៩
សារ សូល ម៉ុត សឿ យីស៊ូ
១ ផះ រ៉ាំងវ៉ាង ណោះ សូល ឃឹត ដឹង កាប អឺក លូ ប៉ិច ប៉ាន់តោ័ មួត សឿ យីស៊ូ លើយ។ អ៊ែ ឡាំ ប៉ាគ់ ម៉ៃគ ក្រាគ់ រ៉ាម៉ះ ប៉្រ័ះ
២ ប៉រ់ ចាបាប់ ម៉ុត កាណុង រ៉ោង អន់ទៀគៗ ម៉ះ សុនសាត អ៊ីស្រាអ៊ែល កាណុង មឿង ដាម៉ះ អ្លុ ផៃគ ប៉ប័ មួត សឿ យីស៊ូ បក់ អន់ដា អ្វៃ ហះ ចារ ណោះ យ៉័ះ កាម៉ាក័ លើ អង់កាន់ កាតាម អ៊ែ ចឹង រ៉ុប កត់ ចគ់ អ្យក់ សឹត ប៉ាគ់ មឿង យេរូសាឡឹម។
៣ ផះ អ៊ែ ចាក ឡាំ ក្យាម័ ចឹង ទឹល ប៉ាគ់ មឿង ដាម៉ះ កេះ ផាឌី កា ទី តាតារ ក្លាគ់ ឡឹង ប៉្លៃង ជុំ អ៊ែ ឡូត។
៤ អ៊ែ កា ប៉ក់ កេះណោះ កាតាំង ប៉ានឹរ កាប លូ អ៊ែ ផា «អឺ សូល ញ៉ា ត្រគ់ អីស ប៉្រគ័ បាប អាញ់ ?»
៥-៦ សូល តើល ផា «អឺ ពឹ តាំងឡា ពឿ អីស ណោះ ?» ប៉ានឹរ ណោះ កា តើល ផា «អាញ់ សិច យីស៊ូ ឡាក់ អីស អ្វៃ ប៉្រគ័ បាប។ ហគ់ អ្យូវ ចាក ម៉ុត កាណុង មឿង តោ។ ប៉ាគ់ ចារ ណោះ ចឹង ទី ពូ រ៉ះ កា អីស ត្រគ់ ប៉្រគ័ នីចម័ អន់ដា»។
៧ កាប៉ាច់ មួត ចាក អន់ឌូ លូ សូល អន់ឌែ កា តាវ អ្វៃ គ្រឺយ អូ អ្លុ ចឹង កាប នីចម័ អុះ អន់ឌែ កាតាំង ដឹង ប៉ានឹរ ហះកា អូ ប៉ប័ ទី ពឿ អុះ។
៨ សូល កា អ្យូវ យ៉័ះ អ៊ែ ខំ រ៉ាល ម៉ាត់ នីចម័ កាតាម កា អ៊ែ ហៃ អូ ប៉ប័ អុះ ណោះ ហង បះ ពូ ទុង តី អ៊ែ ចាក ម៉ុត កាណុង មឿង ដាម៉ះ។
៩ រ៉ាំងវ៉ាង ប៉ៃង ដារ់ អ៊ែ ហៃ កាណាគ័ ញ៉ា កា អូ ប៉ប័ អុះ លូ អូ អៃត ទៀក អូ សា សាណា ញ៉ា ដេល។
១០ កាណុង មឿង ដាម៉ះ ណោះ ទី បក់ សឿ យីស៊ូ ម៉ោញ ដូវ សិច អ៊ែ អាណាណះ។ យីស៊ូ តាំបាង ឡាកោ អន់ អ៊ែ ប៉ប័ លូ អើ អ៊ែ ផា «អឺ អាណាណះ»។ អ៊ែ តើល ផា «ញ៉ា ពឹ តាំងឡា»។
