26
Izaake ta Aɓimeelɛke ta-vai
1 Pului taɠili ge looni zooi zu, é ɠula zɔi ʋolu, é looni Aɓalaame ná-siɛgi zu. Izaake liini Geelaal, Filiseti nuiti ta-masagi Aɓimeelɛke ʋɔ bɛ.
2 Ɠɔoɠɔ GALAGI ɠulani bɛ kɛlɛma, é ɠɛ ma: «Mina yei Ezipete yooi zu, kɛlɛ zei zooi naa zu, nii gè dɛɛzu ga ɗe.
3 Yeeɠɛɠala ɠɛ niima yooi zu. Nà yɛ è ʋa, gè tuya loo è ʋɛ, mazɔlɔɔ nà niima you yɔɠɔzuʋɛti kpein feezu è ʋɛ, wa è-mavofodai. Nà nà-minazeɠegi zo kpaan, nii gè kɛɛni è-ɠɛɛ Aɓalaame ʋɛ.
4 Nà è-mavofodai mɔin su, eɠɛ geeɠɔlɔgi ma zomideɠaiti, nà niima you yɔɠɔzuʋɛti kpein fe è-mavofodai ya. Eteai zu zii kpein ka tuyai zɔlɔɔ è-mavofodai maaʋele ma.
5 Tɔɔzei Aɓalaame gòoi zoni, é nà-deveiti so, ta tɛnɛgiti gè ti woni la, ta nà-tɔgiti.»
6 Naa ɠa é kɛɛni, Izaake zeini la Geelaal.
7 Siɛgi zu naama adaʋɛ nuiti ti ɠɛni gaazaɠagi wosu da, é lo anzai ʋa, é ɠɛni ɠɛɛzu ti ma: «Bàazeelai ʋe.» É ɠɛni luazu ga a ɠɛɛna anzai ʋe, náʋɛ nuiti ti mina paa Eleɓɛka ná-faa zu, tɔɔzei gola ʋani.
8 Tɛi ná-sei yeeɠɛɠalai zu ɠɛni ɠoozazu náʋɛ, foloi ta ɠɛni de Filiseti nuiti ta-masagi Aɓimeelɛke wɛlɛni fenɛtɛlɛi la, é Izaake ɠa ta anzai Eleɓɛka, ti ɗa zeeʋoegi ɠɛ.
9 Aɓimeelɛke Izaake lolini, é ɠɛ ma: «Gaamai zu, è-anzai ʋe! Lee vaa zu è ɠɛni ma: ‹Bàazeelai ʋe?› » Izaake gooɠaaʋoteni, é ɠɛ ma: «Kpɔ̀ɛʋɛ ɠana, nii a kɛ gè mina za maaʋele zu.»
10 Aɓimeelɛke ɠɛni ma: «Lee ɠa è kɛai ga giye? Ná tago nɔ ɠɛa de nuɓusɛiti saama, zunui taɠila ge ʋa la ga è-anzai, è ɠɛa ʋaazu gi ɠɛɛzu ga sɔba nuiti.»
11 Aɓimeelɛke niima levei veeni nuɓusɛiti kpein zea ga: «Nu nɔpɛ a faa ɲɔu ɠɛɛna ga zunui tɛi ɓaa anzai, ta naama nui ʋaa.»
12 Izaake tii ɠɛni zooi naa zu, é ɓɛtɛ, é ma ʋɛɛda ungilagi (100) zɔlɔɔni naama ɠonagi, mazɔlɔɔ Ɠɔoɠɔ GALAGI tuya looni bɛ.
13 Zunui nii ɓɛtɛni, é ɠɛni liizu nɔ ga ɓɛtɛa, eyɛsu é ɠɛ ga kpɛtɛ nu wola.
14 Togani ɓulugiti ti ɠɛni zea, nikɛiti, baalagiti, boliiti, ta botiɠɛ nu mɔinmɔingiti. Filiseti nuiti ti ɠɛni toloi ɠulazu la.
15 Kɔlɔyeɠeiti kpein kɛɛɠɛ Aɓalaame ná-botiɠɛ nuiti ti ti wɔɔni ná-siɛgi zu, ti naati daaveni ga pɔlɔi.
16 Aɓimeelɛke ɠɛni Izaake ma: «Liina, è zeɠe gi ʋɔ bɛ, mazɔlɔɔ é yeeɠaaɓa, é leʋe gi ʋa.»
17 Izaake zeɠeni ná, é li, é ʋuuzuʋɛ ɠɛ ga Geelaal nɛmɛi zu, miná ɠa é zeini ná.
18 Izaake ziɛyeɠeiti bɔɔni ʋolu ga niinɛ, niiti ti wɔɔni kɛɛɠɛ Aɓalaame ná-siɛgi zu, niiti Filiseti nuiti ti ti laaveni Aɓalaame ná-saai ʋoluma. É naama laaseigiti nɔ ʋɛɛni ti ʋa, niiti kɛɛɠɛ ti ʋɛɛni ti ʋa.
