GALA Daawoo Zɛʋɛi 2 Piyɛlɛ 1

Piyɛlɛ Ná-Sɛʋɛi Velesiɛi

Sɛʋɛi lɔɔzeizuʋɛ ma woo mɔungiti

Toɠa ɠalasu Piyɛlɛ Ná-Sɛʋɛi Velesiɛi zu ga Keelai Piyɛlɛ ɠa é sɛʋɛa, kɛlɛ ada-yeeɠɛɠalai nii zu, faaɠwɛ nu mɔinmɔin ka bosu ga tɔ lɛi é ʋa sɛʋɛ. Kɛɛʋɛ eɠɛ nu ɠili ka é sɛʋɛai Piyɛlɛ laaseigi zu. Gaama ʋe ga sɛʋɛi nii ma nui ɠɛ, toɠa ga Yesu ná-eteai ma zeele ɠiteɠite, ma un ge daa ma mɛɛ ga naa ɠaazuʋɛ valibo fai gizei ma (1:17-18). Ni Piyɛlɛ ɠa é sɛʋɛi nii ɠɛai, é kɛɛni su la ɠoozani é za, tanisu kona ʋuulɔzita maazu lɔɔlugɔiti zɔɠɔzuʋɛ ta puulɔzita maazu taaʋuugɔi (65-69). Piyɛlɛ ɠa bosu ga ná-sɛʋɛi velesiɛi ʋe (3:1), naa ɠa é vaazu bu nu nii ɠɛɛ yeeɠɛɠalai ʋilɛ Piyɛlɛ ná-sɛʋɛ mɔungi ʋoluʋelei. Naa nɔnɔ ma zɛʋɛi leʋegɛ keletiɛinti pɛ ma.

Piyɛlɛ sɛʋɛi nii ɠɛɛʋɛ nii a kɛ é kidaaleʋe nuiti iɲɔdɔ ga ti eteai ziɛ sɔledai zu, é ti ɠitoo su ga ti mina ʋilɛ zɛɛ ɠalamɔinti polu. É ti iɲɔdɔɔni ga ti mina woilo nuiti goo ma, niiti ti ɠɛɛzu ma Yesu yeeɠɛɠa zuɠooza kɛa é la ʋaazu ʋolu. Piyɛlɛ mu ge dɛɛni ga GALA ge la nɛkɛni, ta toɠa pɔ ga ɛsɛ pɛ ge ɠizo (3:8-9). Naa maaʋele ɠa é kɛɛzu nu eteai ziɛzu la ga kɛʋelei ta nii zeliloma la ba (3:14).

Unsosuʋɛ

1. Piyɛlɛ ɓɔɠɔ lɛɛʋɛ ta é ɓɔɛ ná-sɛʋɛi ɠala nuiti pɔ (1:1-2).

2. Naa ʋolu é ti loo ɠisu ga ti eteai ziɛ sɔledai zu tɔɔzei GALA naama zobogi veeʋɛ ti ya (1:3-21).

3. É zɛba é ti loo ɠisu mɔnɔ zɛɛ ɠalamɔinti daalɔɠɔma, é naa wo ma yeeluɠɔ nii é ʋaazu ɠɛɛzu ga naati etea ɠaaɓela foloi (2:1-22).

4. Naa pɛ poluma Piyɛlɛ ná-sɛʋɛi ɠaaɓelagɛ ga é kidaaleʋe nuiti iɲɔdɔ ga ti eteai ziɛ peelalazu mina ɠɛ ba, nii a kɛ ti Yesu ʋaa laa velesiɛi ɠɛʋele ɓɛtɛ (3:1-18).

Tuʋɔ gooiti

1 Nɛ̀i gè ga Simon Piyɛlɛ, gè ga Yesu Kilista ná-botiɠɛ nui ta ná-keelai, nà ɠa gè sɛʋɛi nii leʋesu naati ma, adɛiti de kidaaleʋe ɠilagi zɔlɔɔgai, sɔngɔi ɓaai, da-ƓALAGI é ga de Ɠizo Nui Yesu Kilista, ná-telebodai maaʋele ma. 2 Zaalai ta ziilɛigi ɠɛ wo ma ga gola, GALA ta de-Maliɠii Yesu ɠwɛɛgai maaʋele zu.

GALA ná-toligi ta su vaiti

3 Ná-galadai ma zɛbɛi naa pɛ feeʋɛ de ya, nii kpein de ɓɛdɛi ba, de ʋa zɛnvui wo, de ɠiliai yɛ de GALA ba, é naa lɛ ga deye, zɔi é de loliga, ga de dɔnɔ zɔlɔɔ tɔ ɓɔɠɔi ná-lɛbiyai zu ta ná-nuɓɔɠɔlai. 4 Naati maaʋele ɠa é minazeɠegiti kɛa la ade ʋɛ niiti ti wola vizɔgai, ta ti wola ʋagai, naa ɠa a kɛ, niiti é minazeɠea ga tiye, wa naati sɔlɔɔna, wo zoo wo ɠula eteai zu vaa luulaiti zea, ti ɠɛɛzu ga ɓɔɠɔyiimai, wo wɔnɔ zɔlɔɔ ná-galadai zu.

