɨg=pən e naunun nian,† kəni tɨnətəghati əhruahru kəm tah e Nətɨn, iətəm in təməfəri məmə otarmənɨg e nautə rəfin rəha tatə rəhan.‡ Kəni e Nətɨn əha, in təmol natimnati rəfin e nəhue nɨftəni.§ 3 Nətɨ Uhgɨn in nəhagəhagiən rəha nəuvɨriən mɨne nəsanəniən rəha Uhgɨn.* In təməru əhruahru əmə rəhan tatə e natimnati rəfin.† In tətəmkərain natimnati rəfin e nəsanəniən rəha nəghatiən rəhan.‡ Nian in təmɨmɨs rəkɨs məmə otafəl rəkɨs rəhatah noliən tərah mɨn,§ kəni in təməharəg e nəven maru rəha kig, ikɨn ima rəha nepətiən mɨne nɨsiaiən, e negəu e neai.*
Nətɨ Uhgɨn u, in ilɨs tapirəkɨs nagelo mɨn
4 Tol lanəha, Uhgɨn təməfəri rəkɨs Nətɨn u, kəni in ilɨs tapirəkɨs nagelo mɨn, təhmen=pən məmə nərgɨn u iətəm Uhgɨn təməfən kəm in, in ilɨs pɨk tapirəkɨs nərgɨlah rəfin.† 5 Uhgɨn təməsəni agɨniən kəm agelo kəti rəhan məmə,
“Ik nətɨk.
Rəueiu inuva rəham tatə əhruahru.”‡
Mətəu in təməghati lanəha kəm Iesu. Kəni Uhgɨn təməsəni agɨniən kəm agelo kəti məmə,
“Iəu tatə rəham,
kəni ik onəkuva nətɨk.”
Mətəu in təməghati lanəha kəm Iesu.§
6 Mətəu e nian Uhgɨn tahli=pa Nətɨn iətəm təmaupən mair* tuva e nətuəuiniən, kəni in təni məmə,
“Pəh rəhak rəfin nagelo mɨn,
nɨpənəgɨlah tek nɨftəni e nɨsiaiən, motəni-vivi in.”
7 Nian Uhgɨn tətəghati e nagelo mɨn, in tətəni məmə,
“Iəu iəmol rəhak nagelo mɨn
ilah kotəhmen e nɨmətagi iətəm tətan ikɨn mɨn rəfin, matol rəhak uək.
Ilah noluək mɨn rəhak, təhmen e nɨgəm.”†‡
8 Mətəu təmətəghati e Nətɨn kəni mətəni məmə,
“Uhgɨn, rəham narmənɨgiən otətatɨg itulɨn, naunun tɨkə.
Nətarmənɨg maskəlɨm neim rəham, kəni rəham narmənɨgiən in təhruahru agɨn.
9 Ik nəmolkeikei əmə nəhruahruiən
kəni mətəməki e noliən ekəu-ekəu mɨn.
Tol lanəha, iəu u, rəham əhruahru Uhgɨn,
iəu iəmələhu aupən ik, kəni ik ilɨs e ik mɨn nəuvein.
Kəni iəmol=pən kalɨku e rəhm-kapə e nɨsiaiən,
matol nɨkim tagiən tapirəkɨs ik mɨn nəuvein.”§
10 Kəni Uhgɨn tətəni=pɨnə mɨn kəm in məmə,
“Iərmənɨg, e nətuəuiniən, ik nəmol natimnati mɨn e nəhue nɨftəni u,
mol in təskasɨk.
Kəni e nəhlməm aru əmə,
ik nəmol natimnati rəfin iətəm kəutatɨg e neai.
11 Natimnati mɨn rəfin u, ilah okəpanohkə,
ilah okotəuas təhmen e napən iətəm təməmnəmɨt,
mətəu ik nətatɨg itulɨn əmə.*
12 Ik onəkaiu-aiu ilah,
təhmen əmə məmə iətəmimi təmaiu-aiu rəhan napən.
Ik onəkəuhlin natimnati mɨn u,
təhmen e iətəmimi təmɨtɨs rəhan napən,
məmə in otətəuti e in pɨsɨn.
Mətəu ik, nətatɨg itulɨn əmə lanko,
kəni ko nəsɨmɨsiən nian kəti.”†
13 Uhgɨn təməsəni=pən agɨniən kəm agelo kəti rəhan məmə,
“Ik əharəg e rəhak maru, ikɨn ima rəha nepətiən mɨne nɨsiaiən,
kəni mətəhtahnin.
Pəh iəu iəkosiahu rəham mɨn tɨkɨmɨr mɨn,
mol ilah kotəhmen e napən kəti iətəm nətafəl nəhlkəm lan.”‡§
14 Mətəu nagelo mɨn, ilah noluək mɨn əmə. Nagelo mɨn, ilah narmɨn mɨn nətəm Uhgɨn təmahli=pa ilah məmə kəutəsal o nətəmimi nətəm otosmiəgəh ilah.
* 1:1 Hip 2:2 † 1:2 1Pitə 1:20 ‡ 1:2 Sam 2:8 § 1:2 Jon 1:1-3; Kol 1:16 * 1:3 Jon 1:14; 12:41; Aes 6:1-4 † 1:3 Jon 14:9; Fɨl 2:6-7; Kol 1:15; 2Kor 4:4 ‡ 1:3 Kol 1:17 § 1:3 Tait 2:14 * 1:3 Fɨl 2:5-11; Kol 1:15-18. † 1:4 Efəs 1:20-21; Fɨl 2:9 ‡ 1:5 Sam 2:7; Uək 13:33; Hip 5:5; 1Kron 17:13 § 1:5 Mat 3:17 * 1:6 Kətəni məmə in təmaupən mair mətəu-inu tatos nepətiən mɨne nɨsiaiən lanəha təhmen e iəpəou iətəm təmaupən mair. Kəni natimnati mɨn rəfin, rəhan əmə. Kolosi 1:15 tətəni məmə, “Aupən aupən agɨn, nian nɨftəni mɨne neai mɨne natimnati mɨn rəfin kəmautohkə əhanəh, mətəu Nətɨn, in təmaupən matɨg rəkɨs. Kəni tol=pən in, in ilɨs tətarmənɨg e natimnati mɨn rəfin u.” Sam 89:27; Hip 2:10; Rom 8:29. † 1:7 Sam 104:4 ‡ 1:7 Nɨmətagi mɨne nɨgəm kəmiəuva nian Uhgɨn təməfa Lou. Hip 2:2; 12:18-21. § 1:9 Sam 45:6-7 * 1:11 Aes 34:4; 51:6; Nəh 6:12-17 † 1:12 Sam 102:25-27 ‡ 1:13 Nəghatiən Kris əhruahru tətəni məmə, “iəkol rəham tɨkɨmɨr mɨn ilah kotəhmen e nati kəti iətəm nətəharəg mətəfu-pəri nəhlkəm lan,” kəni nɨpətɨn u məmə, “Oiəkol ik ilɨs agɨn tapirəkɨs rəham tɨkɨmɨr mɨn.” § 1:13 Sam 110:1
☰