4
1-2 Chacalboxuc sc'opilal jun querem hech chava'ibeic sjam. C'alal cuxul to ti stot ti quereme, hech laj xchapan comel ti ja' tsventain scotol ti c'utic oy yu'une c'alal mi ichame. Pero mu to xu' tsventain ti ora ti quereme yu'un biq'uit to. Hech yu'un laj sa'be yajval yu'un hech chchabibat. Hech yu'un ja'to mi its'aqui ti jayib habil ti ch'acbil comel yu'un ti stote, hech chlic ac'batuc sventain scotol yu'un ti much'u sventainoj comele. Yu'un pasbil to ti mantal hech chaj c'u che'el mozo ti quereme.
3-5 Ja' no'ox hech uc ti Diose. Xchapanoj ono'ox ti chijyac'bucutic jventaintic scotol c'usi oy yu'un ti sventa ti Snich'one. Hech yu'un ch'acbil yu'un ti Diose c'usi ora chtal ti Snich'one. Hech yu'un laj sta yorail ti itale. Yu'un ti c'alal mu to chtal ti Snich'one, hechucutic hech chaj c'u che'el mozo yu'un pasbilucutic ti mantal yu'un ti c'utic laj jch'untic ti co'ntontic ti hech chijcolucutic laj jcuytique. Hech chaj c'u che'el ho'ucutic ic'ot ti Snich'one yu'un i'alintaat yu'un ants. Ja' hech chaj c'u che'el ho'ucutic ti jch'untic mantal ja' hech ic'ot. Tal scoltaucutic yu'un hech yol snich'on Dios chijc'otucutic ti sventa, ho'ucutic ti oyucutic ti mozoil yu'un ti c'utic laj jch'untic ti co'ntontique ti chijcolucutic laj jcuytique.
6 Yu'un yol snich'onucutic xa ti Diose, hech yu'un ti Diose laj stac talel yu'un chnain ti co'ntontic ti Ch'ul Espíritue, ja' ti nainem ti yo'nton ti Snich'one. Ja' chc'opoj ti co'ntontic hech yu'un “Tote”, xcutic ti Diose.
7 Hech yu'un mu xa oyucoxuc ti mozoil. Yol snich'onoxuc xa ti Diose. Yu'un yol snich'onoxuc xa, hech yu'un co'ol cha'ac'bat aventainic hech chaj c'u che'el yac'ojbe sventain ti Snich'one.
Ja' sc'opilal mu me xavac' abaic ti mozoil yan vuelta, xut
8 Ti vo'one tal yu'un muc xavojtiquinic ti Diose, ja' laj avac' abaic ti abatinel ti stojol ti c'utic mu diosuque.
9 Ti ora to yu'un xana'ic xa bu oy ti Diose, y xayojtiquinic ti Diose, mu xca'ibe sjam c'u yu'un chac'an chacha'ch'un ti c'utic mu xcoltavane, ti mu'yuc stue. ¿Mi yu'un chac'an chavac' abaic ti mozoil yan vuelta?
10 Yu'un ca'yoj ti chachabiic xa c'utic c'ac'alil, c'utic ual, c'utic yorail, c'utic habilal hech chaj c'u che'el tspasic ti jchi'iltaque.
11 Chquich' mul avu'unic mi repenta hovil chc'ot ti laj calboxuc ti sc'op Diose.
12 Quermanotac, chacalbeic vocol ti atojolic, yu'un ti jc'an ti mu xasventainoxuc ti mantaletique ti ho'oxuque hech chaj c'u che'el mu sventainojucun xa ti mantaletique ti ho'one. Yu'un laj xa ca'i ti c'u ya'yel ti nicol xa ti libre hech chaj c'u che'el colemoxuc ti vo'one ti mu'yuc c'usi tsc'an to laj ava'yique c'alal mu to chach'unique. Mu yu'unuc oy amul ti jtojol yu'un ti hech chacalboxuque.
13 Chana'ic ti scoj ti jchamelune ti hech nicom te ti alumalique, hech laj jcholboxuc ava'yic ti lequil ach' c'ope ti sba vueltae.
14 Laj avilic ti uts jba scoj ti chamele, pero ti ho'oxuque muc xalabanucun, muc xap'ajucun. Laj apasucun ti muc'. Hech chaj c'u che'el xch'ul abat ti Diose laj avilucun. Hech chaj c'u che'el Jesucristo laj avilucun yu'un laj apasucun ti muc'.
15 ¿C'u yu'un hech chapasic ti ora to yu'un mu xa hechuc avo'ntonic ti jtojol? Ho'on rexticoun avu'unic ti c'an aloq'ues asatic yu'un chavac'bun taca hu'uc avu'unique.
16 Ti ora to ¿mi yu'un ja' avajcontraun chic'ot avu'unic yu'un ti laj calboxuc ti c'usi melele?
17 Ti much'utic tal yalboxuc yan c'ope, mu yu'unuc chaxc'uxubinoxuc yu'un ti hech chaslequilc'oponoxuque. Ja' sc'anic ti chanamajic batel ti jtojoltutic yu'un hech chapasic ti muc' stuquic.
