6
Laꞌe-neu ata-dato no lamatuan
1 Hambu ata-dato fo namahere neu Lamatuak Yesus, na, ara muste fee hada-horomatak neu sira lamatuan nai dae-bafok ia, mita fo hatahori deak kara ta hambu dalak kokolak rakatutudak Manetualain naden, ma rakadadaek ita nenorin.
2a Hambu ata-dato lamatuan namahere neu Lamatuak Yesus. Ata-dator ta bole rakadadaek sira lamatuan, nahuu sira lamatuan naa namahere neu Lamatuak Yesus. Tao talo bee oo, ara muste ralalau lolen lenak bali neu sira lamatuan boe, nahuu dua sara sama-sama hatahori kamaherek, de esa muste sue esa.
Nenori mana salak, ma seseba-babae malole
2b Timotius, ee! Manori saranik kara laꞌe-neu basa iar, ma fufuꞌa sara fo ara tao tungga basa naar.
3 Ita nenorin ndoos naa, natudu dalak fo leo-laꞌo tungga Manetualain hihii-nanaun. Hatahori mana fee nenorik laen numa ia mai, ara timba heni Lamatuak Yesus Karistus nenori ndoon ena.
4 Hatahori matak leo naak, koa ao, tehuu uten rouk! Sira hedin nara, ndia kada soa sangga-sangga dedeꞌak ma rareresi laꞌe-neu kada dedeꞌa deꞌek. Basa iar tao hatahori dalen nara mbiri, rahuur, rakalulutu hatahori laen nade malolen, ma ranggaroti hoꞌa-hoꞌa reu hatahori laen.
5 Hatahori matak leo naak, soa tao mue-anggik ta basa-basa. Sira duduꞌan manggarauk. Ara ta bubuluk ena, bee ndia tetebes bali. Ara duꞌa rae, mete ma ara manggate rakalalaꞌok anggama, na, ara bisa ramasuꞌi.
6 Memak anggama bisa tao nala hatahori dae-bafok nameda hambu nanala moꞌok. Huu mete ma ita leo-laꞌo tungga Manetualain hihii-nanaun, ma tameda dai ena hata fo ita taenak, naa ndia tao namahoko Manetualain dalen. Naa dei fo anggama tetebes.
7 Masaneda matalolole! Neu faik fo bonggi ita, ita ta teni hata esa boe na neni dae-bafok ia mai. Ma neu ita mate oo, ta teni hata esa boe na kalua laꞌo ela dae-bafok ia boe.
8 De sadi hambu nanaꞌak ma bualoꞌa-papakek, na, nemeda dai leo!
9 Tehuu hatahori fo mana hihiik ka dadi namasuꞌi, ana hambu soba-dou mata-matak kara no muda hiek ma hambu ikek numa kii-konak mai, nahuu ara duduꞌa kada hata-heto a mesan. Basa naar neni sosoek ma nekelulutu masodan nara.
10 Dalek nai kada doik naa, dadi neu huuk numa hatahori tao manggarauk mata-matak mai. Hambu hatahori ketuk rasuu ralan seli sangga doik leo naak, losa ara laꞌok sala dook ka numa sira nemeheheren fo ndoos mai ena. No dalak naa, sira mesa kasa rakalulutu sira masodan.
Toꞌu mahere nenorik fo o simbo malak ena
11 Timotius, ee! O ia, Manetualain enan. De makadodook numa basa nanggarauk mai. Leo-laꞌo no lolo-laok. Leo-laꞌo fo tao mamahoko Manetualain dalen nai basa dedeꞌak kara. Mamahere makandoo neu Yesus Karistus. Sue-lai basa hatahorir. Makatataka nai susa-sonak dale. Leo-laꞌo no neulauk mua basa hatahorir.
12 Makatataka tebe-tebe fo makalalaꞌok basa nenorik fo ita tamaherek kara. Manetualain baꞌe fee o masodak ta mana basak ena. O mafada o nemeheherem neu Lamatuak Yesus talo naa nai hatahori noꞌuk kara matan ena. Dadi toꞌu mahere masodak naa, fo boso makamboꞌik kana.
13-14 Ma hatematak ia, au oke o ndara fangga hehelu-bartaak talo ia: Tao tungga basa Lamatuak Yesus parendan. Boso malena-langga parenda esa boe na, mita fo hatahori ta hambu o salam. Tao tungga basa naar no tebe-tebe, losa neu faik fo ita Lamatuan Yesus Karistus fali mai. Au oke fo o helu-bartaa talo naa nai Manetualain matan. Ana ndia baꞌe samanek neu basa kaani hahaek lalaꞌen. Au oo oke o helu-bartaa talo naa nai Yesus Karistus matan boe. Ana ndia nataa no ledo-ledo laꞌe-neu Ndia aon nai nggubenor Pontius Pilatus matan ena.
15 Lamatuak Yesus ta neni babanggak, Ana ndia toꞌu koasa.
Ndia naa, Mane Ina-huuk numa basa manek kara mai.
Ma Ndia naa, Malangga Ina-huuk numa basa malanggan nara mai.
Ndaa no fain,
Manetualain nau tao manggaledo dedeꞌak kara iar.
16 Kada Manetualain mesa kana ta mana matek.
Ana leo nai manggaledok dale, fo hatahori dae-bafok ta bisa nakatataka mete-nita sana.
Ta hambu hatahori esa boe na fo bisa mete-nita sana.
Basa-basan fee hada-horomatak neun!
Basa koasa lalaꞌen nai Ndia liman losa doon naa neu!
Leo kada naa! Amin!
Laꞌe-neu hatahori kamasuꞌik kara
17 Mafada hatahori kamasuꞌik kara marai dae-bafok ia, fo ara boso koa ao, ma boso tai-ramahena neu sira hata-heton. Huu basa hata-hetor raa neu ko sambu do lalo. Malole lenak ara tai-ramahena neu Manetualain mana masodak. Huu Ana ndia mboꞌa basa hata fo ita toꞌak, mita fo ita bisa tameda tala masodak ia lole-ladan.
18 Mafada sara fo pake sira hata-heton fo tao hata fo neulauk. Ara muste manggate tao hata fo neulauk. Ara muste rakambela liman fo tulu-fali hatahori laen nara, ma hii nduu-pala babaꞌe-babatik, fo Lamatuak baꞌe fee sara.
19 No dalak naa, ara raduduru rala hata-heton nara fo dadi neu nemberii matea soa-neu sira masodan mana maik. De ara rambadedeik masodak fo kasosoa-ndandaak.
Paulus nateꞌe susuran
20 Timotius, ee! Manea matalolole basa hata fo Manetualain natotoꞌun neu o limam ena. Boso tungga sorodododo mua kokolak bafa rouk kara. Boso tamba suru tiꞌun ma dedeꞌa ta mana neni hada-horomatak neu Manetualain. Masaneda, ee! Hambu hatahori tao aon nara rae, sira malelak kara. Naa te sira ‘malelan’ naa, ta naena matea faa boe na. Hae muu adu o bafa-maam mua sara.
21 Hambu hatahori ketuk ramahere neu nenori mana puta-paik kara raa, losa ara sio laꞌo ela sira nemeheren fo ndoos neu Manetualain.
Au oke fo Manetualain natudu dale susuen neu ei basa ngga.
Soda-molek,
Paulus