32
1 Laɓan wuzeɠeni ga sobuzobui, é ná-dounlointi ta ná-doun anzanuiti nɛɛnɛ, é tuya loo ti ʋɛ. Naa ʋolu é ɠale ma, é li zeizuʋɛ.
Zakɔɓe ɠɛʋele ɓɛtɛ vai ga
ti ɠomi ta Ezawu
2 Zakɔɓe ʋilɛni pelei zu, é ɗa li. GALA ná-geezuɠeelaiti ti ʋaani, ti daaɠomi.
3 Zakɔɓe ti ɠaai ma, é ɠɛni ma: «GALA ná-kɔɔlaɠai ɠa!» É naama adaʋɛ laasei pɛɛni ga Maɠanayime (nii poluʋɛ ga «kɔɔlaɠa felegɔi»).
4 Zakɔɓe keelaiti teʋeni luɠɔ diɛ Ezawu ma, Seyiil yooi zu, Edɔme ɠoʋii zu.
5 É devei nii veeni ti ya, é ɠɛ ti ma: «Wɛlɛ nii ɠa wa bo màliɠii Ezawu ma: ‹Pele ɠa ɗa-wotiɠɛ nui Zakɔɓe ɓɔɛzu la: Gè zeini Laɓan ʋɔ bɛ, zɛ̀gɛ ná eyɛsu niizu zeeli.
6 Nikɛiti ta zèa, ta soovalegiti, ta baalagiti, ta botiɠɛ zunuiti, ta botiɠɛ anzanuiti. Gè keelaiti teʋegɛ ga ti naama wooi laazeeli è ma, màliɠii, naa ɠa a kɛ gè zaalai zɔlɔɔ è ɠaazu.› »
7 Keelaiti ti ɠaleni ma Zakɔɓe ʋɔ bɛ, ti ɠɛ ma: «Gi liiʋɛ è-liɛ Ezawu ʋɔ bɛ, ta ʋaazu è laaɠomisu, ta zunu unnaanigɔ (400).»
8 Zakɔɓe wola luani, zii ɗa zoolɛ. Nuiti ti ɠɛni polu, é naati balini su ga seizu felegɔ, é ʋɛɛ baalagiti ba, ta nikɛiti, ta ɲɔmɛiti.
9 É ɠɛni ma: «Ni Ezawu a ʋaana, é seizu ɠilagi zo, zɔi é yɛsu ná, naa ɠa zoo é ʋela.»
10 Naa ʋoluma Zakɔɓe maanɛɛnɛi woni, é ɠɛ ma: «Kɛ̀ɛ Aɓalaame ná-GALAGI, ta kɛ̀ɛ Izaake ná-GALAGI, Ɠɔoɠɔ GALAGI, ɗɛi è ɠɛni mà: ‹Ɠalena ma ɗa-yooi zu, ɗa-ʋɛlɛyeɠei wu, nà faa ʋagɔ ɠɛʋele ɓɛtɛzu è ʋɛ.›
11 Gè la kulani su, gè ʋa nuɓɔɠɔlai kpein sɔlɔɔ, ta wooɠɛɠiladai kpein nii è kɛa nɔ̀un tetema, nɛ̀i gè ga ɗa-wotiɠɛ nui, mazɔlɔɔ kɛ̀ai ma Zuludɛn tɛi kpudɛzu, nà-tukpɔi nɔ ɠa é ɠɛni zèa, kɛlɛ niizu, nà niina nuɓusɛ ʋɛbɛ zeizu felegɔ unda.
12 Nà è maanɛɛnɛzu, kìzo, è kùla dìɛ Ezawu ya. Mazɔlɔɔ nà luazu ga é mina ʋa, é ʋa pàa, gá doun deeiti ta dointi.
13 Ɗa ma, è ɠɛni mà: ‹Nà faa ʋagɔ ɠɛʋele ɓɛtɛzu è ʋɛ, gè è-mavofodai ɠɛ eɠɛ kpoloɗɛi ɠoba ɲaɠaegi, é wola mɔin su, nu la zooga é ʋa gaalu.› »
14 Naama adaʋɛ tɔna ka Zakɔɓe ɲiini ná. Nii é ʋaani la ga kɔligi, é naa ta zeɠeni ba ga ɓɔɠɔ maazoloogi, é teʋe diɛ Ezawu ʋɔ:
15 boli zaa unfelegɔ (200) ta boli zinɛ ʋuufelegɔ (20), baala saa unfelegɔ (200) ta baala sinɛ wola ʋuufelegɔ (20),
16 ɲɔmɛ zaa ʋuusaʋagɔ (30), é ʋɛɛ ti-yiʋoiti ba, ti ɠɛni ɲiimii ɓɔlezu, nikɛ zaa ʋuunaanigɔ (30) ta nikɛ zinɛ puugɔ (10), soovale saa ʋuufelegɔ (30) ta soovale sinɛ puugɔ (10).