18 Lec mi oy much'u chascoltaoxuc scotol ora yu'un mu teucun scotol c'ac'al. Mu yu'unuc mu xtun chca'i yu'un ti oy yan chascoltaoxuque. Taca yu'unuc chalecubique, mu'yuc c'usi chcal.
19 Col jnich'nab, ep chavac'bun quich' vocol yan vuelta. Mu xnichimaj co'nton ja'to mi laj quil ti lec chach'umbeic sc'op ti Cajvaltique. Hech chaj c'u che'el ti ants ti c'alal mu to chcol ti alajel, ja'to mi icole, mi icuxi ti yole, ja'to nichim no'ox yo'nton. Ja' hech co'nton uc ti ho'one. Coloxuc c'otem ti co'nton.
20 Taca te oyucun ti atojolic ti ora to, mu hechuc stsatsal chacalboxuc yu'un más lec ti jna' c'u x'elan avo'ntonic. Yu'un ep chlo'laj co'nton avu'unic ti ora to.
Ja' sc'opilal ti ja' yolucutic ti much'u oy ti libree
21 Ho'oxuc ti chac'an ti ja' chasventainoxuc ti mantaletique, albun chca'i mi ava'yojbeic sjam ti c'usi ti jpastic yu'une mi ti jch'untic ti mantaletique.
22 Hech ts'ibabil comel sc'opilal ti Abrahame ti oy laj yac' cha'vo' snich'on. Ti jun quereme, ja' yol ti Agare ti oy ti quiaraile. Ti jun quereme ja' yol ti Sarae ti oy ti libree.
23 Yu'un ti laj sta yol ti Agare, ja' ti sventa sbec'talic no'ox. Yu'un ti laj sta yol ti Sarae, yu'un hech spasoj trato xchi'uc ti Abrahame ti Diose.
24-25 Ti cha'vo' antsetique, ja' señail ti chib vuelta laj spas trato ti Diose ti laj spas xchi'uc ti Moisese xchi'uc ti Abrahame. Ti Moisese ja' ti lajuneb mantaletique ti i'albat te ti vits Sinaí, ja' ti chij'och ti mozoil yu'une. Ja' señail ti Agare ti ochem ti quiaraile. Ti yalabtac ti Agare laj yac'be sbi Agar sbi ti vitse, ja' ti Sinaie. Ti Agare ja' yol ic'ot ya'yel ti jchi'iltaque ti te nacajtic ti Jerusalén ti ora to. Yu'un ti yol ic'ote, ja' yu'un ti oyic ti mozoil yu'un ti mantaletique xchi'uc ti yol snich'onique ti ora to.
26 Ti ho'ucutique yu'un mu xa sventainojucutic ti mantaletique, hech yu'un ja' jme'tic ic'ot ya'yel ti Sarae ti oy ti libree. Mu xa oyucutic ti sventa ti Jerusalene ti li' oy ti balumile. Oyucutic xa ti sventa ti ach' Jerusalene ti te oy ti vinajele.
27 Yu'un ja' hech ts'ibabil comel jc'opilaltic ti vo'one:
Manchuc mi comesbil cu'un ti Jerusalene ti ora to, pero ti patil más ech'em ti jpas ti muc' yu'un ti jcha'tsobbe tal más ep yajval ti ach' Jerusalene yu'un ho'on ti jpas hech ti chquic'be tal yajvale.
Ja'uc ti poco Jerusalene mu xa oyuc ep yajval chcom,
ti xchi ti Diose.
28 Hech yu'un, quermanotac, ho'ucutic yelnich'onucutic uc ti Abrahame xchi'uc ti Isaaque yu'un ja' jc'opilaltic uc ti hech i'albat ti Abrahame ti “chp'ol avelnich'on”, ti x'utate.
29 Ti vo'one ti Ismaele ti i'an ti sventa no'ox sbec'talic ti stot sme'e, ja' laj yilbajin ti Isaaque, ja' ti i'an ti sventa ti Ch'ul Espíritue. Ja' no'ox hech chc'ot ti pasel ti ora to uc. Chijyilbajinucutic ti much'utic chch'un ti chcolic yu'un ti yabtelique.
30 Hech ts'ibabil ti sun ti Diose: “Teno loq'uel xchi'uc yol ti much'u oy ti quiaraile. Yu'un ti yol ti much'u oy ti quiaraile mu xich'be comel sbendición ti stote. Ja' chich' comel ti yol ti much'u oy ti libree”, ti xchie.
31 Hech yu'un, quermanotac, ti ho'ucutique ma'uc yolucutic ti much'u oy ti quiaraile. Ja' yolucutic ti much'u oy ti libree, hech yu'un mu me xacuyic ti chijcol yu'un ti mantaletique. Yu'un ja' no'ox chij'och ti mozoil.