23
1 Ɓalaame ɠɛni Ɓalake ma: «Zalaɠa ɠulazu lɔfela lo bɛ̀ ʋɛ, è nikɛ zinɛ lɔfela ta baala sinɛ lɔfela ɠɛʋele ɓɛtɛ bɛ̀ ʋɛ.»
2 Ɓalake naa ɠɛɛni, nii Ɓalaame boni. Ɓalake ta Ɓalaame ti nikɛ zinɛ ɠila ta baala sinɛ ɠila kulani ga zalaɠai, zalaɠa ɠulazuʋɛ ɠilagilagi.
3 Ɓalaame ɠɛni Ɓalake ma: «Ɠaalɔ, è lo ɗa-ɠala zalaɠai ɠoba. Nà maaɠoozazu, tanisu Ɠɔoɠɔ GALAGI ɠa ʋaazu é dàaɠomi. Nà naama wooi laazeeli è ma, nii a kula kɛlɛma bɛ̀.» É liini gizei ta ma, nii gulu la ma.
4 GALA ge ɠulani kɛlɛma Ɓalaame ʋɛ, naa ɠɛni ma: «Gè zalaɠa ɠulazu lɔfela logɛ, gè nikɛ zinɛi ta baala sinɛi ɠulaʋɛ ga zalaɠai, zalaɠa ɠulazuʋɛ ɠilagilagi.»
5 Ɠɔoɠɔ GALAGI wooi ʋuuni Ɓalaame la, é ɠɛ ma: «Ɠale ma Ɓalake ʋɔ bɛ, è ɓɔɛ pɔ ɠani.»
6 Ɓalaame ɠaleni ma Ɓalake ʋɔ bɛ, nii é ɠɛni ná-gala zalaɠai ɠoba, ta Moaɓe ɠundiɠiiti.
7 Ɓalaame faalaalii nii woni, é ɠɛ ma:
«Moaɓe masagi Ɓalake zeɠeʋɛ ga ze
Siili yooi zu gizeiti su.
É ɠɛ mà: ‹Ʋa, è Zakɔɓe mavofodai voovo bɛ̀!
Ʋa, è ɗa-yiiɠaawanai yei Izelayɛle laalɔɠɔma!›
8 Nà naa voovoozu ɠale, nii GALA ge la foovooni?
Nà yiiɠula ɠale nuɓusɛiti ma, siɛgi zu Ɠɔoɠɔ GALAGI yii la ɠulani la?
9 Nà yɛsu fasa ɠizeiti unmaʋɛ, gè pɛtɛ,
nà yɛna gizeiti unmaʋɛ, gè pɛtɛ,
nuɓusɛ ʋe é zeizu yɛ,
zɔɠɔzu ɠa ti ʋa ta zii zɔiti.
10 Ɓɛ ɠa a zoo é Zakɔɓe mavofodai ma ʋɛbɛi ɠaalu,
ɓaa é Izelayɛle nu ɓulugi ɠaalu?
Gè za, eɠɛʋelei sɔle nui zaa ʋelei la.
Gàaɓela ʋelei ɠɛ ga nɔnɔi ɠɛʋelei.»
11 Ɓalake ɠɛni Ɓalaame ma: «Leeni ɠa è kɛa ga ze? Gè è zeɠeʋɛ ga è sìli nuiti foovo, wɛlɛ ɗa ba, è ɗa tuya loo ti ʋɛ!»
12 É ɠɛni ma: «Nà ɠɛna ɓɔɛa, gè la naa woga ɓaa, nii Ɠɔoɠɔ GALAGI pua dà?»
Ɓalaame ná-tuyai velesiɛi
13 Ɓalake ɠɛ ma: «Ʋa pɔ̀ bɛ, de li ada taɠili, ʋɛ ɗa ti ɠa ná. Ɗa ti ɠilazuʋɛ nɔ ɠa, è la ti pɛ kaa, miná ɠa ɗa ti voovo ná nɔ̀un bɛ.»
14 É liini la Sɔfime kpalagaʋɛ, Pizega gizei unmaʋɛ, é zalaɠa ɠulazu lɔfela lo, é nikɛ zinɛ ɠila ta baala sinɛ ɠila kula ga zalaɠai, ti ɠilagilagi maazu.
