Zan Ná-Sɛʋɛ Mɔungi
Sɛʋɛi lɔɔzeizuʋɛ ma woo mɔungiti
GALA keelai Zan ɠa é Zan Ná-Sɛʋɛ Mɔungi zɛʋɛai kona ʋuulɔsaʋa maazu lɔɔlugɔi zɔɠɔzuʋɛ ta puutaaʋuugɔi (85-90), Kilista zɔlɔɔgai ʋoluma. Zan la ɓɔɠɔ lɛɛni ga tɔ ɠa é sɛʋɛi ɠɛai, kɛlɛ gaaɠwɛsu mɔungi ɠa dɛɛzu ga é ɠɛni ga Yesu ná-eteai ta buzeɠe vai é ɠula saai ya naama zeele ɠiteɠitegi ta (1:1-3). Zan Ná-Sɛʋɛ Mɔungi ɠɛɛ ʋelei wola ɠulaʋɛ ga Zan ná-Woo Niinɛ Ʋagɔi zɛʋɛ ʋelei. Kisiɛi wogɛ ga Zan ɠa é Woo Niinɛ Ʋagɔi zɛʋɛa, naa ʋɛɛ Zan Ná-Sɛʋɛ Mɔungi, Felesiɛi, ta Saʋasiɛi ʋa, siɛgi zu é ɠɛni la Efɛze.
Zan sɛʋɛi nii ɠɛɛni keletiɛinti pɛ ma siɛgi ta zu, yeeɠɛɠalai ta nii Egilisii ɠɛni kpɔlɔi zɔlɔɔsu da, kpɔgi ta yea nii daaseigi ɠɛni ga «Ɲɔsetike». Naama nuiti kidaaleʋeni ga Yesu ɠɛni nɔ ɲɛgɛlɛin ga GALA, kɛlɛ é la ɠɛni ga nu vulu kɔlɔ ge ʋa ɠɛ ma ta ɲama ʋa ɠɛ su, siɛgi zu é ɠɛni la zooi ma. Naa maaʋele ɠa é kɛa Zan sɛʋɛi ɠɛai la, é dɛɛ ga é ɠɛni ga Yesu ná-eteai ma zeele ɠiteɠitegi ta, ta tɔ ɓɔɠɔi fɔɔɠuʋɛ naa ʋa ga kpɔɠɔ yeeiti (1:1-3). Sɛʋɛi nii ɠɛɛ ungi Zan ʋɛ, naa ɠa ga ada-ɠoozunɛɛi laazeeli (1:4), pele leʋe kidaaleʋe nuiti tuɠɔ kotoi ɠɛɛ vai zu (2:1), é ɓaa kidaaleʋe nuiti maazu zɛɛ ɠalabo peleiti daalɔɠɔma (2:26), ta é ladalai ve kidaaleʋe nuiti zea ga ɠɔoɠɔ zɛnvui ɠa ti ya (5:13).
Unsosuʋɛ
1. Zan ná-sɛʋɛi lɔɔzeizuʋɛ lɛɛʋɛ, naa ʋoluma é ná-sɛʋɛi ɠɛɛ ungi lɛɛ (1:1-4).
2. É naa yɔɠɔzuʋɛ zuɠula, ʋelei GALA ge la ga wozakalagi, ta é dɛɛ ga ade maanɛɛʋɛ ga ade eteai ziɛ ʋelei Yesu kɛɛni la (1:5—3:10).
3. Naa ʋolu é ade ɠitoo devei naa zu, nii é ga ade ɓɔɠɔ nɛɛ vai ʋɛ de ɠilagilagi pɛ (3:11—5:12).
4. É ná-sɛʋɛi ɠaaɓelagɛ (5:13-21).
1
Zɛnvu Wooi
1 Gá Zɛnvu Wooi ná-fai laazeelizu wo ma, nii é ɠɛni ná tɔɔzeizu mɔunpa. Gi gooi mɛnini, gi ka ga ɠaazuʋɛ, gi maaɓɛ ga pagɔ, gi-yeeiti fɔɔɠu ba.
2 Zɔi é ga zɛnvui, é ɠulani kɛlɛma, gi ka, gá ɓɔɛzu bɛ ga zeeleiti, ɠɔoɠɔ zɛnvui ná-fai ɠa gi daazeelizu wo ma, nii é ɠɛni Ɠɛɛɠɛ ʋɔ bɛ, é ɠulani kɛlɛma gi ʋɛ.
3 Ungo, nii gi kaani, gi mɛni, naa ɠa gi daazeelizu wo ma, wa ɓalaagi, naa ɠa a kɛ wo ɠili gi ʋa kpɔfaamai zu, é gi yɔɠɔzu gá Ɠɛɛɠɛ ta ná-Doun Zunui Yesu Kilista.
4 Gá niima vaiti sɛʋɛzu, naa ɠa a kɛ gá-ɠoozunɛɛi laazeeli ga pagɔ.
GALA ka ga wozakalagi
5 Wɛlɛ niima ɠeela wooi ɠa gi mɛnini Yesu Kilista la, ta gi daazeelizu wo ma. Naa ɠa ga, GALA ka ga wozakalagi, kpidi ɠila kpalaa ge la su.
6 Ni ada ɠɛɛna ma, da kpɔfaamai zu da tɔun, tama de ɗa ziɛ kpidii zu, da zɛɛi wosu, de la ziɛzu ga gaamai.
7 Kɛlɛ ni da ziɛzu wozakalagi zu, eɠɛʋelei GALA ɓɔɠɔi la wozakalagi zu, naazu da kpɔfaamai zu de ɠilagilagi, ná-Doun Zunui Yesu ma ɲamai ɠa kotoiti pɛ gba de ʋa.
8 Ni da ɠɛɛna ma, koto nɔpɛ ge la de ʋa, da ɓɔɠɔ yaavazu da ɓɔɠɔi, gaama nɔpɛ ge la de ya.
9 Ni da laana zɔ ga ga da-ɠotoiti, toɠa ga wooɠɛɠila nu ta telebo nu, é da-ɠotoiti suvaayɛ de ʋɛ, é telebotalai pɛ gba de ʋa.
10 Ni da ɠɛɛna ma, de la koto ɠɛɛni, da tɔun kɛɛzu ga zɛɛ nu, daawooi la de-yiimaʋɛ.