១១ យីស៊ូ រ៉ះ កា អ៊ែ ផា «ហគ់ ឡាំ ប៉ាគ់ ទ្រង ឡាក់ ពូ អើ ផា ទ្រង ត្រង់ កេះណោះ ណាំង អំប៉ញ់ ប៉ាណូស បក់ សិច សូល ឡឹង មឿង តើសុះ អ៊ែ អ្វៃ កាណុង ហី យូដះ ផះ អ្វៃ ម៉ន់ អើ អាញ់។
១២ អ៊ែ ទី អំប៉ោ ប៉ប័ កាម៉ាក័ ម៉ោញ ដូវ សិច អាណាណះ ម៉ុត ម៉ន់ សាប៉ាគ់ ពឹង អ៊ែ ភឿ អន់ ម៉ាត់ អ៊ែ តាតារ ណាវ្គ»។
១៣ អាណាណះ អ៊ែ តើល ផា «អឺ ពឹ តាំងឡា អាញ់ កាតាំង ពូ អៀង ដូវ រ៉ះ ផា ប៉ាណូស អា អ៊ែ ប៉្រគ័ អូ ដាគ់ កេង ខាក់ កា មួត សឿ អីស ប៉ាគ់ មឿង យេរូសាឡឹម តោ។
១៤ អ៊ែ ឡាំ ប៉ាគ់ អា អ៊ែ ប៉រ់ ចាបាប់ ឡឹង មួត ម៉ៃគ ក្រាគ់ រ៉ាម៉ះ ប៉្រ័ះ កេះ ភឿ សាំរ៉ាប់ ណាំង រ៉ុប មួត បក់ ម៉ន់ អើ អីស»។
១៥ ហះកា យីស៊ូ តើល អ៊ែ ផា «ហគ់ ចាក ឡាំ ពិ ខង អាញ់ រ៉ើស អ្យក់ ប៉ាណូស អា ភឿ ប៉្រើ អ៊ែ ឡាំ រ៉ះ អន់ ពូ អន់ហ្នាល់ សិច អាញ់ កា សុនសាត អន់ទៀគ លូ កា សាដាច់ អន់ទៀគៗ ទឹប កា សុនសាត អ៊ីស្រាអ៊ែល ដេល។
១៦ អាញ់ ចឹង ប៉្រគ័ អន់ អ៊ែ អ្លុ អន់តគ់ ផា អ៊ែ ចឹង ទី សារ ឡាំបាក អៀង ញន អាញ់»។
១៧ អាណាណះ កា ឡាំ តាទឹច។ ប៉ាគ់ ទឹល ហី ណោះ កេះ អ៊ែ ម៉ុត សាប៉ាគ់ សូល លូ កាប ផា «អឺ ម៉ី សូល យីស៊ូ ឡាក់ ពឹ តាំងឡា ពិន តាំបាង ឡាកោ អន់ អីស ប៉ប័ ផះ អីស ចាក រទ្រង ពែ អ៊ែ ប៉្រើ អាញ់ ឡាំ ប៉ាគ់ អា ភឿ អន់ ម៉ាត់ អីស ដាគ់ តាតារ ហៃ ប៉ប័ ណាវ្គ លូ អន់ អីស ទី ប៉ាង៉ាត័ ប៉ាលឹង ប៉្រ័ះ ដាគ់ កាខាក់ ម៉ុត ប៉ាណាំ ពុត ពៀក អីស ដេល»។
១៨ ម៉ោញ ទ្រុ ឡឹង ណោះ ទី កាណាគ័ ឡាក់ កា អង់គែប កា ហ្រុង ឡឹង ម៉ាត់ សូល ផាឌី ម៉ាត់ សូល តាតារ ឡូត ហៃ ប៉ប័ ណាវ្គ។ អ៊ែ កា អ្យូវ កេះណោះ អាណាណះ ប៉ាំងហុំ អ៊ែ។
១៩ កេះណោះ អ៊ែ សា សាណា កា ទី សាងុំ ណាវ្គ ហង។
