12
Miliyame ta Aalɔn
ti vaa vai Moize ma
1 Moize Kuse anzanui ta zeɠeni ga anza. Miliyame ta Aalɔn ti ɠɛni vaazu ma.
2 Ti ɠɛni ma: «Moize ɠila nɔ lɛi Ɠɔoɠɔ GALAGI ɓɔɛai pɔ! Kpɔɛʋɛ gá ɓalaagi gi ʋɔ!» Ɠɔoɠɔ GALAGI ti-wooi mɛnini.
3 Tama Moize ɠɛni ga ɓɔɠɔmaayei nu gola, é leʋe nui pɛ ba eteai zu.
4 Gaamago nɔ, Ɠɔoɠɔ GALAGI Moize lolini, naa ʋɛɛ Aalɔn ʋa, ta Miliyame, é ɠɛ ti ma: «À ɠomi, wo saʋagɔ, GALA daaɠomi seɠe ʋɛlɛi ʋɔ bɛ.» Ti liini ná.
5 Ɠɔoɠɔ GALAGI yeini tonaɓiingi zu, é lo seɠe ʋɛlɛi laaʋɛ maazuʋɛ. É Aalɔn ta Miliyameni tolini. Ti felegɔ ti ʋaani.
6 É ɠɛni ti ma: «À woilo, nii é bɛ̀, gè bo wo ma! Siɛgi zu GALA goo wo nu a ɠɛna la wo zaama, nà, Ɠɔoɠɔ GALAGI, nà ɗa ɓɔɠɔ lɛɛ la kulakɛlɛmai zu, gè ɓɔɛ pɔ segi zu.
7 Kɛlɛ é la ɠana ga nà-botiɠɛ nui Moize, nii é ga lada nui nà-pɛlɛwu vai kpein su.
8 Nà ɗa ɓɔɛ pɔ ga wooi koleai, faa zuɓidi laade, gè ɓɔɠɔ lɛɛ la, é kà. Lee vaa zu wo la luani, wo ɗa va nà-botiɠɛ nui Moize ma?»
9 Ɠɔoɠɔ GALAGI yiiɠaawanani ti laalɔɠɔma, é li.
10 Tonaɓiingi zeɠeni nɔ feya seɠe ʋɛlɛi maazuʋɛ, geei ʋɛɛ Miliyame ma mɛɛ, koleai eɠɛ kobe kolegi. Aalɔn wɛlɛni ba, é ka ga é ɠɛa ga gee nu.
11 Aalɔn ɠɛni Moize ma: «Soma màliɠii, è mina gá-ɠotoi ma ɠasɔi la gi unma, gi kɛai ɠimalalai zu!
12 Ee, de-ʋaazeelai mina ɠɛ eɠɛ doin saai, é ʋa zɔlɔɔ, nii kpusɛi ta luulaai, aisa é ʋa zɔlɔɔ.»
13 Moize wooɠulani Ɠɔoɠɔ GALAGI ma, é ɠɛ ma: «Ee, GALA, nà è maanɛɛnɛzu, kɛdɛ!»
14 Ɠɔoɠɔ GALAGI ɠɛni Moize ma: «Ni kɛɛɠɛ a la ɠɛni laaɗɛi ʋuuni gaazuʋɛ, é la ɓena yɛ ma unfegi zu, eyɛsu folo lɔfela? À kpɛ, é ɠula wo-ʋuuzuʋɛ ʋa, é kɛ su ga folo lɔfela, naa ʋoluma, wa yeezei bu niina, é ʋa wo zaama.»
15 Miliyame ɠulani ti-ʋuuzuʋɛ ʋa, é kɛ ga folo lɔfela. Nuɓusɛiti ti yɛni ti-ʋuuzuʋɛ, eyɛsu é ʋa, é lɔ ti zaama mɔnɔ.
16 Naa ʋoluma, ti zeɠeni Ɠaseelɔte, ti li, ti ʋu Palan teʋebai zu.