18
Zalaɠa ɠula nuiti
ta Leevi nuiti tosuʋɛ
1 Ɠɔoɠɔ GALAGI ɠɛni Aalɔn ma: «Ɗa-o, è-loun zunuiti-yo, ta è-ɠɛɛ mavofodaiti, faaɠaaza golaiti kpein ti ɠɛɛzu seizu ɲadegai laalɔɠɔma, ma ɠasɔi ɠa la wo unma. Ɗa-o, è-loun zunuiti-yo, faaɠaaza golaiti kpein ti ɠɛɛzu, wa-zalaɠa ɠula wotii ma ziɛgi zu, wa ɠa naama ɠasɔi a la wo unma.
2 È-ɠɛɛleaiti maaɓuɠa ɓɔɠɔ ʋa, Leevi ná-bolodai, è-ɠɛɛ ná-bolodai, ti ɠili è ʋa, ti ɓɔ è ʋa, wa è-loun zunuiti wo ɠɛ botii zu seɠe ʋɛlɛi wu, nii zeele woo ɠesui bu.
3 Ta ɗa-levei zo, ti ɗa seɠe ʋɛlɛi kpein makɛ, kɛlɛ ti la maaɓuɠaa seizu ɲadegai ma zɔɔlaiti ba, anɛɛ zalaɠa ɠulazuʋɛ ɓalaa, wa ʋa lia zaazu, tiya-o, wa-o.
4 Ta ɠɛ wo ʋa, ɗa-wotii zu, ta ɠɛ GALA daaɠomi seɠe ʋɛlɛi wu wotii kpein su, ti ɗa botii pɛ kɛ, nii maanɛai ga ti kɛ. Kɛlɛ nu ɠili nɔpɛ ge la maaɓuɠaa wo ʋa.
5 Wa ɠa seizu ɲadegai ma ɠasɔi a ɠɛ wo unma, ta zalaɠa ɠulazuʋɛ, nà-ziiɠaawanai loko la leʋea naazu, é ʋa yei Izelayɛle nuiti daalɔɠɔma.
6 À wɛlɛ, gè yiimazeɠeni ga wo-ɠɛɛleaiti, Leevi nuiti, Izelayɛle nui zɔiti saama, ta ga nɔ̀nɔi, gè ti veeʋɛ wo ya ga ti GALA daaɠomi seɠe ʋɛlɛi ma wotii ɠɛ.
7 Ɗɔun ɗa Aalɔn, wa è-mavofodaiti, wa wa-zalaɠa ɠula wotii ɠɛ, naa kpein su nii é ʋilɛsu zalaɠa ɠulazuʋɛ ʋa, ta nii é ada ɲadega wolai, seɠe zuɠooza golai ʋoluʋɛ, wo-ɠasɔi ɠana. Gè wa-zalaɠa ɠula wotii veeʋɛ wo ʋɛ ga faanɛɛi. Zɔi nɔpɛ a maaɓuɠana ná ʋa, ga wo ɠɛʋele, ta naama nui ʋaa.»
Zalaɠa ɠula nuiti ti-laamiizuʋɛ
8 Ɠɔoɠɔ GALAGI ɠɛni Aalɔn ma: «Woilo, nii dɔin Izelayɛle nuiti ti kulazu vebɛani ɲadegaiti ba, nà ɓɔɠɔi gè naa makɛ fai ɠaliva è ma. Gè fea è ʋɛ, wa è-mavofodaiti, wɔnɔi ɠa ná, naa ɠa ɠɛ ga ɠɔoɠɔ tɔgi.
9 Wɛlɛ nii a ɠɛ ga wɔnɔi vebɛani ɲadegaiti su, nii é ga nɔ̀nɔi, naa a zeɠena ba, é ɠala: nii dɔin Izelayɛle nuiti ti kɛɛzu bɛ̀ ga vebɛaniiti moloi zu, ta koto gba zalaɠaiti, ta ná-faa zuɓɛtɛ zalaɠaiti, ti ʋaazu ga tiye pɔ̀. Naama ani ɲadega wolaiti ta ɠɛ ga ɗɔnɔ, wa è-loun zunuiti.
