11
Manetualain mana toꞌu dedeꞌan dua ta hohoꞌak
1 Basa boe ma ara soro fee au ai uꞌukuk esa, narun sama leo teteꞌe ai. Boe ma Manetualain parenda au nae, “Yohanis, mambadeik leo fo muu uku Au Uma Huhule-haradoi Ina-huung no mei tunu-hotung nai kota Yerusalem. Ma reke basa hatahorir mana hule-haradoik marai naa.
2 Tehuu hae uku Uma Huhule-haradoik naa bebelan, huu mamanak naa neni loo limak soa-neu hatahori nusa-nusak laen nara ena fo ta mana ralela Au. Neu ko ara mai momolo-tatabu tao ranggenggeo Au kotang naa, losa bulak 42 (ndia faik 1.260).
3 Neu ko Au adenu Au hatahoring dua rai naa, fo ara dadi reu au mana toꞌu dedeꞌang. Neu ko ara pake bua-loꞌa sususak ma rafada Au hara hehelung, losa faik 1.260 naa basa sara ena.”
4 Manetualain mana toꞌu dedeꞌan Sakaria surak memak kana numa lele uluk mai ena, laꞌe-neu mana toꞌu dedeꞌa kaduak kara iar. Ana lole sara pake nggambar ai setun huuk dua ma mamana netetende lambu dua fo mana rambariik rasare Manetualain, fo naena haak parenda basa hatahorir marai dae-bafok.
5 Mete ma hambu hatahorir nau rakasosoek Manetualain mana toꞌu dedeꞌa kaduan nara ia, na, neu ko aꞌi kalua numa sira bafan nara mai fo tao nakade basa sira musun nara. No dalak naa, basa hatahorir fo mana nau rakasususak kasa, neu ko mate sara.
6 Neu faik fo dua sara dadi reu Manetualain mana toꞌu dedeꞌan nai dae-inak, Ana fee sara koasa fo kena udan. Ana oo fee koasa fo tao oe matak dadi neu daak, ma koasa fo neni sosoek mata-matak nai dae-inak ia, tungga kada sira hihiin nara boe.
7 Mete ma sira fain fo rafada Manetualain hara hehelun nara basa ena, na, neu ko banda kakiki-kakaak esa kalua numa bolo doidosok fo ikon taak naa mai. Ana natati laban dua sara, losa nasenggi ma nakanisa sara.
8-9 No dalak naa, dua sara mate numa kota moꞌok fo fai bakahulun hatahorir rakanisa sira Lamatuan numa ai ngganggek. Kota naa, dadi kota manggarauk ena sama leo Sodom ma Masir tembo uluk. Neu ko hatahori nggari heni mana toꞌu dedeꞌak kara raa ao-mbaa mamaten nara reu dalak, losa faik telu seserik. Boe ma hatahorir ruma basa leor, basa hatahori nusak kara, basa dedeꞌak kara, ma basa nusak kara mai ranilu ao-mbaa mamates kaduak kara raa. Ara oo ta fee luas fo ratoi sara boe,
10 nahuu ara ramahoko mete-rita hatahori kaduak kara raa mate sara ena. Huu dua sara ndia soa tao babalik basa hatahorir marai dae-inak duduꞌa manggaraun. De ara tao feta rame-rame, ma esa haitua fee esa hadia.
11 Tehuu basa faik telu seserik, neu ko Manetualain fee sara ani hahaek, fo ara rasoda fali. Boe ma basa hatahorir fo mana mete-rita sara, dere faku-faku.
12 De mana toꞌu dedeꞌa kaduak kara raa neu ko ramanene hara maherek esa numa lalai mai, fo nadenu sara nae, “Wee! Ei dua ngga hene lain ia mai leo!” Boe ma dua sara neni soꞌuk lalai reu no sosoꞌak mboti nala sara. Ara mete-rita talo naa, boe ma musun nara bafa bese mboo.
13 Medak neu ma, dae nanggenggo nalan seli. Mete ma ita reke basa umar marai kota, numa uma salahunu mai hambu esa ndia ndefa henin. Ma hambu hatahori rifun hitu mates sara. Hatahori laen ta mana matek kara ramataꞌu ralan seli. Tehuu neu ko ara oo fee hada-horomatak neu Manetualain boe, nahuu Ana ndia toꞌu parenda nai nusa tetuk do inggu temak.
14 No dalak naa, sosoek nomer kaduan laꞌo seli ena. Tehuu besa-besa, ee! Sosoek nomer katelun sangga mai ena.
Fuu toꞌik nomer kahitun — Manetualain no Yesus Karistus toꞌu parenda nai dae-inak
15 Basa naa, Manetualain ata nomer kahitun numa nusa tetuk do inggu temak mai fuu ndia toꞌin. Medak neu ma, au amanene harak noꞌun seli ruma nusa tetuk do inggu temak mai rae,
“Hatematak ia mana toꞌu parenda nai dae-inak,
kada Manetualain no Karistus,
ndia Manetualain Hatahorin fo Ana here nalan numa lele uluk mai ena.
Neu ko Manetualain toꞌu parenda-koasa nakandoo sama leo Manek, losa doon naa neu.”
16 Mane leo kadua hulu haak kara raa fo mana ranggatuuk rai kadera man-parendar marai Manetualain matan naa, ara oo ramanene harak kara raa boe. Boe ma ara sendek luu-langgan nara losa idu-matan nara laꞌe daer, fo koa-kio neu Manetualain,
17 ma soda-helo rae,
“Oo, Manetualain!
Ai Lamatuan!
Manetualain ndia parenda basa-basan.
Manetualain ndia toꞌu koasa basa-basan.
Manetualain ndia nasoda numa lele uluk mai.
Manetualain ndia nasoda hatematak ia.
Ai moke makasi neu Manetualain,
nahuu Manetualain pake koasa moꞌon ena,
fo toꞌu parenda nai dae-inak.
18 Tehuu hatahori nusa-nusak kara ramanasa,
huu ara ta nau tungga Manetualain.
Tehuu hatematak ia Manetualain oo namanasa boe,
nahuu ara ta nau ralela sana.
Hatematak ia fain losa ena,
fo Manetualain huku-doki hatahorir fo ta mana tao matak neu Ndia.
Hatematak ia fain losa ena,
fo Manetualain nakalulutu hatahori fo mana nakalulutu hatahori laen.
Hatematak ia fain losa ena,
fo Manetualain parisa hatahori mates sara dedeꞌan.
Hatematak ia fain losa ena,
fo Manetualain bala hatahori neondan nara mbuse titin.
Ndia, Manetualain mana toꞌu dedeꞌan nara,
ma Manetualain hatahorin nara,
moꞌo-kadiꞌik, lasi-murik.
Manetualain bala basa hatahorir,
fo mana fee hada-horomatak neu naden.”
19 Basa naa, au mete-ita nai nusa tetuk do inggu temak, Manetualain Uma Huhule-haradoin lelesun neni soik. Boe ma au mete-ita peti fo fai bakahulun ara paken mbeda Manetualain parendan neni surak nai batu lain. Boe ma ndelas sara tee reu-mai, lalai nasapaparak natuti-nanatok, dae-inak nanggenggo, ma uda eis batu mambera tuda numa lalai mai.