19
Mana soda bubua moꞌok esa soda-helo numa nusa tetuk do inggu temak
1 Manetualain atan naa kokolak basa talo naa, boe ma au amanene hara moꞌok nok bali mana soda bubua moꞌok esa soda-helo numa nusa tetuk do inggu temak dale. Ara soda-helo rae,
“Haleluya! Haleluya!
Ita koa-kio ita Manetualain,
nahuu Ndia ta neni babanggak meteꞌen.
Haleluya! Haleluya!
Ita koa-kio ita Manetualain,
nahuu Ndia mana koasa mateꞌen.
Manetualain ndia tao nasoi-nasoda ita,
numa ita sala-singgon nara mai.
Manetualain ndia tao natetu-nandoo ita,
numa ita peko-pakin mai.
2 Ita koa-kio Manetualain,
nahuu Ana naketu-naladi dedeꞌak no matetuk.
Ita koa-kio Manetualain,
nahuu Ana ndia natuda huku-dokik fo ta mbeu seserik.
Manetualain natuda huku-dokik neu ina petak naa ena,
nahuu ana soa fufudi-hohodo hatahorir rai dae-bafok,
fo tungga hohongge-lelena sama-sama roon,
ma tungga ndia tatao-nonoꞌi manggaraun.
Manetualain bala ina manggarauk naa ena,
nahuu ana soa nakanisa
Manetualain hatahori neondan nara.”
3 Basa naa, ara soda-helo sosodak laen bali nai nusa tetuk do inggu temak rae,
“Haleluya! Koa-kio Manetualain!
Haleluya! Makadedemak Ndia naden!
Huu aꞌi masuk numa aꞌi fo mana naꞌa inak naa ao-mbaa mamaten naa,
masun hene nakandoo ta nateꞌe-nateꞌe.
Ma aꞌi masuk numa aꞌi fo mana naꞌa kota ta hohoꞌak naa,
masun hene nakandoo ta basa-basa.”
4 Basa boe ma mane leo kadua hulu haak kara raa ro horis ta hohoꞌak kahaak kara raa, sendek luu-langgan nara fo rakaluku-rakatele rasare Manetualain kadera man-parendan. Ara fee hada-horomatak neun rae,
“Tebe! Mai fo ita koa-kio Manetualain!
Haleluya! Mai fo ita takadedemak Ndia naden!”
Bibi Lombo Ana feta kabin
5 Boe ma au amanene harak esa bali numa kadera man-parenda naa mai nae,
“Wee, Manetualain hatahori neondan nara ein!
Wee, Manetualain anan nara ein!
Mai fo ita takadedemak Manetualain naden.
Mai fo basa moꞌo-kadiꞌik koa-kio neu Ndia.”
6 Basa de au amanene nok bali hambu hatahori noꞌuk ka kola-kola. Haran nara lii moꞌon seli nok bali oe totolik, ma nahere sama leo lalai nasapaparak natuti-nanatok. Ara kokolak rae,
“Haleluya! Ai koa-kio Manetualain.
Haleluya! Ai makadedemak Ndia naden.
Huu Ndia mana koasa mateꞌen.
Ma Ana ndia parenda basa-basan.
7 Hatematak ia ita dalen nara ramahoko ena.
Hatematak ia ita dalen nara mbena sau-sau ena.
Ita koa-kio neu Ndia,
nahuu Bibi Lombo Ana fai kabin losa ena.
Ita takadedemak Ndia naden,
nahuu baroit inak fo nae dadi neu Bibi Lombo Ana saon naole nala ena.
8 Manetualain feen bua-loꞌa baroit numa tema bangganaꞌuk mai ena.
Manetualain feen bua-loꞌa muti manggadilak ena.”
(Bua-loꞌa muti manggadilak naa, ndia Manetualain hatahorin nara tatao-nonoꞌi neulaun nara.)
9 Boe ma ata numa nusa tetuk do inggu temak mai naa nafada au nae, “Yohanis! O muste surak talo ia:
‘Basa hatahorir lalaꞌen fo mana hambu nonokek reni Bibi Lombo Ana feta kabin reu naa, neu ko raua ralan seli!’ ”
Basa de ata naa tuti kokolan bali nae, “Manetualain Dedeꞌa-kokolan ia, memak tebe!”
10 De au sendek luu-langgang fo akaluku-akatele neu Manetualain atan naa. Tehuu ana kaꞌi au nae, “O boso makaluku-makatele au talo naa! Huu au oo Manetualain hatahori neondan, sama leo o, ma o toranoom mara fo mana tui-bengga laꞌe-neu Yesus boe. Mana toꞌu dedeꞌak fo nafada Manetualain hara hehelun nara, basa sara oo ratudu neu Yesus boe, mita fo hatahorir rakaluku-rakatele neun. Huu Manetualain Dula-dalen hihii-nanaun talo naa. Dadi boso makaluku-makatele au, tehuu makaluku-makatele neu kada Manetualain!”