សារ សូល រ៉ះ សារ យីស៊ូ ពឹង មឿង ដាម៉ះ
សូល អ្វៃ អន់ឌូ លូ មួត សឿ យីស៊ូ ឡាក់ អ្វៃ កាណុង មឿង ដាម៉ះ ណោះ ទុញ ដារ់។
២០ សាគ់ អ៊ែ ដាគ់ កេះ ណោះ អ៊ែ កា ម៉ុត កាណុង រ៉ោង អន់ទៀគៗ ភឿ រ៉ះ សារ យីស៊ូ។ អ៊ែ ផា យីស៊ូ អា ហង ឡាក់ គន ប៉្រ័ះ ប៊កកាតយ័។
២១ ទិ មួត បក់ ផះ អ្វៃ សាំយ៉ាំង អ៊ែ រ៉ះ ណោះ ពូ ញម ខាក់ ទឹប អំប៉ញ់ លូ គួប សោប ផា «ញ៉ា អូ ត្រគ់ អ៊ែ អា ហង ប ឡាក់ ថាំឡាយ មួត បក់ ម៉ន់ អើ យីស៊ូ អ្វៃ ប៉ាគ់ មឿង យេរូសាឡឹម តោ ? ញន កា សារ អា ហង បះ អ៊ែ ឡាំ ប៉ាគ់ អា ភឿ ណាំង រ៉ុប អន់ឌែ ជឹន អន់ កា មួត ម៉ៃគ ក្រាគ់ រ៉ាម៉ះ ប៉្រ័ះ ដេល»។
២២ យ៉័ះ នីចម័ កាតាម សូល ហ៊ែង ទី ពុត ខឹន កាខាក់ អ៊ែ រ៉ះ ប៉ាឡាក់ កា សុនសាត អ៊ីស្រាអ៊ែល ឡាក់ អ្វៃ កាណុង មឿង ដាម៉ះ ណោះ ផា យីស៊ូ អា ហង ឃឺ បក់ ប៉្រ័ះ រ៉ើស អន់ ប៉្រគ័ សាដាច់ ណោះ ប៉្រគ័ អន់ អន់ឌែ អូ អ្លុ តើល អុះ។
២៣ ប៉ាគ់ ទុញ ដារ់ ឡឹង ណោះ ណាវ្គ មួត សុនសាត អ៊ីស្រាអ៊ែល ពឹកសា គួប សោប ភឿ ចឹង ប៉ាន់តោ័ អ្លាត សូល។
២៤ ហះកា សូល អ្លុ ដេល សារ អន់ឌែ ឃឹត ណោះ។ អន់ឌែ អ្វៃ ក្យាគ់ ហះ អំប៉ារ ទ្រួក មឿង ទឹប កាម៉ាំង ទឹប កាដារ់ ភឿ ចឹង ប៉ាន់តោ័ អ៊ែ។
២៥ ហះកា ប៉ាគ់ កាម៉ាំង មួត សឹះ អ៊ែ អ្យក់ ពុង ម៉ោញ ប៉្រើ សូល ម៉ុត អ្វៃ កេះណោះ ប៉ាហ្រូ ជឹរ ឡឹង ទ្រួក គែង ឡីង មឿង។
សារ សូល ឡាំ អ្វៃ ប៉ាគ់ មឿង យេរូសាឡឹម
២៦ កេះណោះ សូល ឡាំ ប៉ាគ់ មឿង យេរូសាឡឹម ផះ អ្វៃ ប៉ាគ់ ណោះ អ៊ែ ខំ ប៉ិច ម៉ុត អ្វៃ អន់ឌូ លូ មួត សឿ យីស៊ូ ដេល ហះកា ពូ អ្យូគ កា អ៊ែ ទិឌូ ខង ពូ អូ សឿ ផា អ៊ែ សឿ យីស៊ូ អុះ។
