1 Timotius
Paulus susura kaesan
fee nonoon Timotius
1
Soda-molek
1-2 Timotius fo malole!
Hara masodak numa au mai, Paulus. Manetualain soꞌuk nala au dadi uu Yesus Karistus nedenun ena. Ma ita tamahena a neu Lamatuak Yesus fo mana fee ita leo-laꞌo takandoo toon, nahuu Manetualain tao nasoi-nasoda ita numa ita sala-singgon mai ena.
Timotius! O sama leo au ana heli-heling, nahuu au oo ndia atudu dalak fo o mamahere neu Karistus boe. Au hule-haradoi oke fo Manetualain, ita Aman, ma Yesus Karistus, ita Lamatuan ratudu Sira dale susuen, dale kasian ma fee o leo-laꞌo no mole-damek ma lino-lendek.
Besa-besa mua hatahorir fo mana fee nenorik ta ndoos
Fai maneuk kara, ita dua ngga sama-sama numa kota Epesus. Neu au ae laꞌo uni profensi Makedonia uu, au fufuꞌa o fo mahani nai Epesus. Faik naa, hambu hatahorir tao pangganaa saranik kara ma fee nenori ta ndoos sara. De au oke o muu kaꞌi sara, fo ara boso fee nenorik rakandoo talo naa. Ma hatahorir oo ngganggari heni ledo-fain nara boe, ma reu rasimbo bafak ro tutui lasik fo ta tetebes. Ara oo adu bafa-maan laꞌe-neu tititi-nonosik tututi-nanaton ta mana ketuk boe. Dedeꞌa matak leo naak kara kada tao hatahorir rahuur, ma tao sara ta leo-laꞌo no nemeherek neu Manetualain.
Au fee nenori-nefadak neu o ia, no dale hihiik mita fo manori hatahori kamaherek kara fo leo-laꞌo ro rasue-laik numa dale lolo-laok mai, numa duduꞌa ndoos mai, ma numa nemeherek no dale katematuan mai.
Tehuu hambu meser ketuk fo sio laꞌo dook ma laꞌo ela nenori-nefadak naa ena. Boe ma ara reu ngganggari heni ledo-fair ro rasimbo bafak ma kokolak sadi ndaa. Ara ratudu aon nara rae, sira raa, meser mana fee nenorik laꞌe-neu baꞌi Musa Hohoro-lalanen nara. Ara tao aon nara dadi meser ina-huuk, tehuu ara ta bubuluk hata fo ara fee nenorik naa.
Ita basa ngga bubuluk tae, basa baꞌi Musa Hohoro-lalanen nara, malole. Sadi ita takalalaꞌok kasa tungga Manetualain hihii-nanaun. Hohoro-lalanek kara raa, ta surak fee hatahorir fo leleo-lalaꞌon nara ndoos ena. Tehuu surak fee hatahori mana laban, hatahori ta mana nau nenene parenda, hatahori mana leo-laꞌo dook ka numa Manetualain mai, hatahori mana hii tao manggarauk, hatahori ta mana tao matak neu Manetualain, hatahori mana makadadaek hata fo lolo-laok, hatahori mana makanisa hatahori, hatahori mana makanisa inan no aman heli-helin. 10 Hohoro-lalanek kara raa oo surak hatahori mana sao leli-belak, touk mana sao no touk, hatahori mana leꞌa reni hatahori fo roke doik, hatahori mana pepeko-lelekok, hatahori mana sakasii pepekok, ma hatahori mana makasisikik hatahorir fo laban nenori ndoos boe. 11 Nenorik fo ndoos sara numa Manetualain Hara Lii Malolen mai, fo Ana loo liman neu au. Ma Lamatuak naa, Manetualain fo ta neni babanggak sudi selik kana. Hatahorir randaa rakadedemak kana.
Toke makasi neu Manetualain, nahuu Ndia dalen susuen
12 Au oke makasi noꞌuk ka neu ita Lamatuan Yesus Karistus, nahuu Ana tengga nala au dadi uu hatahori nemeheheren, ma fee au bebeꞌi-barakaik, losa au bisa akalalaꞌok Ndia ue-osan. 13-14 Naa te fai bakahulun, au soa kokolak aboboo fo akatutudak Yesus naden, ma tao doidoso hatahorir fo mana tungga Ndia dala masodan. Au soa tuni-ndeni fo akalulutu sara. Au manggarauk talo naa, nahuu faik naa au ta alela hata fo au taok, ma bei ta amahere neu ita Lamatuan Yesus Karistus. Tehuu Ana ta lilii au ma natudu Ndia susuen neu au. Lenak bali, Ana natudu dale susuen neu au ta mana basak! Ana fee babaꞌe-babatik sasi kao-kao neu au, fo amahere ahere neun, ma bisa sue-lai hatahori sama leo Ana sue-lai au.
15 Ita tasiꞌe tamanene ena tae, “Yesus Karistus mai nai dae-bafok ia ena, fo tao nasoi-nasoda hatahorir fo mana tao sala-singgok kara.” Memak tetebes talo naa! Numa basa hatahorir mana tao salak mai, na, au ia ndia manggaraun lenak. 16 Leo mae au manggarauk talo naa, tehuu Manetualain naketu fo ta natuda huku-dokik neu au. Ana nau pake au dadi uu netuduk fo atudu Yesus Karistus dale loan neu hatahori manggarauk mateꞌen sama leo au ia. No dalak naa, hatahori laen fo mana tao sala-singgok kara oo bisa ramahere neun, mita fo ara hambu masodak rakandoo roon boe.
17 Koa-kio Manetualain!
Kada Ndia mesa kana, Manetualain.
Ta hambu laen ena bali!
Manek mana toꞌu parenda ta mana basak.
Ana ndia nasoda seku neu.
Ana ndia ta mana matek.
Ana ndia hatahori ta bisa mete-nitan no mata deꞌe heli-helin.
Hatahorir fee basa hada-horomatak ma kokoa-kikiok neun
losa doon naa neu!
Amin.
18 Au anang Timotius fo dale malole! Au ae afada o, hata fo o muste makalalaꞌok kana nai uem mara. Basa iar tungga hata fo Manetualain mana toꞌu dedeꞌan nara kokolak memak laꞌe-neu o aom ena. Mete ma o tungga basa dedeꞌak kara raa no malole, o dadi sama leo soldadu esa, mana malela netatik, laban basa manggarauk kara. 19 Toꞌu mahere o nemeheherem neu Karistus. Ma manea o dalem fo lolo-laok seku neu. Huu hambu hatahori laen ta nau nenene sira dale kuru-eron nara ena bali, fo tao sira nemeheheren nakalulutu, sama leo ofak saꞌe nala harik. 20 Himenius no Aleksander asa, sama tetar talo naa ena! Huu naa de au loo lima sara reni nitu malanggan reu ena. Au tao talo naa, mita fo naa dadi neu nenorik esa, fo ara boso rakalulutu Manetualain naden bali.
1:1-2 Nedenuk kara Tutuin 16:1 1:13-14 Nedenuk kara Tutuin 8:3; 9:4-5