Mepepelime a̱ tyo ya
Mmaci ma Ibrahim
Ucuɗuwu wa aatagada a nda
Tsu reve vuma na ɗanai mepepelime ma nda shi. U ta gura wo oꞌwo Bulu aajiya a ɗa ɗana niyi. Tsu reve ta̱ u ta̱ pe a̱tsuma̱ a Adanshi a̱ A̱sula̱ adama o uritosu u na u ri na̱ a̱yi cuꞌun vu uritosu u na u ri pe a̱tsuma̱ a Adanshi a̱ A̱sula̱ ɗa. Waru nu ujimu azagbain a̱ a̱a̱ꞌisa̱ a̱ usu yi ta̱ fo a̱tsuma̱ a Aatagada a̱ A̱sula̱. Za na ɗanai aatagadaꞌa u cuɗuwa ta̱ cine mayan ma̱ a̱ga̱nda̱ ma aza a Israꞌila mo oꞌwoi iroci ya̱ a̱ga̱nda̱ ya amayun a na ri pe a̱tsuma̱ a Zamawawa.
Za na ɗanai mepepelime ma nda ma damma ta̱ a̱za̱ e ɗesununa̱ cine Yesu ri na̱ a̱ɓula̱. Yesu laꞌa ta̱ nlingata ma̱ A̱sula̱ suru. Waru u laꞌa ta̱ ama̱sula̱, waru u laꞌa ta̱ Musa. A̱yi ɗa ganu gbain na ri uka̱la̱mu shi waru koto u yuwan unusu shi ko keꞌen, waru a na u cayi wuma wa̱ yi u ca ta̱ kucci adama o unusu o una̱ u mantsa suru. Ana u kuwa̱i a̱vu u ka̱mba̱ wuma u kpa̱tuꞌwa̱ ta̱ ure adama ama a̱ tsura̱ ure u na a rawa uba̱ta̱ wa̱ A̱sula̱.
E ekere a ama a na e revei adama a̱ kucci a̱tsuma̱ a̱ a̱dini, aatagada a Mmaci ma Ibrahim a̱ ta̱ nu uritosu wu ucira. Yesu Zamawawa zuwa ta̱ kucci suru wo oꞌwo ili ye pere. Amma gogo ucawu wo okolo a̱tsuma̱ a̱ yi a̱yi ɗa ili i na i kpa̱tuꞌwa̱yi ama ure a̱ tyo uba̱ta̱ wa̱ A̱sula̱.
Ili i na i ri pe a̱tsuma̱ a aatagada a nda
1. Tsugbain tsa Mawun ma̱ A̱sula̱ (1:1-4)
2. Yesu laꞌa ta̱ nlingata ma̱ A̱sula̱ suru suru (1:5–2:18)
3. Yesu laꞌa ta̱ Musa na̱ Josuwa (3:1–4:13)
4. Yesu ɗa Ganu Gbain (4:14–7:28)
5. Yesu ta̱wa̱a̱ ta̱ na̱ nzuwulai n na n laꞌai ulobonu (8:1–9:22)
6. Kucci va̱ Yesu u ta̱ u ɗa waru a̱yi ɗa ne (9:23–10:31)
7. Ama a̱ A̱sula̱ a na a̱ da̱na̱i nu ucawu wo okolo (11:1-40)
8. Vu toni iroci ya̱ Yesu Zamawawa (12:1–13:19)
9. Avasa o ukosu ni ica̱su (13:20-25)
1
Yesu Zamawawa Mawun ma̱ A̱sula̱ ma ɗa
Ɗe nu ufaru, A̱sula̱ a yuwusaan ta̱ nkaya n tsu adanshi o una̱ wa ama̱sula̱ na̱ re kokoꞌo. Amma a mantsa mo ukosu ma nda, A̱sula̱ a yuwan ta̱ adanshi na̱ a̱tsu e ekere a Mawun ma̱ yi. A̱sula̱ a yuwan ta̱ uvaɗi ni ili i na i ri pe a̱tsuma̱ a̱ yi suru e ekere a̱ yi. A̱yi ɗa A̱sula̱ a ɗangwai wo oꞌwo za vi ili suru. Mawuꞌun u roco ta̱ ekan adama a tsugbain tsa̱ A̱sula̱, u rotso ta̱ A̱sula̱ foyi. U zuwa ta̱ ili i lyuwa elime nu ucira wi ikaka ya̱ yi. Ana Mawuꞌun u ka̱mba̱toi ama cece a̱tsuma̱ a̱ nusu le, u da̱nu ta̱ o ukere usaꞌani wa̱ A̱sula̱ Mogono me Ili Suru.
