GALA Daawoo Zɛʋɛi Ezekiyɛle 3

Ɠɔoɠɔ GALAGI
nà-GALA goo wo nui iɲɔdɔɔ vai

1 Zɔi é ɠɛni ɓɔɛzu pɔ̀, é ɠɛni mà: «Ɗa ʋe, zunui, nii feai è ya, mi, sɛʋɛ ɓiligi tɛi kpɔle, naa ʋolu è li, è ɓɔɛ Izilayɛle nuiti pɔ.» 2 Gè laalaoni, é sɛʋɛ ɓiligi lɔ dà, gè mi. 3 É ɠɛni mà: «Ɗa ʋe, zunui, è-ɠogi ɠɔnɔkula, è yiɠo ga sɛʋɛ ɓiligi tɛi gè feezu è ya.» Gè miini, é nɛɛni dàaʋɛ eɠɛ kɔin gulɔ.

4 É ɠɛni mà: «Ɗa ʋe, zunui, li Izilayɛle nuiti pɔ bɛ, è dàawooi wo ti ma. 5 Gè la è leʋesu nuɓusaa ma ti zii woo ɠili bosu, ta ti-laawooi ɠaaɠaazu ɓaai, kɛlɛ Izilayɛle nuɓusɛiti be. 6 Gè la è leʋeni nuɓusɛ mɔinmɔingaa ʋɔ bɛ, ti zii woo ɠili bosu, ta ti-laawooi ɠaaɠaazu ɓaai, nii ɗɔun è la kwɛni. Tama nà la è leʋena naati ma, ta la woilo è-wooi ma. 7 Kɛlɛ Izilayɛle nuiti ti la kɛa ti ʋa woilo è-woo ma, tɔɔzei ti la pɔ ti ʋa woilo gòo ma. Ti unsuvɔɔʋɛ, ti ɠikpa. 8 Nà è ɠaazuɓaazu ga ti ɠɛʋele, gè è unsuvɔ ga ti ɠɛʋele. 9 Nà è ɠaazuɓaazu ga diamai ɠɛʋele, é ɓaa é leʋe fasai ʋa. Mina lua ti ʋa pa, è zasu mina ɓali ti ɠaazu, anɛɛ ni ta ga kololala nuɓusɛiti.»

10 É ɠɛni mà: «Ɗa ʋe, zunui, kpɔɛiti kpein gè bosu è ma, woilo ti ma ga è-woiyeɠei, è ti makɛ è-yiimaʋɛ ga pagɔ. 11 Li è ma ziiti pɔ bɛ, ti ʋɛ ga kula zou ʋa nuiti. Ti woiloni è-woo ma, ɓaa ti ɠɛlɛni, ɗa ɠɛ ti ma: ‹Maliɠii Ɠɔoɠɔ GALAGI wooi ɠaa.› »

12 Zɛnvui bùzeɠeni zooi ma, gè zɔngɔ woo wolai mɛnini pòluʋelei ga: «Tuya ɠa Ɠɔoɠɔ GALAGI ná-lɛbiyai ʋɛ, ʋɛ é zeini ná!» 13 Gè zɛnvu aniiti koʋegiti tugi mɛnini, ti ɗa loɠa ɓɔɠɔ ʋa, ta naama ɠɔɠɔ ɠiliɠiligiti ti ti ɠoba, naati tugiti, ta zɔngɔ woo wolai. 14 Zɛnvui é bùzeɠeni zooi ma, naa liini ga ze. Ɠɔoɠɔ GALAGI ná-zɛbɛi sòni, gè la zooga gè ʋa ɠula zea. Gè liini, kòozu la nɛɛni, zìiɓɔlɔni. 15 Pele ɠana gè zeelini la kula zou ʋa nuiti pɔ bɛ Tɛle-Avive, ti zeini ziɛ wolai Keɓaal ɠobaʋɛ, mazɔlɔɔ miná ɠa ti zeini ná. Gè kɛɛni ti ʋɔ bɛ ga folo lɔfela, kìdaaʋilini nɔ ti zaama.

