1 Naa ɠa é kɛɛni, gi la mɔ ɠɛni zooga gi ʋa maaɓɔun kili bo, gi deveni ga giya ɠila, gi yɛ Atɛne. 2 Gi Timɔte leʋeni wo ma, ade-ɠɛɛloin, nii ti botii ɠɛɛzu ʋɔɔma ta GALA, é ɗa Woo Niinɛ Ʋagɔi laazeeli é ʋilɛ Kilista ʋa. Gi teʋeni wo ma, ga é wo zɛbɛlɔ, é wo iɲɔdɔ wa-ɠidaaleʋei zu, 3 naa ɠa a kɛ, wo zaama, nu nɔpɛ ge mina ɲiikpi kpɔlɔiti maaʋele ma, nii ade sɔlɔɔsu. Mazɔlɔɔ wa ɓɔɠɔi wo suɠwɛɛ ga GALA ka é naa leveai ade ma. 4 Siɛgi zu gi ɠɛni la wo ʋɔ bɛ, gi boni wo ma ma yeeluɠɔ, ga kpɔlɔiti ta zeeli ade ma. Naa ma ka kɛai, wo naa zuɠwɛɛ. 5 Naa ɠa é ba, gè la mɔ ɠɛni zooga gè ʋa maaɓɔun kili bo, gè Timɔte leʋeni, é ʋa, é ɠi sɔlɔɔ wa-ɠidaaleʋe vai ma. Gè luani ga tɛga nui mina ɠɛ wo lɛɛni ga, gá-wotii kpein ge mina ɠɛ ga wafuun faa.

6 Kɛlɛ Timɔte ʋaai ma gi ʋɔ bɛ, é zeɠe wo ʋɔ bɛ, é wa-ɠidaaleʋei ta wa-nɛɛbɛi ma woo ʋagɔi woni gi ma. É boni gi ma ga wa ɠizɛsu gi zu ga pagɔ yeenɔpɛ, wɔin ɠa wo ma gola ga wo gi ʋɛtɛ, eɠɛʋelei wɔin gi ma la ga gi wo ʋɛtɛ. 7 Naa maaʋele ma, kɛ̀ɛleaiti, gá-ɠidaaʋili faiti saama, ta gá-ɓɔlɔiti, gi iɲɔ ge lɔɔni wa-vaa zu. Wa-ɠidaaleʋei ɠa é gi iɲɔdɔɔni. 8 Niizu gá dɛ yɛnvuzu ʋolu, tɔɔzei wa loni kpaan wa-ɠilibalai zu wa Maliɠii. 9 Gá zoo GALA mamasu ɠale wa-vaa zu, é kula ɠɛ su, tɔɔzei koozunɛɛi liegɔi ʋa gi sɔlɔɔsu ada-ƓALAGI ɠaazu wa-vaa zu? 10 Kpidi ʋɛɛ folo ʋa, gá maanɛɛnɛzu gola ga é ɓɔ gi ʋa, gi wo ɠa, gi naa la wa-ɠidaaleʋei ma, nii a ɓɔ ba daazeeli.

11 GALA ɓɔɠɔgoi, é ga ade-Ɠɛɛ, ta de-Maliɠii Yesu, gá-ʋelei ɓɛtɛ, é lo wo ʋa! 12 Maliɠii yɛ wa-nɛɛbɛi zuwɔɔlɔzu yeenɔpɛ, nii é wo yɔɠɔzu wo ɠilagilagiti ta nuɓusɛi zɔiti pɛ tetema, é kɛ ga nɛɛbɛi naa ɠɛʋele, nii é gi-yiimaʋɛ wa-vaa zu. 13 É wo zɛbɛlɔ wo-yiimaʋɛti, wo ɠɛ ga nu ɲadegaiti, peelalazu nɔpɛ ge mina ɠɛ wo ʋa GALA gaazu, é ga ade-Ɠɛɛ, siɛgi zu ade-Maliɠii Yesu ʋaazu la, ta ná-nuiti.