4
Ezekiyɛle ta Zeluzalɛme zei vai kɛlɛ su
1 «Ɗa ʋe, zunui, ɓiliki ɠila seɠe. Da è ɠakalaʋɛ, è taai ma ɠazaʋigi zeɠe ma ga Zeluzalɛme.
2 Naa ʋolu dɛɛ ga seiʋɛ na kɛlɛ su. Nuiti puuzuʋɛti zeɠei zu, naati kpɛtɛ daalɔɠɔma, pɔlɔ ziɠigiti to daalɔɠɔma, kɔɔlaaɠai ʋuuzuʋɛti ta kɔɔɠɔ zɔɔlaiti ti latigai ma.
3 Ɗa kɔlu ɠokolo golai zeɠe niina, è to ga siɠigi wo yɔɠɔzu wa taai. Ɠaazulo taai ʋa, seiʋɛ na kɛlɛ su, ɗa ɠa è seizu kɛlɛ su. Naa ɠa é ga poogi Izilayɛle nuɓusɛiti bɛ.
4 «La naa ʋolu è-ɠɔʋɛi ma, ta è Izilayɛle masadai ná-kotoi ma ɠasɔi la náʋɛ ma. Ta-vaaɠaazagi ma ɠasɔi ɠana è seɠezu foloi liegɔi pɛ daawu è kɛɛzu laani è-yee ɠilagi ma.
5 Nà naama voloi liegɔi laazu è ma, naa ɠa é ga Izilayɛle ná-masadai ná-faaɠaaza golai ma ɠonagi liegɔi. Toɠa ga folo unsaʋagɔ puutaaʋuugɔ (390), naa ɠa è kɛɛzu è ɗa ná-faaɠaaza golaiti ma ɠasɔi zeɠe.
6 Siɛgi zu è naama voloiti kpesu da, ɗa la è-yeezai ma, ɗa Zuda masadai ná-faaɠaaza golai ma ɠasɔi zeɠe folo ʋuunaanigɔ (40) laawu. Folo ɠilagi ɠa é ga kona gilagi ma ɠasɔi gè daazu è unma.
7 Naa ʋolu wɛlɛ Zeluzalɛme ʋa, seiɗai kɛlɛ su, è-yeei maaɲakai letema, è GALA gooi wo daalɔɠɔma.
8 Nà ʋaazu è ɠilizu ga galuiti, ga è mina zoo è ʋa lati, è ʋa zeɠe zɔɔma yeei ma, è ʋa la zɔi ma, eyɛsu è ɗa-zeikɛlɛsu voloiti kpe.
9 «Moloi zeɠe, ta wɔɔlezegi, ta tɔɠɔ ɓaazagi, ta tɔɠɔ ʋɛlɛʋɛlɛgi, ta suzui, naa ʋɛɛ dɔɔlɔi ʋa, ti pɛ kpɔsu, è pu aniɲakai zu, è kpɛtɛ ga ɓului. Tɔ ɠa é ɠɛɛzu ga è-ɠɔnɔgi folo unsaʋagɔ puutaaʋuugɔ (390) kpein daawu, è kɛɛzu laani yee ma.
10 Nii ɗa ɠɛ miizu folo-o-folo, toɠa ɠɛ ga galamu unfelegɔ puufele (220), naa ɠa maanɛai é kula ɠɛ ga ɗe eyɛsu polumai.
11 Ɗa-ɓɔɔle ɗɛi liegɔi ɠa ɠɔɠɔsu, toɠa ɠɛ ga litɛlɛ ɠila ɗɛi folo-o-folo.
12 È-ɠɔnɔgi ɠa ɠɛ eɠɛ wɔɔlezegi ma ɓului, ɗa gee nuɓusɛiti pɛ gaazu, ma abui laai ga nuɓusɛ ɓooi.»
13 Ɠɔoɠɔ GALAGI ɠɛ: «Ʋele ɠana Izilayɛle nuiti ti ʋaazu kɔzɔba laamianigiti miizu la, zou ɠiligiti su, nà ti ɓɛɛna ʋɛti ti liizu náti.»
14 Gè kpeei looni, gè ɠɛ ma: «Ee, Màliɠii Ɠɔoɠɔ GALAGI, kaipa gè la dɛ ɓɔɠɔ ɠɔzɔni! Kaipa mà loungo yee, eyɛsu za, gè la dɛ saa ɓɔɠɔ ʋɛ zua miini, ɓaa suai nii sua ɠili ge paai, kɔzɔba zua nɔpɛ ge la dɛ lɔɔni dàaʋɛ tɛi.»
15 É ɠɛni ma: «Wɛlɛ, gè vaa bu è nuɓusɛ ɓooi maavalibo ga nikɛ zaa ma ɓooi, è abui la ga naa, è ɗa-laamianigi ɠili la.»
16 É ɠɛni mà mɔnɔ: «Ɗa ʋe, zunui, nà daamiani makɛ vaiti koloɠolosu Zeluzalɛme. Ta ɗa daamianigi ɠɔɠɔ ta kpɔɔle ɗɛi pɛ, ti ʋa sɔlɔɔ, ti ɠoozu ɠa ʋili gola.
17 Ɓului ta ziɛi ɠa ʋala ná, ti pɛ ti zasu ɠa ɓali gola, ti ɠilagilagi ɠa vɔ, tɔɔzei ta-ɠotoiti faa ʋa.»