GALA Daawoo Zɛʋɛi Tɛnɛbo Nui 2

Ziimaɠɛɛi ɠa ga wafuun faa

1 Gè ɠɛni ɓɔɠɔ ma: «Li mu, è ziimaɠɛɛi ʋoluʋɛtɛ, è undaanɛɛi ɠaiziɛ, è ka!» Gè kaani ga naa ɓalaa ka ga wafuun faa nɔ. 2 Gè ɠɛni ma: «Ɲɛɛi ɠa ga ɠimalala vaa, ziimaɠɛɛi la faa nɔpɛ paa nu ma.» 3 Gè yiimazeɠeni ga gè ɓɔɠɔ ve dɔɔ ɓɔɔlei ya, gè ʋokɔɠɔ ɠimalalai nuiti ma, kɛlɛ nà ma, gè ɗa ziɛ ɠimalai zu. Gè ɠɛni pɔ gè naa ɠaaɠa, nii pagai nuɓusɛi ma ga é kɛ ná-eteai zu geeɠɔlɔgi wu.

4 Gè boti wolaiti kɛɛni, gè pɛlɛiti to ɓɔɠɔ ʋɛ, gè leezɛn ɓeleiti da. 5 Gè kpeleiti tɛɛni, ta gulu ɓeleiti, gè gwaa wului ma zii pɛ sin ná. 6 Gè ziɛyeɠeiti bɔɔni, ti zu ɗɛi ɗa ʋu gulu ʋɔnɔ dɔɓɔi ma.

7 Gè duɔiti geyani, zinɛiti ta anzaiti saama, ta botiɠɛ nuiti ti ɠɛni zèa. Gè togani wolaiti ta ma goiti sɔlɔɔni ga mɔinɗa, é leʋe naati kpein ba, ti leʋegai tùɠɔ Zeluzalɛme. 8 Gè walii ta zanugi ɠaalɛɛni ba, nii é ɠɛni ɠulazu masagiti zea, ta zooi niiti gè ɠɛni ti unda. Gè guye loo nuiti sɔlɔɔni, zinɛiti ta anzaiti saama. Gè naa zɔlɔɔni, nii é ga zinaa kpein ziima vaa, ànzai wola mɔinni.

9 Gè ɠɛni ga nu wola, ɠaazu unfegi ɠɛ bɛ̀, é leʋe naati kpein ba, ti leʋegai tùɠɔ Zeluzalɛme. Nà-ɠimalai yɛni bà naa kpein su. 10 Nii kpein nà la ka, wɔin sò, gè la ɠɛlɛni tanɔpɛ ba. Ziimaɠɛɛi la yɛni, nii gè la feeni zìi ya. Gaamazu gè koozunɛɛi zɔlɔɔni nà-botiiti kpein faa zu, naa ɠa kɛai ga tɔnɔgi gè sɔlɔɔni nà-botiiti kpein su. 11 Gè botii naati kpein pɛtɛni, niiti gè ti ɠɛɛni, ta kpɔlɔi nii kpein gè suzoni, gè ʋa ti ɠɛ. Gè pɛtɛni ga naa kpein ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so. Kulanuma ɓɔɠɔɓɔɠɔ ge la nuɓusɛi ʋɛ zooi ɠa.

Ɠimalai ta ɠimalalai ta ga wafuun faa

12 Naa ʋoluma, gè deveni ga gè ɠimalai ɠwɛɛ ta ɠimalalai. Mazɔlɔɔ zɔi é ʋaazu maavalibosu masa kpɔkpɔgi ɠa, lee ɠili ka é ʋaazu kɛɛzu, é ɠula naa ʋolu, nii kɛai niina?