GALA goo wo nui é ga gwɛlɛma nui

16 Foloi lɔfelasiɛi ma, Ɠɔoɠɔ GALAGI ɓɔɛni pɔ̀, é ɠɛ mà: 17 «Ɗa ʋe, zunui, gè è ɠɛa ga Izilayɛle nuɓusɛiti maaɓɛɛ nui. Siɛgi zu wooi ta a ɠula la dà, è mɛni, ɗa Izilayɛle nuiti tɛnɛ da bɛ̀. 18 Siɛgi zu gè ɠɛɛzu la faa ɲɔu ɠɛ nui ma: ‹Ɗa ʋaazu zaazu,› ni è la tɛnɛni, ni è la ɓɔɛni è ʋa faa ɲɔu ɠɛ nui naa lɛnɛ, è ʋa bo ma ga é ɓe ná-tuʋa ʋele ɲɔi ʋa, é ʋa zɛnvui wo, naazu faa ɲɔu ɠɛ nui naa ɠa za ná-faaɠaaza golai vaa zu, kɛlɛ nà ná-saa vai ma ungi maaɠaazaɠabo è ma. 19 Kɛlɛ ni ɗa faa ɲɔu ɠɛ nui lɛnɛna, é la ɓeteʋeni ná-faa ɲɔi ʋa ta ná-tuʋa ʋele ɲɔi, toɠa za ná-faaɠaaza golaiti faa zu, kɛlɛ ɗɔun ɗa, ná-kasɔ la laa è unma, è-yɛnvui maazu ɠa ɓaa.

20 «Zenɔ ɠana, ni telebo nui a zeɠena tuʋa ʋele ʋagɔi ʋolu, é ɗa faa ɲɔi ɠɛ, naazu nà kɔɠɔziɠa vai tanigaa la tuɠɔ, ni a zaana tɔɔzei è la tɛnɛni, gaamazu ná-faa ɲɔi vaa ɠa é zaazu su, siɛ ʋele ʋagɔi é boni kaite, nu la mɔ naa ʋɛtɛga, kɛlɛ nà ná-saa vai ma ungi maaɠaazaɠabo è ma. 21 Kɛlɛ ni ɗa telebo nui tɔna tɛnɛna ga é mina faa ɲɔu ɠɛ, tama gaamazu, é la faa ɲɔu nɔpɛ kɛɛni, naazu toɠa zɛnvui wo, ɗa-lɛnɛ gooi maaʋele ma é sogai, naazu ɗa ɓalaa, ɗa è-yɛnvui unmɔɔ.»

Maaɠɛkpɔ siɛgi zu

22 Ɠɔoɠɔ GALAGI yeei ɠɛni bà mɔnɔ naama adaʋɛ, é ɠɛ mà: «Wuzeɠe, ɠula, è li pɛtugi zu, miná ɠa gè ɓɔɛzu ná è ʋɔ.» 23 Gè wuzeɠeni deɠɛmu, gè ɠula, gè li pɛtugi ʋɔ pelei. Ɠɔoɠɔ GALAGI ná-lɛbiyai ɠulani ná kɛlɛma, eɠɛ nɔ ʋelei gè kaani la ziɛ wolai Keɓaal laaʋɛ. Gè looni zooi ma, gè laaʋɛɛ. 24 Zɛnvui ʋaani pɔ̀, é gàalɔ kɔ̀ɠɔiti ga, é ɠɛni mà: «Li, è ɗa-ʋɛlɛi laaɠulu ɓɔɠɔ ma. 25 Ɗa ʋe, zunui, ta galui losu è ʋa miná, ti è ɠili, è la zooga ɗa ʋa ɠula kɛlɛzu ɗa-nuɓusɛiti saama. 26 Nà è-nɛgi ɠatasu è-laaɠoozuʋɛ ʋa, è ɠɛ ga ɓoɓoi, è la zooga è ʋa zelilo niima nuɓusɛiti ma, mazɔlɔɔ ta ga kololala nuɓusɛiti. 27 Kɛlɛ siɛgi zu fai ta a ɠɛ dà la ga gè bo è ma, è bo ti ma, nà kpɔɛ wo zobogi ve è ʋɛ, è ɓɔɛ. Názu ɗa ɓɔɛ ti ʋɔ, è ɠɛ ma: ‹Maliɠii Ɠɔoɠɔ GALAGI wooi ɠaa.› Zɔi é wɔinni é woilo ma, é woilo, zɔi é la wɔinni é ʋa woilo ma, é mina woilo ma. Mazɔlɔɔ ta ga kololala nuɓusɛiti.»