17 É ti ɠalivaani ná-botiɠɛ nuiti ma, togani ɓulugi yeeɠaaɠwɛa ɠɛni de su kpɛkpɛ. É ɠɛni ná-botiɠɛ nuiti ma: «À leʋe tùɠɔ, wo zɔɠɔzu ɠɛ togani ɓulugi ɠilagilagi ʋa.»
18 É niima levei veeni ma mɔungi ya, ga: «Siɛgi zu dìɛ Ezawu wo laaɠomisu da, é wo ɠaazaɠa ga: ‹Ɗa ga ɓɛ ná-nu? Mini ɠa è liizu ná?› A ɠɛna ma: ‹Ɓɛ nɔnɔ ɠa ga togani ɓulugi, nii é è ɠakala?›
19 ɗa gooɠaaʋote ga: ‹Ɗa-wotiɠɛ nui Zakɔɓe nɔnɔi ʋe, é teʋegɛ màliɠii Ezawu ma ga sabai. Wɛlɛ tɔ ɓɔɠɔgoi ʋa, é ʋaazu gi ʋolu ʋelei.› »
20 Naama leve ɠilagi nɔ ɠa é feeni felesiɛi ya, ta saʋasiɛi, ta naati kpein niiti ti ʋilɛni togani ɓulugiti polu, é ɠɛ ti ma: «Ʋele ɠana wa ɓɔɛ la Ezawu ʋɔ, siɛgi zu wa ɠomina da.
21 Wa ɠɛɛzu ma ɓalaa: ‹Wɛlɛ, ɗa-wotiɠɛ nui Zakɔɓe ʋa, é ʋaazu gi ʋolu ʋelei.› » Mazɔlɔɔ é ɠɛni ɠɛɛzu ma: «Nà ziilɛizu ga ɓɔɠɔ maazoloo ganii, nii é liizu tùɠɔ, naa ʋolu nà gaazuʋɛ ʋɛtɛ niina, tanisu toɠa yeezei bù ga pagɔ.»
22 Ɓɔɠɔ maazoloo ganiiti ti liini tuɠɔ ʋelei, tɔ ɓɔɠɔi ɲiini kotai wu naama ɓidii.
23 É wuzeɠeni naama ɓidii nɔ, é li ga anza felegɔiti, ta botiɠɛ anzanu felegɔiti, ta ná-doun puugɔ maazu ɠilagiti (11), é ɓudɛ ziɛ wolai Yaɓɔke maaleʋesuʋɛ.
24 É ti zeɠeni, é ti ɓudɛ ziɛ wolai maazu, nii kpein é ɠɛni ga nɔnɔ, é naa pɛ kpudɛni.
Zakɔɓe ná-ɲɛpi ɠɔɔ vai
25 Zakɔɓe ɠila ko yɛni ná. Ti kɔɔni naazu ta zunui ta, eyɛsu geelaalao.
26 Zunui kaai ma ga é la ziɛzu Zakɔɓe wu, é doɠani kpala ɠaei losuʋɛ kpoɠi ɠaei ʋa. Kpala ɠaei ziɛni su kpoɠi ɠaei losuʋɛ, siɛgi zu ti ɠɛni ɲɛpii ɠɔɔzu la.
27 Zunui ɠɛni Zakɔɓe ma: «Ɓena bà, gè li, mazɔlɔɔ woza ɠana ɠala.» Zakɔɓe gooɠaaʋoteni, é ɠɛ ma: «Gè la ɓesu è ʋa pɛ, è ʋa li, ni è la tuya looni bɛ̀.»
28 Zunui ɠɛni ma: «È-laaseigi ɠa ga lee?» É gooɠaaʋoteni, é ɠɛ ma: «Zakɔɓe.»
29 Zunui ɠɛni ma mɔnɔ: «È-laaseigi la mɔ ga Zakɔɓe, kɛlɛ toɠa na ga Izelayɛle, mazɔlɔɔ è ɲɛpii ɠɔa GALA daalɔɠɔma, ta nuiti, è pilɛ sɔlɔɔga.»
30 Zakɔɓe gaazaɠani, é ɠɛ ma: «Nà è maanɛɛnɛzu, è-laaseigi lɛ ga ze.» É gooɠaaʋoteni ga: «Leeni vaa zu è dàaseigi maaɠaazaɠabosu?» É tuya looni bɛ náʋɛ nɔ.
31 Zakɔɓe naama adaʋɛ laasei pɛɛni ga Penuwele, mazɔlɔɔ é ɠɛni ma: «Gè GALA kaaʋɛ ga ɠaazuni ta ɠaazu, zɛ̀nvui ɠizo.»
32 Foloi lɛɛni niina, siɛgi zu é ɠɛni leʋesu la Penuwele ʋa. Zakɔɓe ɠɛni lɛkpuzu, é ɗa yei ɓalai ma fifi.
33 Naa ɠa é ba, zaaɠaza, Izelayɛle nuiti ti la ɗa ga sua ɲatai mia, nii é kpalai zu, é lɛɛzu kpoɠi ɠaei lodazuʋɛ, mazɔlɔɔ Zakɔɓe loɠani ɲatai ʋa, é kpala ɠaei lodazuʋɛ.