13 Gaamazu kulanuma ɠa ɠimalai ʋa, é leʋe ɠimalalai ʋa, ʋelei nɔ kulanumai wozakalagi ʋa la, é leʋe kpidii ʋa. 14 Mazɔlɔɔ ɠima nui ɠaazu ɠa diizuʋɛ ʋa, kɛlɛ ɠimalala nui ɠa ziɛzu kpidii zu. Tama, gè pɛtɛgɛ ga ti-ɠaaɓelazuʋɛ ɠa ga faa ɠila nɔ. 15 Gè ɠɛni ɓɔɠɔ ma: «Tɛi nɔ̀un gàaɓelazu ga ɠimalala nui ɠɛʋele, kulanumai ɓɛgele ɠa gè sɔlɔɔgai ɠimalai ʋa?» Gè ɠɛni ɓɔɠɔ ma: «Naa ɓalaa ka ga wafuun faa nɔ.» 16 Mazɔlɔɔ nu la ʋaazu ɠizɛsu ɠima nui ɠɛɛ vaiti su, é ʋa leʋe ɠimalala nui nɔnɔiti ba, ti felegɔ pɛ zeemai ɠa wosu ti ma. Tɔɔzei ɠima nui ɠa zaazu ga ɠimalala nui ɠɛʋele.

Botii ɠa ga wafuun faa

17 Gè tɔɔzeini naazu ga zɛnvui wɔinzeɠea, mazɔlɔɔ nii kpein nuiti ti kɛɛzu zooi ɠa, tanɔpɛ ge la ʋani gàazu, tɔɔzei fai kpein ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so. 18 Botii kpein wɔinzeɠea mà, nii kpein kpɔ̀lɔai ma zooi ɠa, naa ɠa yɛsu nui naa ya, é zeizu pòtogi zu. 19 Ɓɛ mu ka é kwɛɛ, ni toɠa ɠɛ ga ɠima nu, ɓaa ɠimalala nu? Tama tɔ ɠa é zeizu naa pɛ unda, nii gè gaalɛai ba zooi ɠa ga nà-botii ta nà-ɠimalai. Naa ɓalaa ka ga wafuun faa nɔ. 20 Ìɲɔ ge leʋeni, tɔɔzei kpɔlɔi kpein faa zu gè soni, botii naati kɛɛ vai zu zooi ɠa. 21 Gaamazu, nu ɠa ɗa ɗa-wotii ɠɛ ga ɠimalai, keleɠelegi, ta è-zoodai, è zɛba è sulɔnɔgi pɛ zɛ naama nui ya, nii kaipa é la ma boti ta ɠɛɛni. Naa ɓalaa ka ga wafuun faa nɔ, ta telebotala vaa. 22 Botii kpein nui kɛɛzu zooi ɠa ga tɔ ɓɔɠɔi suvikɛi pɛ, ná-kulanuma ɓɛgele ɠa é su? 23 Sii voloi kpein ka nɔ ga taɓai, ná-botiiti kpein ta ɠɛɛzu nɔ ga ziizoolɛi, anɛɛ kpidii, dooɠo ge la zii ʋɛ. Naa ɓalaa ka ga wafuun faa nɔ.

24 Undaanɛ ɠila kpegi é nuɓusɛi ʋɛ, tɔ ɠa é ga é laami, é ɓɔɔle, ta é ɠoozunɛ ná-botiiti ma. Gè kaaʋɛ ɓalaa ga GALA ka é naama undaanɛɛi vea ti ya. 25 Mazɔlɔɔ ɓɛ ɠa a zoo daami wosu, é undaanɛ zɔlɔɔ, ni GALA ge la vaani bu? 26 Mazɔlɔɔ GALA ka ɗa ɠimalai, faaɠwɛgi, ta koozunɛɛi ve naama nui ʋɛ, nii nɛai bɛ. Zɔi é ga faa ɲɔu ɠɛ nui, toɠa ɗa naa yiizoolɛ ga é ani mɔinmɔin gaalɛ ba, é ɠɛ ga GALA ziima nui nɔnɔ. Naa ɓalaa ka ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so.