☰ Revelesen 4
4
Holesok xil te ut nesao lasa memesien ba mi Hi
1 Melele xa nanggur sepinien ak bus, napus kil neta teimun nggo metuveen. Napus puiteh tei e ut nesao xa misaha. E rae xa nateong ni diamu xa misel nggeih nggoni amaru, xi biteni minou bit, “Amei nesao xalei tengan nipisen ni minuk naha xa istal e melengien xil xa ti imei.” ✡ 2 Vatakes, Ninin na Hi mise xat nou e napus ngan xa di dotan de von xeihen te ut nesao. ✡ 3 Tenben minehin holu nggoni hat hos xil xa laminehin melele xa laet pili di en xa kala nen nggoni hat xalu xa lakes xalu ni saspa e kanilian. E mikapis xol von xeihen nan, napus hinehin tei xa minehin nggoni hat hos xa lakesi ni emeral. ✡ 4 E mikapis xol von xeihen nen ak, napus von totanen sav xil mun xa labe hanutap tei e hat mun (24). E elda hanutap tei e hat mun (24) di ladotan en xa lasing ni eising xa mieh e vat luvoluv te lelaxatien xa lapol ni ni gol di vatixil. ✡ 5 E nggo von xeihen xa eilep, an di milangas e veta di mirum. Pe met ngan xa dotan en, laet lu e he sav (7) na Hi di pili de pos nen xil. Laet xil ak labe Ninin lu e he sav (7) na Hi. ✡ 6 ✡E tan xa von xeihen xa eilep da en mahulong pupu e mexal nggoni tas, e napusi di minehin nggoni kilas xa laet di pili da en. ✡
Di, napus neta hat (4) xa lameul ladi e rin hat (4) te von xeihen ak, e metexil ladi xorelis rute xil vus te tenbexil. 7 Ngan xa diamu ni xil, napusi nggoni laeon. Ngan xa be lu e xil, napusi nggoni bul. Ngan xa be tol e xil, napus valnaon nggoni valnao moletin. E ngan xa be hat e xil, napusi nggoni vevaxum xa di mingga. 8 E xil kekes, aveouxil tei e he sav (6) di en, e metexil ladi xorelis rute xil vus te tenbexil.✡ E vongien e melengien xil vus, latangel ni ti sisien ak xa bit,
“Eo, eo, eo,
be Hi Suv te Xeihen.✡
Teta tetiamu, da xosali,
e ita e melengien xil xa ti imei.”✡
9 Neta hat (4) xa xiak xa lameul di lapet rat his ngan xa dotan de von xeihen nan e di lasa merereen e memesien nae mini, mi xi xa da xa da, e nakesae ti vatova. E melele xa lapol ni mak, ✡ 10 elda xil xa labe hanutap tei e hat mun (24) lamot labe tan mi ngan xa dotan de von xeihen xa eilep, ngan xa da vehakut tang. Pe meten, laleh rerat vat luvoluv te lelaxatien nae xil, e lasa ni mini tengan lapisen merereen nae mini. E melele xa di lapol ni, labiteni labit,
11 “!O Hi, xouk obe Suv namem!
Opin tengan ti masa merereen minuk,
e mapus kil minehinen te xeihen nam xa be mahulong pupu,
vengan otepeas vuol ni holesok xil vus.
Reitin, nggusil nenemien nam,
otesak ni holesok xil vus mei lastal e lameul ladi.”
✡ 4:1 Eks 19:20,24; Dan 2:28,29,45; Rev 1:1,19 ✡ 4:2 1King 22:19; 2Kron 18:18; Sam 47:8; Aes 6:1; Esek 1:26-27; Rev 4:9; 5:1,7,13; 6:16; 7:10,15; 19:4; 21:5 ✡ 4:3 Esek 1:26-28 ✡ 4:4 Aes 24:23; Rev 3:5,18; 6:11; 7:9,13; 19:14 ✡ 4:5 Eks 19:16; Esek 1:13; Rev 8:5; 11:19; 16:18; Esek 1:13; Sak 4:2; Rev 1:4; 5:6 ✡ 4:6 Esek 1:5-10; 10:14 ✡ 4:6 Esek 1:22 ✡ 4:8 Aes 6:2; Esek 1:18; 10:12 ✡ 4:8 Aes 6:3; Amos 3:13; 4:13; Rev 1:8; 11:17; 15:3; 16:7,14; 19:6,15; 21:22 ✡ 4:8 Aes 41:4; Eks 3:14; Rev 1:4,8; 16:5 ✡ 4:9 1King 22:19; 2Kron 18:18; Sam 47:8; Aes 6:1; Esek 1:26-27; Rev 4:2; 5:1,7,13; 6:16; 7:10,15; 19:4; 21:5; Dan 4:34; 6:27; 12:7
☰