5 Naa maaʋele ma, à ɠaaɓa gola, wo tuʋa ʋele ʋagɔi la wa-ɠidaaleʋei ma, wo faaɠwɛgi la wa-luʋa ʋele ʋagɔi ma, 6 wo ɓɔɠɔzogi la faaɠwɛgi ma, wo to kpaangi la ɓɔɠɔzogi ma, wo GALA gaazuluabai la to kpaangi ma, 7 wo ɠɛɛɠɛloun wɔinlai la GALA gaazuluabai ma, wo nɛɛbɛi la ɠɛɛɠɛloun wɔinlai ma. 8 Ni niima vaiti ta wo-yiimaʋɛ, ti naa laave, ti la wo yɛga ná, wo ʋa ɠɛ ga nu ɲakaa, ɓaa niiti kulanuma la ti ʋa, wo lii vai zu luɠɔma de-Maliɠii Yesu Kilista ɠwɛɛgai zu. 9 Kɛlɛ zɔi ti la zea, naa ná-wozaɠaai la liini ɠoozama, toɠa ga gaazuɠole nu, zeemaʋɛ ga ná-koto wɔlɔmaiti gbaʋɛ, é ɲade.

10 Naa ɠa é ba, kɛ̀ɛleaiti, à ɠaaɓa gola, wo ɠili kpaan wo loli fai ʋa, ta ziimazeɠegi ʋa bogai ga woye, mazɔlɔɔ wa naa ɠɛɛna, wo la loa eyɛsu pɛ. 11 Pele ɠana, daa ɠa lao la wo luɠɔ ga gola, wo lɛ ade-Maliɠii ta de Ɠizo Nui Yesu Kilista ná-ɠɔoɠɔ masadai zu.

Kalagi soloogai gaamai ma

12 Naa ɠa é kɛɛzu, gè niima vaiti toozu la wo ɠisu yeenɔpɛ, anɛɛ ni wo ti ɠwɛɛ pɔlɔma, ta wo ɠiliʋɛ kpaan gaamai ʋa nii wo sɔlɔɔni. 13 Gè pɛtɛgɛ ga soloogɛ, siɛgi zu gè vulua la dɛ, wo yɛ ɠaazu ɠa, nà-tookisuiti maaʋele ma, 14 mazɔlɔɔ gè kwɛɛ ga nágo ʋe niina, gè ʋa ɠula kpusɛi nii zu é zaazu, eɠɛʋelei de-Maliɠii Yesu Kilista boni la mà. 15 Kɛlɛ nà daazu ma kpɛ, gè sòoda vai ɠɛ, dìa ʋoluma, wo zoo wo ɠizɛ fai niiti pɛ su yeenɔpɛ.

Zeeleiti niiti ti-ɠaazuʋɛ
Kilista ná-lɛbiyai ɠaani

16 Tama gi la ʋoluzeini nuɓusɛiti ta-vaalaali maaɓɛtɛaiti ba, gi ʋa ade-Maliɠii Yesu Kilista ná-zɛbɛi ta paa laa velesiɛi lɛ ga woye, kɛlɛ gá ɓɔɠɔi gi ná-lɛbiya wolai ɠaani ga gi-ɠaazuʋɛ. 17 Mazɔlɔɔ Ɠɛɛɠɛ GALA ge bɔɔlɔni, é lɛbiyai ve bɛ, siɛgi zu ná-lɛbiya wolai zu, é niima wooi woni ma la ga: «Nii ɠa é ga nɛ̀ɛbɛ Loun Zunui, nii é gòla yiilaazu.»* 18 Giya ɓɔɠɔi gi naama wooi mɛnini, é zeɠe geezuʋɛ, siɛgi zu gi ɠɛni tɔun ba la gize ɲadegai ma.

19 Naa ɠa é ba, gi wola laaʋɛ GALA goo wo nuiti gooi la, ti boni. Toɠa zoloo, wa ɓalaagi wo ɠida bu, mazɔlɔɔ toɠa ga lanboi é volozu adaʋɛ ná ɓidiai, eyɛsu foloi ɠula, geelaalaosu zomideɠai volo wo-yiimaʋɛti. 20 À nii ɠwɛɛ mɔunpa, ga GALA goo wo fai GALA Sɛʋɛi zu, nu la naa tanɔpɛ poluɠwɛɛga ɓɔɠɔ ʋɛ. 21 Mazɔlɔɔ GALA goo wo fai gila kpalaa ge la ʋaani ga nuɓusɛi yiimai yeeɠɛɠala ɠila kpalaa su, kɛlɛ Zɛnvu Ɲadegai ɠa é puuni nuiti da, ti ɓɔɛni GALA daaseigi zu.