20
Maaʋela wo taa lɔzitaiti
(Gaalu Sɛʋɛi 35:9-34;
Tɔ Sɛʋɛi Velesiɛ 4:41-43;
19:1-13)
1 Ɠɔoɠɔ GALAGI ɓɔɛni Zozuwe ʋɔ, é ɠɛ ma:
2 «Ɓɔɛ Izelayɛle nuiti pɔ, è ɠɛ ti ma: ‹À taaiti kpɛtɛ ɓɔɠɔ ʋɛ ga maaʋela laaiti, nii gè ma vai woni wo ma ga Moize maaʋele.
3 Nu ʋaa nui nii a nu ʋaana, é la gaaɠilini ma, é ga teʋezea vaa nɔ, toɠa zoo é ʋela, é li ná. Toɠa ɠɛ ga wo-ʋelazuʋɛ, ɲamai ʋotokula nui ʋa.
4 Nu ʋaa nui ɠa ʋela, é li ma laai taɠila su, toɠa lo siɠidaʋɛ, é ná-fai lɛ ga taa ɠundiɠiiti. Naati ta yeezei bu, é yɛ ti ʋɔ bɛ taazuʋɛ, ti ada ve zea, ʋɛ a yɛ ná.
5 Ɲamai ʋotokula nui a ʋilɛna polu, ti la nu ʋaa nui vea zea. Mazɔlɔɔ é la gaaɠilini ma, é ʋa seiɲɔɠɔi ʋa, é la ɠɛni ga naa zili nu pɔlɔma zu.
6 Toɠa yɛ naama laazuʋɛ, eyɛsu é ɠula kɛlɛma nuɓusɛiti gaazu, ti ná-tukpɔi ɠaaleʋe, ɓaa eyɛsu zalaɠa ɠula ɠundiɠi wolai, nii é botii zu naama yeeɠɛɠalai, naa za. Naama ziɛgi zu ɠa nu ʋaa nui a ɠale ma la ná-pɛlɛi wu, ná-taazuʋɛ, ʋɛ é ʋelani, é zeɠe ná.› »
7 Ti yiimazeɠeni ga Keedɛse, taai nii é Galilee, Nɛfetali ɠize yooi zu, ta Sikɛme, nii é Efelayime ɠize yooi zu, ta Kiliyate-Aaleɓa, nii é lolisu ɓalaa ga Ɠeeɓelɔn, é Zuda ɠize yooi zu.
8 Zuludɛn ʋoluʋɛ, Zeeliko folo ɠulazu ʋelei, ti yeeloni Ɓeesɛɛl ʋa, é zɛlɛni teʋebai maazu, Luɓɛn yooi zu, ta Lamɔte, nii é Galaade, Gade yooi zu, ta Gɔlan, nii é Ɓasan, Manasee yooi zu.
9 Taaiti kana, ti yeeloni ti ʋa, ti ɠɛ ga maaʋela laaiti, Izelayɛle nuiti bɛ, ta seikɔɠɔma nuiti ta ɠɛ ti zaama, nu-o-nu nii a nu ʋaana, é la gaaɠilini ma, naa ɠa zoo é ʋela, é li ná, ɲamai ʋotokula nui la pa, aisa é ʋa ɠula kɛlɛma nuɓusɛiti gaazu, ná-tukpɔi ɠaa ʋa leʋe.