Yesu Zamawawa laꞌa ta̱ nlingata ma̱ A̱sula̱
A̱yi Mawuꞌun u laꞌa ta̱ nlingata ma̱ A̱sula̱ lon. Reve A̱sula̱ a ca yi a̱ba̱jini a aala a na a laꞌai ala e le.
Ili i na i zuwai a̱yi ɗa A̱sula̱ a yuwaan nlingata ma̱ A̱sula̱ adanshi e ili i ro tsa na u yuwayin Mawuꞌun shi,
“Mawun ma̱ va̱ ma ɗa vu ri.
Anaꞌan mo oꞌwo ta̱ Dada va̱ wu.”
A̱sula̱ a dammisa ta̱,
“N to oꞌwo Dada va̱ yi,
waru a̱yi u to oꞌwo Mawun ma̱ va̱.”
Ana A̱sula̱ a̱ shi a cigai u lyungu magaji ma̱ yi a̱ tyo o uvaɗi, u damma ta̱,
“Nlingata ma̱ A̱sula̱ suru a ciga a ꞌyuwan a yuwaan yi a̱ga̱nda̱.”
Apa ili i na A̱sula̱ a dammai adama a nlingata ma̱ yi,
“Mo oꞌwoto ta̱ nlingata n va̱ tsu upepu.
Mo oꞌwoto ta̱ agbashi a̱ va̱ tse elentsu a akina.”
Agba apa ili i na A̱sula̱ a dammai adama a Mawun ma̱ yi,
“A̱vu A̱sula̱ a ɗa, waru tsugono tsa̱ wu tsa̱ ri nu ukosu shi.
Vu ta yuwan tsugono nu ugeꞌetosu u na wu ntsayi.
Vu ciga ta̱ ili i mejege reve vu ꞌyuwan iwuya.
A̱yi ɗa i zuwai A̱sula̱, A̱sula̱ a̱ wu, a ɗangwa nuwu,
reve u ca wu tsugbain tsa na tsa zuwa nuwu vu za̱nga̱na̱i.
A̱yi tsugbain tsa nda u laꞌa ta̱ za na u cayi akapi e le.”
10 A̱sula̱ a dammisa ta̱,
“Zagbain, a̱tsuma̱ o ufaru vu yuwan ta̱ uvaɗi,
waru ekere a̱ wu a ɗa a yuwain zuva.
11 Mantsa ma̱ ta̱ ta̱wa̱ ana za ro enishe le shi,
A̱ ta̱ kuna̱ suru tsa amuna.
Amma a̱vu vu ta̱ da̱na̱ lo.
12 Vu ta̱ kutsulu le cine a̱ tsu kutsulu akuci a amuna.
A ta vadala tsa akuci e itana.
Amma a̱vu gba ne ɗa va̱a̱ da̱na̱ kuci mantsa suru,
wuma wa̱ wu waru woo koto shi.”
13 A̱sula̱ a yuwaan nlingata ma̱ yi adanshi cine u yuwayin Mawun ma̱ yi shi,
“Da̱nu pa o ukere usaꞌani u va̱
she na̱ n zuwa nꞌyuwatan
ma̱ wu mo oꞌwo uzuwata wa ana a̱ wu.”
14 Nlingata ma̱ A̱sula̱† suru nan ruhu ɗa na aa yuwusaan A̱sula̱ a̱ga̱nda̱, waru u lyungu le ta̱ tsa̱ra̱ a kamba aza a na a̱a̱ ushi iwawi.†
1:5 Ica 2:7; 2 Sam. 7:14. 1:6 U.Wl. 32:43. 1:7 Ica 104:4. 1:9 Ica 45:6-7. 1:12 Ica 102:25-27. 1:13 Ica 110:1.