7
Nowe lɛɛ vai keingi zu
ta ziɛve golai ʋaa vai
1 Ɠɔoɠɔ GALAGI ɠɛni Nowe ma: «Lɛ keingi zu, ɗa-o, ɗa-ʋɛlɛyeɠei-yo, mazɔlɔɔ gè è ʋɛtɛgɛ ga telebo nu niima yeeɠɛɠalai zu nuɓusɛiti saama.
2 Suai niiti ti ɲadegai, ɗa ma zii ɠilagilagi zeɠe, ma zinɛ lɔfela, ta ma zaa lɔfela, kɛlɛ suai niiti ti ɠɔzɔai, ɗa naama zii ɠɛ ga ma zinɛ ta ma zaa nɔ.
3 Wɔniiti ɓalaa, ɗa ma zii ɠilagilagi zeɠe, ma zinɛ lɔfela, ta ma zaa lɔfela, naa ɠa a kɛ è ti-ma zuwui makɛ eteai zu ná pɛ.
4 Mazɔlɔɔ é yɛga ga folo lɔfela, gè tonai ʋu eteai zu, folo ʋuunaanigɔ (40) ta kpidi ʋuunaanigɔ (40) laawu, fuluaniiti kpein gè ti ɓɛtɛai, gè ti-ma zuwu ɠaaleʋe zooi ɠa.»
5 Nowe naa kpein kɛɛni, nii Ɠɔoɠɔ GALAGI ma levei veeni zea.
6 Nowe kona undɔzita (600) zɔlɔɔni niina, siɛgi zu ziɛve golai ʋaani la eteai zu.
7 Nowe lɛɛni keingi zu ta ná-doun zunuiti, ta anzai, ta ná-doun anzaiti, ga ti ɠizo ziɛve golai ma.
8 Suai niiti saama, ti ɲadegai, ta niiti ti ɠɔzɔai, naa ʋɛɛ wɔniiti kpein ba, ta suai niiti kpein ti ɓokposu zooi ma,
9 ti kpein ti zeelini Nowe ma keingi ʋɔ bɛ ga felefelegi, ma zinɛ ɠila ta ma zaa ɠila, eɠɛʋelei GALA ge ma levei veeni la Nowe ya.
10 Folo lɔfela ʋoluma, ziɛve golai eteai maaɓɔɔleni.
11 Nowe zii ma ɠona undɔzitai (600), ma alu felesiɛi, ma volo puugɔ maazu lɔfelasiɛi (17) ma, naama voloi zooi wu ɗɛ wolaiti ma ɗɛungiti kpein daaleʋeni, ta geeɠɔlɔgi ma ʋɛlɛlaʋɛti ɓalaa daalaoni.
12 Tonai tɔɔzeini ga ʋua eteai zu, eyɛsu folo ʋuunaanigɔ (40) ta kpidi ʋuunaanigɔ (40).
13 Naama voloi ɓɔɠɔi nɔ ɠa Noweni ti lɛɛni la keingi zu, tɔun be, Sɛme ʋe, Same ʋe, ta Zafɛte, é ɓɔ anzai ʋa ta ná-doun anza saʋagɔiti,
14 naa ʋɛɛ dɔɓɔ zuai ma zii kpein ba, ta toganiiti, ta aniiti kpein ti ɓokposu zooi ma, é ɓɔ wɔniiti kpein ba, ta koʋe ganiiti kpein.
15 Anii vului ma ziiti kpein, ma zinɛ ma zaa, ti ʋaani ga felefelegi Nowe ʋɔ bɛ, ga ti lɛ keingi zu.
16 Ti ɠilagilagi lɛɛni ma zinɛ ma zaa, ti ma ziiti kɛʋelei, eɠɛʋelei GALA ge ma levei veeni la Nowe ya. Naa ʋolu Ɠɔoɠɔ GALAGI daaɠuluni ma.
17 Ziɛve golai yɛni lɛɛzu, é kɛ ga folo ʋuunaanigɔ (40) eteai zu. Ziɛi veni, é keingi wuzeɠe zooi maazu.
18 Ziɛi veni, é wola lɛ su eteai zu. Keingi ɠɛni ziɛzu ziɛi ɠa.
19 Ziɛi ɠɛni lɛɛzu su nɔ, eyɛsu é gize ɠaaɠoozagiti pɛ maaɓɔɔle geeɠɔlɔgi wu eteai zu ná pɛ.
20 Ziɛi lɛɛni gizeiti maazu ga mɛtɛlɛ lɔfela ɠɛɠala, ti pɛ maalɔɔɠuni.
21 Nii kpein é ɠɛni ga fuluanii eteai zu, ti pɛ ti zaani, wɔniiti, toganiiti, dɔɓɔ zuaiti, nii kpein é ɠɛni ɓokposu, ta nuɓusɛi kpein.
22 Nii kpein é ɠɛni yɛnvuzu zou vɔɔi ma, naa pɛ ge zaani.
23 GALA ge fuluanii kpein suwuɠaaleʋeni zooi ɠa: nuɓusɛi ta suaiti, naa ʋɛɛ kpokpo ganiiti ta wɔniiti ba. Nowe nɔ ɠa é yɛni ná, ta niiti ti ɠɛni ba keingi zu.
24 Ziɛvegi yɛni eteai zu eyɛsu folo ungila folo ʋuulɔɔlugɔ (150).