15 Ɓalaame ɠɛni ma: «Lo ʋɛ ɗa-ɠala zalaɠai ɠoba, gè li munu, gè Ɠɔoɠɔ GALAGI laaɠomi.»
16 Ɠɔoɠɔ GALAGI ɠulani kɛlɛma Ɓalaame ʋɛ, é wooi ʋu da, é ɠɛ ma: «Ɠale ma Ɓalake ʋɔ bɛ, è ɓɔɛ pɔ ɠani.»
17 Ɓalaame ɠaleni ma Ɓalake ʋɔ bɛ, naa ɠɛni loni ná-gala zalaɠai ɠobaʋɛ, ta Moaɓe ɠundiɠiiti. Ɓalake ɠɛni ma: «Leeni ɠa Ɠɔoɠɔ GALAGI bogai?»
18 Ɓalaame faalaalii nii woni, é ɠɛ ma:
«Ɓalake wuzeɠe, è woilo!
Sipɔɔl ná-doun zunui, woilo gòoi ma!
19 GALA ge la ga nuɓusɛi, é ʋa zɛɛi wo,
ɓaa nu vulu, é ʋa zeɠe kpɔɛ wooi ʋa.
Nii é bogai, é la naa ɠɛa ɓaa?
Toɠa woo wo, é la su vai ɠɛa?
20 Wɛlɛ, gè devei zɔlɔɔga ga gè tuya loo,
GALA ge tuya loa, gè la seɠezu ma.
21 É la telebotala vaa ɠaani Zakɔɓe ʋa,
é la sɔletala vaa ɠaani Izelayɛle nuɓusɛiti ba.
Ɠɔoɠɔ GALAGI, é ga ná-GALAGI, naa ɠa tɔun polu,
toɠa masadai ma ɠoozunɛɛi zɔlɔɔ ti ʋɔ bɛ.
22 GALA ge ti ɠulani Ezipete yooi ʋa,
suvikɛi ɠulaʋɛ ga teɠui zuvikɛi ti ʋɛ.
23 Zoɠolai la ga faa nɔpɛ Zakɔɓe mavofodai ɠaazu,
ɓaa adɔɓɛɛ vai Izelayɛle laalɔɠɔma.
Yeeɠɛɠala ʋagɔi ma, toɠa ɗa wo Zakɔɓe ta Izelayɛle ma,
nii kpein GALA ge kɛɛzu.
24 Niima nuɓusɛiti ta wuzeɠezu eɠɛ zalai,
toɠa ɠaalɔsu eɠɛ zalai,
é ɗa ná-sua zogai mi,
é ɗa ná-sua zogai ma ɲamai ɓɔle,
naa ʋoluma ɠa niina a ɗa laa la.»
25 Ɓalake ɠɛni Ɓalaame ma: «Ni è la ti voovooni, mina tuya loo ti ʋɛ, ga tago ɓalaa.»
26 Ɓalaame gooɠaaʋoteni, é ɠɛ ma: «Gè la boni è ma ɓaa ga nà naati kpein nɔ ɠɛ, nii Ɠɔoɠɔ GALAGI bosu?»
Ɓalaame ná-tuyai zaʋasiɛi
27 Ɓalake ɠɛni Ɓalaame ma: «Ʋa deɠɛmu, nà liizu ga ɗe adaʋɛ taɠili, tanisu GALA ka pɛtɛ názu ga ɗa nuɓusɛi niiti foovo nɔ̀un bɛ.
28 Ɓalake liini ga Ɓalaame Peyɔɔl gizei unmaʋɛ, nii é zɛlɛni teʋebai maazu.
29 Ɓalaame ɠɛni Ɓalake ma: «Zalaɠa ɠulazu lɔfela lo bɛ̀, è nikɛ zinɛ lɔfela ta baala sinɛ lɔfela ɠɛʋele ɓɛtɛ bɛ̀ ʋɛ.»
30 Ɓalake naa ɠɛɛni, nii Ɓalaame boni. É nikɛ zinɛ ɠila ta baala sinɛ ɠila kulani ga zalaɠai, zalaɠa ɠulazuʋɛ ɠilagilagi.