3
Ti cꞌalal mu xa tsꞌicbaj ta xcaꞌicutique, laj jnopcutic ti tey ta xicom jtuccutic ta Atenas jteclume. Jaꞌ yuꞌun un, tey laj jtac talel sqꞌueloxuc ti quermanotic Timoteoe. Yuꞌun ti stuque jaꞌ yajtunel ti Diose, ti jmoj ta xiꞌabtejcutic ta yalel ti lequil achꞌ cꞌop yuꞌun ti Cristoe. Laj jtac talel ta atojolic, yoꞌ jech ta stsatsubtas avoꞌntonic ta xchꞌunel ti Jesucristoe, yoꞌ jech muꞌyuc buchꞌu junuc ta xchibaj avuꞌunic yuꞌun ti jech vocole. Yuꞌun xanaꞌic lec ti ta onoꞌox xquichꞌ ti jvocoltique. Yuꞌun ti cꞌalal tey to ox oyuncutic ta atojolique, jech onoꞌox laj calboxuc avaꞌiic ti ta onoꞌox xquichꞌ ti jvocoltique. Jech onoꞌox icꞌot ta pasel ta atojolic jech chac cꞌu chaꞌal laj calboxuque. Xanaꞌic xa. Ti jech mu xa tsꞌicbaj ta xcaꞌi ti cꞌu aꞌelanique, jech o xal laj jtac ta jaqꞌuel mi jun to avoꞌnton achꞌunojic ti Cajvaltique. Yuꞌun lixiꞌ ti mi laj sujoxuc ta spasel chopol ti pucuje. Yuꞌun ti mi jeche, muꞌyuc cꞌusi tun o ti cabtelcutic ta atojolique.
Avi tana un, ti Timoteoe vul xa ta jtojolcutic ti ay ta atojolic ti ta Tesalónicae. Jun yutsil ti cꞌop yichꞌoj talele. Yuꞌun laj yal ti achꞌunojic o ti Cajvaltique, ti oy scꞌuxul avoꞌntonique. Yuꞌun laj yal caꞌicutic ti tey onoꞌox oyuncutic ta avoꞌntontique. Jaꞌ jech xtoc laj yal ti ta xacꞌan ta xaqꞌueluncutic avaꞌiique jech chac cꞌu chaꞌal ti vuꞌuncutic ta jcꞌan ta jqꞌuelot caꞌicutique. Jech o xal, Quermanotac, laj to avacꞌbeicun spatobil coꞌnton ti cꞌalal laj caꞌi ti achꞌunojic o lec ti Cajvaltique, jaꞌ ti oyuncutic ta vocole. Jun to achꞌ cuxlejal laj caꞌicutic ti cꞌalal laj caꞌicutic ti jun avoꞌntonic ta stojol ti Cajvaltique. Ti jech ximuyubajcutic avuꞌunique, mu xlaj calbecutic vocol ti Dios ti jech achꞌunojic oe. 10 Yuꞌun cꞌacꞌal acꞌobal ta jcꞌanbecutic ti Diose ti acꞌo yacꞌ ye stuc ti vuꞌuncutic chbat jqꞌuelotcutique, yoꞌ jech ta xcalcutic avaꞌiic ti cꞌusi scꞌan to ta xachꞌunic leque.
11 Ta jcꞌancutic ti acꞌo scoltauncutic stuc ti Jtotic Diose schiꞌuc ti Cajvaltic Jesucristoe, yoꞌ jech xtal jvuꞌlanoxuc. 12 Jaꞌuc stuc ti Cajvaltique ti acꞌo stsꞌitesoxuque, yoꞌ jech ta xꞌayan ta avoꞌntonic ti ta xacꞌuxubin abaique, ti cꞌux ta xavaꞌiic ti yan cristianoetic xtoque jech chac cꞌu chaꞌal ti cꞌuxoxuc ta coꞌntoncutique. 13 Acꞌo yacꞌboxuc jun avoꞌntonic, yoꞌ jech lecubtasbiloxuc, muꞌyuc amulic ta xcꞌot avaꞌan abaic ta stojol ti Jtotic Diose ti cꞌalal ta xchaꞌsut talel ti Cajvaltic Jesucristoe schiꞌuc ti yuꞌuntaque.