10
Õꞌacʉ̃rẽ werecoꞌtegʉ papera turiacã meꞌrã nuꞌcũse niꞌi
1 Beꞌro apĩ Õꞌacʉ̃rẽ werecoꞌtegʉ tutuagʉ ʉꞌmʉsepʉ níꞌcʉre dijaticã ĩꞌawʉ̃. Cʉ̃ oꞌmecurua decopʉ dijatiwĩ. Cʉ̃ dʉpoa buꞌi buꞌeda niwʉ̃. Cʉ̃ ya diapoa mujĩpũ ʉmʉcocjʉ̃ weronojõ asistewʉ. Cʉ̃ ñecãrĩ ʉ̃jʉ̃sébotari weronojõ bajuwʉ.
2 Cʉ̃ omocãpʉ papera pã́áca turiacãrẽ cʉowĩ. Cʉ̃ diacjʉ̃ca dʉꞌpocãrẽ pajiri maajopʉ ʉꞌtacũunuꞌcũwĩ. Cũpe peꞌere diꞌtapʉ ʉꞌtacũunuꞌcũwĩ.
3 Cʉ̃ topʉ nuꞌcũgʉ̃ yaijo weronojõ pũrõ caricũwĩ. Cʉ̃ caricũcã, siete bʉpoa ucũwã.
4 Na ucṹca beꞌro na ucũsere ojanʉꞌcãmiwʉ̃. Tojo weeri cura niꞌcʉ̃ ʉꞌmʉsepʉ nigʉ̃́ yʉꞌʉre niwĩ:
—Na bʉpoa ucũsere ãpẽrãrẽ wereticãꞌña. Ojaticãꞌña tere, niwĩ.
5 Beꞌro yʉꞌʉ dia pajiri maapʉ, diꞌtapʉ nuꞌcũcã ĩꞌaꞌcʉ cʉ̃ ya diacjʉ̃camocãrẽ sĩomorõwĩ.
6 Cʉ̃ aꞌtiro niwĩ:
—Õꞌacʉ̃ catinuꞌcũgʉ̃ nimi. Ʉꞌmʉse, diꞌta, pacase maarĩ nipeꞌtirã tepʉ nirãrẽ weeꞌcʉ nimi. Õꞌacʉ̃ wãme meꞌrã nigʉ̃ti. Marĩ yucueꞌque peꞌtia waꞌaꞌa. Yucuenemosome.
7 Õꞌacʉ̃rẽ werecoꞌtegʉ nitʉogʉ putinʉꞌcãrĩ curare aꞌtiro waꞌarosaꞌa. Õꞌacʉ̃ “Tojo weegʉti” níꞌque masĩnoꞌña marĩꞌque waꞌabaqueꞌorosaꞌa. Cʉ̃, cʉ̃ ye queti weremʉꞌtãrĩ masãrẽ “Aꞌtiro weegʉti” níꞌque queoro waꞌarosaꞌa, niwĩ.
8 Cʉ̃ tojo níca beꞌro ʉꞌmʉsecjʉ̃ yʉꞌʉre “Ojaticãꞌña” níꞌcʉ aꞌtiro niwĩ:
—Sĩꞌi, maajopʉ, diꞌtapʉ ʉꞌtacũunuꞌcũgʉ̃ tiropʉ waꞌaya. Cʉ̃ ya turi pãaca turiacãrẽ miiña, niwĩ.
9 Cʉ̃ tojo nicã tʉꞌogʉ, yʉꞌʉ cʉ̃ tiropʉ waꞌawʉ.
—Mʉꞌʉ ya turire oꞌoya, niwʉ̃. Yʉꞌʉ sẽrĩcã tʉꞌogʉ, aꞌtiro niwĩ:
—Miiña. Ti pũrĩrẽ baꞌaya. Mʉꞌʉ baꞌacã, mumia mumi weronojõ iꞌpitirosaꞌa. Mʉꞌʉ paagapʉ peꞌere sʉ̃ꞌese dojorosaꞌa, niwĩ.
10 Cʉ̃ tojo nicã tʉꞌogʉ, yʉꞌʉ ti turiacãrẽ miiwʉ̃. Mii, baꞌawʉ. Yʉꞌʉ baꞌacã, mumi weronojõ iꞌpitiwʉ. Paagapʉ peꞌere sʉ̃ꞌe nicãti.
11 Beꞌro Õꞌacʉ̃rẽ werecoꞌterã yʉꞌʉre niwã:
—Õꞌacʉ̃ cʉ̃ ucũsere wereapogʉ waꞌaya tja. Cʉ̃ peje macãrĩcjãrãrẽ, peje diꞌtacjãrãrẽ, mejẽcãrĩ ucũrãrẽ na ye cjasere weremi. Tere weregʉ waꞌaya. Tojo nicã wiorã quẽꞌrãrẽ “Õꞌacʉ̃ tojo niami”, ni wereya, niwã.