២៧ ហះកា បាណាបះ អ្យក់ សូល ប៉ាណាំ អ៊ែ ឡាំ ប៉ាគ់ មួត រ៉ះ ប៉ាតាង យីស៊ូ លូ រ៉ះ កា ពូ ឡឹង សារ សូល ប៉ប័ យីស៊ូ ផះ អ៊ែ ចាក រទ្រង ពែ លូ សារ យីស៊ូ កាកាប លូ អ៊ែ លូ រ៉ះ សារ សូល ខឹន រ៉ះ សារ យីស៊ូ ផះ អ្វៃ ប៉ាគ់ មឿង ដាម៉ះ ពែ ដេល។
២៨ សូល កា អ្វៃ អន់ឌូ លូ មួត រ៉ះ ប៉ាតាង យីស៊ូ លូ ចាក សឹត ចាក ឡាំ កាណុង មឿង យេរូសាឡឹម ទឹប ទី ពុត ខឹន រ៉ះ សារ យីស៊ូ ដេល។
២៩ អ៊ែ កាប ប៉ាគែក លូ សុនសាត អ៊ីស្រាអ៊ែល ឡាក់ កាប សុនសាត ក្រិក ហះកា មួត ណោះ ប៉ាណាំ គួប ប៉ិច ប៉ាន់តោ័ អ៊ែ។
៣០ ប៉ាគ់ មួត សឿ អ្លុ ឡឹង សារ អា កេះ អន់ឌែ ឡាំ ជឹន អ៊ែ គឹត មឿង កេសារៀ កេះណោះ អន់ អ៊ែ ឡាំ ប៉ាគ់ មឿង តើសុះ ណាវ្គ។
៣១ ក្រុំ ហៀន សារ ប៉្រ័ះ ទី សារ សាណុក សាវ៉ាក គ្រឹប ចារ កាណុង ខេត យូដា ខេត កាលីឡេ លូ ខេត សាម៉ារី លូ អន់ឌែ សឿ ហ៊ែង ខាក់។ អន់ឌែ ទី ចំលួន ហ៊ែង អៀង ញន កា អន់ឌែ អ្វៃ អ្យិល កូត័ កា ប៉្រ័ះ ប៊កកាតយ័ លូ ញន កា ប៉ាង៉ាត័ ប៉ាលឹង ប៉្រ័ះ ដាគ់ កាខាក់ តង័ អន់ឌែ អន់ ទី ពុត ខឹន។
សារ ពេត្រុះ តាគ់ អន់ដាគ់ អេណាស
៣២ កាប៉ាច់ ពេត្រុះ ចាក ឡាំ គ្រឹប ចារ លូ ឡាំ ច្វាគ់ មួត សឿ យីស៊ូ ប៉ាគ់ តេះ លីដា។
៣៣ ហះ ចារ ណោះ អ៊ែ ប៉ប័ ប៉ាណូស ម៉ោញ ដូវ សិច អេណាស អ៊ែ អីគ តោ័ ជុង តី លូ តៃប លើយ ទុញ តាំងហាម សាណាំ កេះ។
៣៤ ពេត្រុះ រ៉ះ កា កាម៉ាក័ ណោះ ផា «អឺ អេណាស យីស៊ូ គ្រិះ អ៊ែ តាគ់ អន់ដាគ់ អីស កេះ ហគ់ អ្យូវ ឡគ តាមួរ ពេល អីស អា ពិ»។ អេណាស កា អ្យូវ ឡូត។
៣៥ កាំឡាំង កាណុង តេះ លីដា ទិណោ័ះ លូ កាំឡាំង ស្រុក អ្វៃ រចារ សារ៉ូន ប៉ប័ អ៊ែ ដាគ់ នីណោ័ះ ពូ កា ប៉ិនពែង ពុត ពៀក សឿ ប៉្រ័ះ ប៊កកាតយ័។