19 Izaake ná-botiɠɛ nuiti ti ta wɔɔni mɔnɔ nɛmɛi zu, ti ziɛungi ɠaani ná.
20 Baala makɛ nuiti ti ɠɛni Geelaal, ti kpɔɛi ʋɛɛni Izaake ná-baala makɛ nuiti ba, ti ɠɛ ma: «Ziɛi ɠa ga gɔnɔ!» É ziɛyeɠei laasei pɛɛni ga Esɛke (nii poluʋɛ ga «maaɠaalii»), tɔɔzei ti kpɔɛi ʋɛɛni ba ziɛyeɠei ná-faa zu.
21 Ná-botiɠɛ nuiti ti ziɛyeɠe ɠili bɔɔni, nii ti sakpeni mɔnɔ ná-faa zu, é daasei pɛɛni ga Sitena (nii poluʋɛ ga «sakpegi»).
22 É zeɠeni miná, é li, é ziɛyeɠei taɠili bɔ, niigi kpɔɛ vaa la ɠɛni wuzeɠeni, é ʋa lo ba. É naa laasei pɛɛni ga Leɠɔɓɔte (nii poluʋɛ ga «suwɔɔlɔa»), mazɔlɔɔ é ɠɛni ma: «Niizu, Ɠɔoɠɔ GALAGI suwɔɔlɔa gi ʋɛ, gi undaa ɠa nɛɛ zooi zu niina.»
23 É zeɠeni ná, é lɛ ga Ɓeel-Seeɓa ʋele.
24 Ɠɔoɠɔ GALAGI ɠulani bɛ kɛlɛma naama ɓidii, é ɠɛ ma: «Nà ɠa gè ga è-ɠɛɛ Aɓalaame ná-GALAGI. Mina lua, mazɔlɔɔ nà è ʋa. Nà tuya loozu è ʋɛ, gè è-mavofodai mɔinzu su nà-botiɠɛ nui Aɓalaame maaʋele ma.»
25 Izaake zalaɠa ɠulazuʋɛ loni náʋɛ, é wooɠula Ɠɔoɠɔ GALAGI ma. É ná-seɠe ɠotai loni ná ɓalaa. Ná-botiɠɛ nuiti ti ziɛyeɠe ɠila bɔɔni ná.
26 Aɓimeelɛke ʋaani pɔ bɛ, é zeɠe Geelaal, ta ná-tɛnɛ bo nui Aɠuzate, ta Pikɔle, nii é ɠɛni ga ná-kɔɔɠɔ ɠundiɠii.
27 Izaake ɠɛni ti ma: «Lee vaa zu wo ʋaazu pɔ̀, tama wo ɗa wɔ̀inzeɠe, wo ɗa kpɛ̀ wo ʋɔ bɛti?»
28 Ti gooɠaaʋoteni, ti ɠɛ ma: «Gá pɛtɛsu ga Ɠɔoɠɔ GALAGI ɠa è ʋa. Naa ɠa é ba, gi ɠɛɛzu, minazeɠegi ɠɛ ade yɔɠɔzu, gá-o, ɗa-o, ade minazeɠe ɓɔɠɔ ʋɛ.
29 Ɗa ɠonazu ga è la faa ɲɔu nɔpɛ kɛa ga giye, eɠɛʋelei gi la è zopele ɲɔuni la ɲɛgɛlɛin, kɛni faa ʋagɔi nɔ ɠa gi kɛa è ʋɛ, gi è yɛni ná, è li ziilɛigi zu. Ɗɛi è tuyai zɔlɔɔgai Ɠɔoɠɔ GALAGI ya.»
30 Izaake daamii ɠɛʋele ɓɛtɛni ti ʋɛ. Ti laamiini, ti ɓɔɔle.
31 Ti wuzeɠeni sobuzobui, ti ɠona ɓɔɠɔ ʋɛ. Naa ʋolu Izaake valini ti ma, ti li ziilɛigi zu.
32 Naama voloi nɔ zu, Izaake ná-botiɠɛ nuiti ti ʋaani, ti ʋoluvaawo ma, é lo kɔlɔyeɠei ʋa, ti ɠɛni bɔɔzu, ti ɠɛ ma: «Gi ziɛi ɠaaʋɛ.»
33 Izaake daasei pɛɛni ga Siɓa (nii poluʋɛ ga «minazeɠegi»). Naa ɠa é ba, ti taai laasei pɛai ga Ɓeel-Seeɓa (nii poluʋɛ ga «minazeɠe kɔlɔyeɠei»), eyɛsu zaaɠaza.
Ezawu ná-vulu ɠɛɛ vaiti
34 Ezawu ná-konagi ɠɛai ma ga puunaanigɔ (40), é Ɠɛte nui Ɓeeli ná-doun anzanui Zudite zeɠeni ga anza, ta Ɠɛte nui Elon ná-doun anzanui Ɓasemate.
35 Ti felegɔ pɛ ti ɠɛni Izaake ta Eleɓɛkani ziiɓɔlɔzu ti ɠoozu.