10 Wa ti mi ada ɲadegai ta. Zunuiti nɔ ɠa ta mi. Ta ɠɛ ga ani ɲadega wolaiti wo ʋɛ.
11 «É ɓudɛ naa maazu, vebɛanii niiti Izelayɛle nuiti ti feezu bɛ̀, ɗa naa ɠilazuʋɛ zeɠe. Gè naa kpein fea è ʋɛ, wa è-loun zunuiti, ta è-loun anzanuiti, naa ɠa ga ɠɔoɠɔ tɔgi. Nuiti kpein ta ɠɛ ɗa-ʋɛlɛi wu, ti la tɔ koloɠoloni, ta zoo ti ta mi.
12 Zooi ʋa lɔnɔ mɔungiti ti feezu bɛ̀, gè naati ɓalaa fea wo ʋɛ, naa ɠa é ga gulɔi, ta dɔɔ niinɛi, ta moloi,
13 zooi ʋa lɔnɔ mɔungi kpein ti ʋaazu la Ɠɔoɠɔ GALAGI ʋɔ. Nuiti kpein ta ɠɛ ɗa-ʋɛlɛi wu, ti la tɔ koloɠoloni, ta zoo ti ta mi.
14 «Nii kpein Izelayɛle nuiti ta konana mà ga nɔ̀nɔi, naa ɠɛa ɓalaa ga wɔnɔ.
15 Doun mɔungiti, ta togani mɔungiti, ta ti ve Ɠɔoɠɔ GALAGI ʋɛ, naati ta ɠɛ ga ɗɔnɔ. Kɛni è doun zunu mɔungi unmɔɔ, è togani yiʋo zinɛ mɔungi ɓalaa unmɔɔ, nii é la zooga é ʋa ɠula ga zalaɠa.
16 Zunu loin unmɔɔ ganii ɠa ɠula, a alu gila sɔlɔɔna, sɔngɔi ɠa ɠɛ ga wali ɠae lɔɔlugɔ, seizu ɲadegai ma valibogi zu, naama wali ɠaei ɠilagi ɠa ga galamu puugɔ.
17 Kɛlɛ mina va bu, ti ʋa nikɛ yiʋo mɔungi unmɔɔ, ɓaa baala ziʋo mɔungi, ɓaa boli yiʋo mɔungi, ta ga zalaɠa ani ɲadegaiti. Wa ti-ma ɲamai vaza zalaɠa ɠulazuʋɛ ma, wo ti-ma wulɔi ɠula ga zalaɠai, nii abui galazu, makugi nɛai Ɠɔoɠɔ GALAGI ʋɛ.
18 Ti-ma zuai ɠa ɠɛ ga ɗɔnɔ, eɠɛʋelei zalaɠa zuaiti ta ɗa ɠɛ la, ma ɠekegi ta ma ɓalai é ga zeezazu ʋelei, niiti ti ɠula ga datɛɠɛ vai ma ʋoogi.
19 Ani ɲadegaiti kpein Izelayɛle nuiti ti seɠezu ba Ɠɔoɠɔ GALAGI ʋɛ ta-vebɛaniiti su, gè naati fea wo ʋɛ, ɗa-o, è-loun zunuiti-yo, è-loun anzanuiti-yo, naa ɠa ga ɠɔoɠɔ tɔgi. Toɠa ga minazeɠegi é la ɠoloɠologa ta é la valiboga, wo yɔɠɔzu wa Ɠɔoɠɔ GALAGI ta è-mavofodaiti.»
20 Ɠɔoɠɔ GALAGI ɠɛni Aalɔn ma: «È la zou zɔlɔɔga, ga è ɓɔɠɔ gele, Izelayɛle yooi zu, ɗɔnɔ nɔpɛ ge la ɠɛa ná, ti zaama. Nà ɠa gè ga ɗɔnɔi ta ɗa-ɓɛtɛi Izelayɛle nuiti saama.