សារ តេប៊ីថា រ៉ីស សឹត ណាវ្គ
៣៦ ពឹង មឿង យ៉ុបប៉ា ទី អង់កាន់ ម៉ោញ ដូវ ឡាក់ សឿ យីស៊ូ សិច អ៊ែ តេប៊ីថា (ទី ណី ផា «រ៉ាម៉ាំង») អ៊ែ ប៉្រគ័ ដាគ់ លូ អន់ កាណាគ័ កា ពូ អៀង។
៣៧ ផះ រ៉ាំងវ៉ាង ណោះ អ៊ែ អីគ កេះណោះ តោ័ ពូ តាគ់ អង់ហុំ ប៉ាទ្រូ អ៊ែ កេះៗ ពូ អ្យក់ ចៃគ ពឹង កាណុង គែង អំប៉ាំង។
៣៨ ញន កា តេះ លីដា ក្យាម័ មឿង យ៉ុបប៉ា ណោះ ហង ប៉ាគ់ មួត សឿ កាតាំង លៅ ផា ពេត្រុះ អ្វៃ ពឹង តេះ លីដា ណោះ អន់ឌែ កា ប៉្រើ គួប អន់ឌែ ពៀរ ដូវ ឡាំ ឡោម ពេត្រុះ ផា «ប៉រ់ អីស ឡាំ ទឹល ប៉ាគ់ ចារ ញឹន ស៊្រសៗ ណើ»។
៣៩ ពេត្រុះ កា ឡាំ លូ អន់ឌែ ពៀរ ដូវ ណោះ ឡូត។ ប៉ាគ់ អ៊ែ ទឹល កេះ ពូ ជៀក អ៊ែ ហាវ អ្វៃ ពឹង កាណុង គែង អំប៉ាំង។ មួត អង់កាន់ អន់ត្រោ័ ប៉ាណាំ គួប ម៉ុត ក្យាម័ អ៊ែ ទឹប ញ៉ាំ សោក លូ តាំបាង អាវ សាំប៉ាក័ លូ អាវ គ្រឹន ឡាក់ តេប៊ីថា ទី ជិង អន់ ផះ អ្វៃ អន់ឌូ លូ អន់ឌែ ពែ។
៤០ ពេត្រុះ ប៉្រើ ពូ ឡាច់ ប៉ាគ់ ឡីង ទិឌូ អ៊ែ ជន តាកុល ម៉ន់ ឡោម ប៉្រ័ះ កេះណោះ កាលែង ប៉ាគ់ ប៉ាទ្រូ លូ កាប ផា «អឺ តេប៊ីថា អ្យូវ ពិ»។ អង់កាន់ ណោះ កា រ៉ាល ម៉ាត់ ផះ អ៊ែ ប៉ប័ ពេត្រុះ កា អ្យូវ អង់អ្វៃ ឡូត។
៤១ ពេត្រុះ ចឹក តី អ៊ែ អន់ អ្យូវ អន់តាវ កេះណោះ អើ មួត សឿ យីស៊ូ លូ មួត អង់កាន់ អន់ត្រោ័ ម៉ុត ប៉ាគ់ អ៊ែ កេះណោះ អន់ អន់ឌែ ប៉ប័ តេប៊ីថា រ៉ីស សឹត កេះ។
៤២ ប៉ាណូស កាណុង មឿង យ៉ុបប៉ា អៀង ដូវ អ្លុ ឡឹង សារ អា លូ ទី ប៉ាណូស អៀង ដូវ សឿ យីស៊ូ។
៤៣ ពេត្រុះ កា អ្វៃ ពឹង មឿង យ៉ុបប៉ា ទុញ ដារ់ ណាវ្គ អ៊ែ អ្វៃ ពឹង ហី ស៊ីម៉ូន ឡាក់ ប៉ាណូស រ៉ាវ រ៉ាន់ដាប់ អង់ការ អ្យាំ ។