MASA FAI LƆƆZEI ƲELEI
8
(8:1--12:25)
Masa gaiziɛ vai Izelayɛle ʋɛ
1 Samiyɛle ʋɔlɔzaɠagai ma, é ná-doun zunuiti seini ʋotogi zu, tukpɔɠaaleʋe vai ma, Izelayɛle yooi zu.
2 Ná-doun zunu mɔungi laaseigi ɠɛni ga Zowɛle, felesiɛi laaseigi ɠɛ ga Aɓiya. Ti zeini Ɓeel-Seeɓa, ga ti ɗa tukpɔɠaaleʋe miná.
3 Kɛlɛ ti la ɠɛni ʋilɛni ti-ɠɛɛ Samiyɛle ziɛ ʋelei ʋolu. Tɛi walii ná-nɛɛbɛi ɠɛni ti-yiimaʋɛ ga gola, ti ɠɛni lobɛaniiti sosu, ti ɗa tukpɔi ɠaaleʋe ga telebotalai.
4 Naa ɠa é kɛɛni, Izelayɛle ɠundiɠiiti kpein ti maaɓɔni Lama, Samiyɛle ʋɔ bɛ.
5 Ti ɠɛni Samiyɛle ma: «Ɗa ɠaa, è ʋɔlɔzaɠagai, tama è-lointi ti la ziɛzu ga pagɔ, ga è ɠɛʋele. Naa ɠa é ba, masa seina gi unda, nii a ɠɛ gi levezu, eɠɛʋelei é ɠɛɛzu la zɔɔma yooiti su.»
6 Naama wooi wanani Samiyɛle ma, ga ti ɠɛɛ vai ma: «Masa sei gi unda, nii a ɠɛ gi levezu.» Samiyɛle Ɠɔoɠɔ GALAGI valini.
7 Ɠɔoɠɔ GALAGI Samiyɛle wooɠaaʋoteni, é ɠɛ ma: «Woilo Izelayɛle nuiti gooi ma, nii ti maaɠaazaɠaboga, yeezei naa wu. Mazɔlɔɔ ɗa laade ti ʋa ɠɛ ɠɛlɛzu è ʋa, nà ɠa ti ɠɛlɛzu bà, ga gè mina mɔ ɠɛ ga masagi ti unda.
8 Nii ti kɛɛzu ga ɗe, naa nɔ ɠa ti kɛɛzu ga ze kaite, é lɔɔzei voloi gè ti ɠulani la Ezipete yooi ʋa, duɔlai zu, ta ɗa ɠɛlɛ bà, ti ɗa gala kiligiti dɛbi.
9 Naa ɠa é ba, nii ti boga naa ɠɛ ti ʋɛ, kɛlɛ ti lɛnɛ ga gola, è naati dɛɛ ga tiye, nii kpein a ɠɛ ga masagi zɔgiti.»
10 Samiyɛle liini, é Ɠɔoɠɔ GALAGI wooi pɛ daazeeli bɛbɛi ma, niiti ti ɠɛni ɠɛɛzu ma, é masa sei ti unda.
11 Samiyɛle ɠɛni ti ma: «À woilo fai niiti ma, niiti ti ɠɛɛzu ga masagi zɔgi: mɔunpa, toɠa wo-loun zunuiti seɠe, é ti ɠɛ ga ná-salaʋusuiti. Ti ɠɛ ga ná-kɔɔɠɔ wotolo ɓizɛ nuiti, ɓaa ná-sooiti kpizɛ nuiti, ɓaa niiti ti ziɛzu tɔ ɓɔɠɔi ná-wotoloi ɠakalaʋɛ.
12 Toɠa yiimazeɠe ga tanigaa, é ti ɠɛ ga nu waagilagilagiti ta-ɠundiɠiiti, é tanigaa ɠɛ ga nu ʋuulɔɔludɔɔlugiti ta-ɠundiɠiiti salaʋusuiti saama. Toɠa tanigaa ɠɛ ga ná-wozawoli nuiti, zɔiti ti ɠɛ ga ná-molo leʋe nuiti. Toɠa taɠiligaa zeɠe, é ti ɠɛ ga ɠain bo nuiti, ti ɗa kɔɔɠɔ zɔɔlaiti gain, ta ma wotoloi ʋa zɔɔlaiti.
13 Toɠa wo-loun anzanuiti seɠe, é tanigaa ɠɛ ga gulɔ maku nɛɛnɛ kpɛtɛ nuiti, ɓaa daaɠoli wo nuiti, ɓaa ɓulu ɓɛtɛ nuiti.
14 Toɠa wa-ɓalagiti seɠe, ta wa-leezɛn ɓeleiti, ta wa-wolive ɓele ʋapagiti, é ti ve ná-botiɠɛ nu wolaiti zea.
15 Toɠa puusiɛi ɠula wa-ani zuwuiti ba, ta wa-leezɛn ɓeleiti, é ti ve ná-nu wolaiti zea, ta ná-botiɠɛ nu wolaiti.
16 Toɠa wa-wotiɠɛ nuiti, zunuiti ta anzanuiti seɠe, naa ɓɔ wa-nu niinɛiti ba, niiti ti ga zɛbɛsu geleiti, ta wa-zoovalegiti, ti ɗa botii ɠɛ bɛ.
17 Toɠa wa-loganiiti ma ʋuusiɛiti seɠe, wa ɓɔɠɔi, wa ɠɛ ga ná-duɔiti.
18 Naama voloi, wa kpeei loo ga wa-masagi laalɔɠɔi, nii wo yiimazeɠeai la, kɛlɛ Ɠɔoɠɔ GALAGI la woiloga wo-wooi ma.»
19 Izelayɛle nuiti ti la ɠɛni kɛɛni, ti ʋa Samiyɛle wooi zo, ti ɠɛni ma: «Gá vaa ɠana! Gi ɠɛ masagi ɠɛ nɔ gi unda,
20 naa ɠa a kɛ, gá ɓalaa gi ɠɛ ga zɔɔma yooiti kɛʋele, gá-masagi ɗa gi lukpɔɠaaleʋe, é ɗa lo gá-ɠɔɔʋɛbɛiti tuɠɔ, gi ɗa kɔɔi ɠɔ ʋɔɔma.»
21 Samiyɛle ɓegai ma ga Izelayɛle nuiti ta-ɓɔɛi naati mɛni, é ti pɛ daazeelini Ɠɔoɠɔ GALAGI ma.
22 Ɠɔoɠɔ GALAGI ɠɛni Samiyɛle ma: «Yeezei naa wu, nii ti maaɠaazaɠaboga è ma, masagi zei ti unda.»
Naa ʋoluma, Samiyɛle ɠɛni Izelayɛle nuiti ma: «Ɛsɛ pɛ ge liina ná-taazu.»