Lamatuak Yesus mai saꞌe ndara mutik
11 Boe ma au botik matang, de mete-ita nusa tetuk do inggu temak natahuka. Medak neu ma, au mete-ita ndara mutik esa kalua mai. Hatahori fo mana nanggatuuk nai ndara naa lain, naden, “Hatahori mana Toꞌu Hehelu-bartaak” ma “Hatahori Ndoos”. Neu Ana naketu-naladi dedeꞌak, Ana naketu no matetuk. Neu Ana neni musu dale neu, Ana neu no dale ndoos.
12 Ndia mata deꞌen mbila sama leo aꞌi. Ana pake solangga manek noꞌuk ka nai Ndia langgan. Naden neni surak nai Ndia ao-inan, tehuu kada Ndia mesa kana ndia bubuluk nadek naa sosoa-ndandaan.
13 Bua-loꞌan neni borok neu daak ena. Hatahori roken rae, “Manetualain Dedeꞌa-kokolan”.
14 Au oo mete-ita soldadur ruma nusa tetuk do inggu temak mai boe. Ara saꞌe ndara mutik kara tungga Ndia. Basa sara oo pake bua-loꞌa bangganaꞌuk fo muti ndoos.
15 Hambu tafa tandek esa kalua numa Ndia bafan mai. Ana pake tafa naa, fo neni musu dale neu laban basa hatahori nusa-nusak kara marai dae-inak. De Ana nasenggi sara. Boe ma Ana dadi neu sira Manen. Ana parenda sara no lima besik, losa ara oo rameda rala Manetualain mana koasa mateꞌen nasa-odadedein boe. Naa, sama leo hatahori heheta-tatabu rakalulutu anggor boan fo rumu-keꞌe heni oen.
16 Nai Hatahori naa bua-loꞌan, ma manai mbuun, neni surak talo ia:
Manek neu basa manek kara
Malanggan neu basa malanggan nara.
Lamatuak Yesus nasenggi banda kakiki-kakaak no ndia soldadun nara
17 Basa naa, au mete-ita ata esa numa nusa tetuk do inggu temak mai, nambariik numa ledo lain. Boe ma ana nanggou neu basa mbui kaar mana raꞌa nenetuk fo lambu seku rai lalai nae, “Mai fo ei basa ngga makabubua nai ia leo, fo tungga mai miꞌa Manetualain feta moꞌon!
18 Ei bole miꞌa basa hatahori mates sara nenetun: ndia mane-manek kara, malangga musur ma soldadur. Ei bole miꞌa ndarar ma soldadur mana saꞌe ndarar raa nenetun. Ei bole miꞌa ata-dator do hatahori nekemboꞌik do hatahori kadiꞌi anak do hatahori moꞌo-inahuuk nenetun. Kekeꞌun, ei bole miꞌa basa-basan nenetun.”
19 Basa boe ma au mete-ita banda kakiki-kakaak naa fo fai bakahulun kalua numa tasi dale mai. Ana neu nala harak no basa manek kara marai dae-inak ro sira soldadun nara. Boe ma ara reu ratati laban Hatahori fo mana nanggatuuk nai ndara mutik naa lain, sama-sama no Ndia soldadun nara maruma nusa tetuk do inggu temak mai.
20 Tehuu Hatahori fo mana nanggatuuk nai ndara mutik naa lain, humu nala banda kakiki-kakaak naa, no ndia mana toꞌu dedeꞌan, fo mana pepeko-lelekok. Mana toꞌu dedeꞌak naa, ndia fai bakahulun tao tanda heran mata-matak, fo pepeko-leleko hatahorir fo mana simbo rala banda kakiki-kakaak naa dededen ena, ma songgo-tanggu ndia patong ena. Tehuu hatematak ia, Hatahori fo mana nanggatuuk nai ndara mutik naa lain, neu piru heni banda kakiki-kakaak naa no ndia mana toꞌu dedeꞌan reni tasi aꞌi balerang mana mbila ta kala matek neu.
21 Basa de Hatahori fo mana nanggatuuk nai ndara mutik naa lain, neu nakanisa soldadu laen nara raa, pake Ndia tafan mana kalua numa bafan mai. Basa boe ma mbui kaar mana raꞌa nenetuk kara mai raꞌa heni basa ao-mbaa mamates sara raa.