AƁALAME NÁ-FAI
12
(12:1--25:18)
Aɓalame loli fai
1 Ɠɔoɠɔ GALAGI ɠɛni Aɓalame ma: «Zeɠe ɗa-yooi zu, ɗa-wolodai zu, è ɠula è-ɠɛɛ ʋɛlɛi wu, li zooi naa zu, ʋɛ gè ná lɛɛzu ga ɗe.
2 Nà ʋaazu zii wola ɠulazu è zu,
nà tuya loo è ʋɛ, gè è-laaseigi wɔɔlɔ.
Nà tuya loo zɔiti bɛ ga è maaʋele.
3 Nà tuya loo naati bɛ, niiti ta tuya loo è ʋɛ,
nà naati foovo, niiti ta è voovo,
etea ʋɛlɛyeɠei kpein ka tuyai zɔlɔɔ è maaʋele ma.»
4 Aɓalame liini, eɠɛʋelei Ɠɔoɠɔ GALAGI boni ma la, Lɔte ʋilɛni polu. Aɓalame ná-konagi ɠɛni ga puulɔfela maazu lɔɔlugɔ (75), siɛgi zu è ɠulani la Ɠalan taai ʋa.
5 Aɓalame anzai Salayi zeɠeni ta Lɔte, nii é ɠɛni ga deɠe loin, é ʋɛɛ zeaɠɔligiti kpein ba, ta botiɠɛ nuiti, é ti zɔlɔɔni Ɠalan. Ti wuzeɠeni, ti li Kanaan yooi zu. Ti zeeliai ma Kanaan yooi zu,
6 Aɓalame ná zuɓizɛni, eyɛsu é li adaʋɛ ná laaseigi ga Sikɛme, eyɛsu é zeeli Mɔlee, sɛne gului ʋɔ bɛ. Kanaan nuiti ka ti ɠɛni naama yooi zu názu.
7 Ɠɔoɠɔ GALAGI ɠulani kɛlɛma Aɓalame ʋɛ, é ɠɛ ma: «Nà zooi nii veezu è-mavofodai ya.» Aɓalame zalaɠa ɠulazuʋɛ ɓɛtɛni ná Ɠɔoɠɔ GALAGI ʋɛ, nii é ɠulani bɛ kɛlɛma.
8 Naa ʋolu, é zeɠeni ná, é li ga gize yooi zu ʋelei, Ɓeetɛle folo ɠulazu ʋelei. É ná-seɠe ɠotai loni Ɓeetɛle folo liizu ʋelei ti yɔɠɔzuʋɛ ta Ayi, nii é folo ɠulazu ʋelei. É zalaɠa ɠulazuʋɛ ɓɛtɛni ná Ɠɔoɠɔ GALAGI ʋɛ, é wooɠula Ɠɔoɠɔ GALAGI ma.
9 Aɓalame ɠɛni liizu ɓɛkpɛ ga lɛkpɛmaʋɛ nu yeezazu ʋelei.
Aɓalame yeeɠɛɠala go ɠɛɛ vai
Ezipete yooi zu
10 Pului looni zooi zu, Aɓalame yeini Ezipete ga é lago zei ná, mazɔlɔɔ pului wola wɔɔlɔni zooi zu.
11 Siɛgi zu é ɠɛni ʋaazu maaɓuɠazu la Ezipete ʋa, é ɠɛni anzai Salayi ma: «Wɛlɛ, gè kwɛɛ ɗa ga anzanui nii pagai.
12 Siɛgi zu Ezipete nuiti ti è ɠaazu la, ta ɠɛ ma: ‹Anzai ʋe!› Ta pàa, ti è yɛ vulua.
13 Ɗa ɠɛ ti ma mu, ɗa ga bàazeelai, naa ɠa a kɛ ti sò ga pagɔ è maaʋele ma, zɛ̀nvui yɛ zèa è-zaalai zu.»
14 Siɛgi zu Aɓalame zeelini la Ezipete yooi zu, Ezipete nuiti ti kaani ga anzai wola ʋagɛ.
15 Falaɠɔn ná-nu wolaiti ti kaai ma, ti maamusɛni Falaɠɔn ɠaazu. Ti liini ga anzanui masagi ná-pɛlɛi wu.
16 É Aɓalame zoni ga pagɔ anzanui maaʋele ma. Aɓalame togani goiti ta togani wolaiti sɔlɔɔni, naa ʋɛɛ soovalegiti ba, ta botiɠɛ zunuiti ta botiɠɛ anzanuiti, ta soovale saaiti ta ɲɔmɛiti.
17 Kɛlɛ Ɠɔoɠɔ GALAGI maanɔɠɔ vaa wolaiti pɛɛni Falaɠɔn ta ná-pɛlɛyeɠei ʋa, Salayi maaʋele ma, nii é ga Aɓalame anzai.
18 Falaɠɔn zɛba é Aɓalame loli, é ɠɛ ma: «Leeni ɠa è kɛai ga ze? Lee vaa zu è la boni mà ga è-anzai ʋe?
19 Lee vaa zu è ɠɛai mà: ‹Bàazeelai ʋe?› Naa ɠa é kɛai gè seɠeai ga ànza. È-anzai ɠaa niina, seɠena, è li!»
20 Falaɠɔn devei veeni ná-nuiti zea ga ti zɛ ná, é li, ta anzai, é ʋɛɛ naati kpein ba, ti ɠɛni ga nɔnɔ.