Leevi nuiti ti-laamiizuʋɛ
21 «Puusiɛi nii kpein Izelayɛle nuiti ti kulazu, gè naa vea Leevi nuiti bɛ ga tɔnɔ, botii vaa zu ti kɛɛzu, nii ti kɛɛzu GALA daaɠomi seɠe ʋɛlɛi wu.
22 Izelayɛle nuiti ti la mɔ maaɓuɠaa GALA daaɠomi seɠe ʋɛlɛi ʋa, ti ʋa koto zeɠe, ti ʋa za.
23 Leevi nuiti nɔ ɠa ta ɠɛ GALA daaɠomi seɠe ʋɛlɛi wu wotiiti kɛɛzu, ni faaɠaaza gola ɠa ɠɛɛna ná, tiya ɠa ma ɠasɔi a la ti unma. Toɠa ɠɛ ga ɠɔoɠɔ tɔgi, wo-mavofodaiti kpein bɛ. Ti la zou zɔlɔɔga Izelayɛle nuiti saama,
24 mazɔlɔɔ nà puusiɛi kpein feezu Leevi nuiti bɛ ga tɔnɔ, nii Izelayɛle nuiti ti kulazu Ɠɔoɠɔ GALAGI ʋɛ. Naa ɠa é kɛa, gè boni ti ma ga ti la zou zɔlɔɔga Izelayɛle nuiti saama.»
Leevi nuiti ta-ʋuusiɛi
25 Ɠɔoɠɔ GALAGI ɠɛni Moize ma:
26 «Bo Leevi nuiti ma ga: ‹Siɛgi zu Izelayɛle nuiti ti ʋaazu ga puusiɛiti wo ʋɔ, gè feezu wo ya ga wɔnɔ, wa puusiɛi ɠula ba ga vebɛanii Ɠɔoɠɔ GALAGI ʋɛ, naa ɠa é ɠɛɛzu ga puusiɛi ma ʋuusiɛi.
27 Wɔnɔ ma ɠuladai naa ɠa levezu ga, eɠɛʋelei naa la, nii é ɠulazu molo loɠazuʋɛ ta dɔɔ ɓɛtɛzuʋɛ.
28 Pele ɠana wa ta ɠula da la, wa ɓalaagi, é ɠɛ ga vebɛanii Ɠɔoɠɔ GALAGI ʋɛ, é ɠula puusiɛi kpein ba, wo sɔlɔɔsu Izelayɛle nuiti zea. Wa fe zalaɠa ɠula nui Aalɔn ya, é ɠɛ ga zalaɠai Ɠɔoɠɔ GALAGI ʋɛ.
29 Faanɛɛi kpein wo sɔlɔɔsu, wa vebɛanii zeɠe ba Ɠɔoɠɔ GALAGI ʋɛ, wa ma ʋagɔi zeɠe ba, é ɠɛ ga ma ʋagɔ ɲadegai seɠeai ba yɛ.›
30 «Ɗa ɠɛ ti ma mɔnɔ: ‹Wa ma ʋagɔi ɠulana ba, mɔtai ɠa ɠɛ wo ʋɛ, Leevi nuiti, eɠɛʋelei naa la, nii é ɠulazu molo loɠazuʋɛ ta dɔɔ ɓɛtɛzuʋɛ.
31 Wa mi, ʋɛ nɔpɛ ná nɛai wo ʋɛ, wa wa-ʋɛlɛyeɠeiti, mazɔlɔɔ wo-zalai ɠana, botii kpein faa zu nii wo kɛɛzu GALA daaɠomi seɠe ʋɛlɛi wu.
32 Wo la faaɠaaza nɔpɛ kɛa ga naa, tɔɔzei wo ma ʋagɔi zeɠeʋɛ ba bɛ̀. Naazu wo la Izelayɛle nuiti ta-vebɛani ɲadegaiti kɔzɔa ɲɛgɛlɛin, wo ʋa za.»