12
Kolomongo-Awili 12
Ambomo Kinia Wambiye Derekonotolonga Semanemo
1 ⸤Kanu-kinia⸥ mulu-koleana sukundu ulu paa awili tondolo se ungu-pulu perimu ulu se wendo orumu. Akumu i-sipa: Ambo se molopa, enamo mulu mele pakopa, olimu yunga kimbumuni kulupa, pengena ambo nokoli kuwininga wanie-karaono se kombokandi rurepo akuna giliepili pakopa molorumu.
2 Yunga olona bolango mondopale, membándo mindili paa awili sepa nomba perepa kalli nimba molorumu.
3 Kanu-kinia mulu-koleana sukundu ulu paa awili tondolo ungu-pulu perimu ulu se kelepa wendo orumula: Wambiye derekono paa awili kondoli se molopa, yunga penge yopoko-pakara gilipa, kongi kao ungú mele rureponga talo wendo omba, yunga pengemanga ye nokoli kingimunga wanie-karaono yopoko-pakara pakopa molorumu.
4 Kombokandima ówa yopoko sepa topa, kanu wambiye derekonomo yunga álimuni kombokandi ówa se muluna ola topa mana mania mundorumu. Bolango membá serimu ambomonga kumbikerena gilipa kanu bolangomo ambomone membá kinia nombando nokopa gilierimu.
5 Ambomone kango se merimu. Kanu kangomo ma-kolea yombo talapema pali paa tondolo mundupa nokopa molomba. Merimu kinia popenge seko liku kangulku Pulu Yemo kolea pali nokopa molorumu polona mengo puringi.
6 Ambomo kolea ku lielimunga sukundu lisipa kowa pumba, kolea se Pulu Yemone u sepa wamondorumu kolea akuna purumu. Akuna Pulu Yemone “Yu wale wane tausini tu anderete kelepa sikiti molopili nokondangi.” nirimu.
12:7-9
Setene Kinia Angello Nokoli Awili Maikele Kinia Opa Seringili Semanemo (12:1-18 pali)
7 Kanu-kinia mulu-koleana sukundu opa awili se wendo orumu. Mulu-koleana angello awili Maikele kinia yunga mulu-koleana we-angelloma kinia wambiye derekonomo molorumuna opa oringi. Derekonomo kinia yunga angelloma kinia kanokole opa seringi-na-kolo
8 Maikelenga talapemone ono toko mundoringi akumunga pe derekonomo kinia yunga angelloma kinia mulu-koleana sukundu molonge kolea se naa lierimu.
9 Derekono gelu nílimu yu koronga-u molorumu wambiyemo; yu “⸤kurumanga nokoli⸥ depelemo” ningu; yu “Setene” nilimili yemo; yu mana-yomboma pali kondi topa peke tondopa “Aulka senga lupa pangi.” nilimú yemo. Kanumu toko mana mania mundoringi, yu kinia yunga angelloma kinia toko mana mania mundoringi.
10 Kanu-kinia mulu-koleana sukundu ungu tondolo se wendo orumu pilierindu. Aku ungumu ru nimba nimbale:
“Olionga genupilima alieli
ipulieli kepe tangoli kepe
Pulu Yemonga kumbikerena kote sendelemo yemo
kiniá mana mania toko mundongimunga
Pulu Yemo yunga tondolo pelemomone
‘Setenene olio naa ambolopa sepa kinjipa
mindili nolemolá koleana naa memba pupili.’
nimba, olio lipa tapondopa,
yu paa sika ye nokoli kingimu molopa
yu mélema pali nokopa molopa,
yu Pulu Yemone “Ono nokopa kondomba ye se
lipu mundumbu.” nimba, nimba taltorumu
ye nokoli Karasimunga,
méle nokomba namba pelemomone
Karasimu yuni mélema pali
nokopa kondomba walemo kiniá kamu wendo omu.
11 Kongi Sipisipi Walomone
meme ondondorumumu kinia
Pulu Yemonga ungumu ningu siku seringimu kinia
aku ulutolone olionga genupilima
enge ningu opa-toumu toko mundoringi.
Ono ‘mana molopo kondamili.’ ningu naa pilku,
‘opa-toumane toko kondongi liemu mandala.’
ningu pilieringimunga aku sipa
engemo perimu kinia aku seringi.
12 Akumunga, nu mulu-koleamo kinia
akuna molemele yomboma kinia ono konopu siengi.
Aku-sipa na-kolo nu mamo kinia
nu nomu-kusamo kinia
depelemo akuna mania purumumunga
olo-kinia umbuna awili se wendo omu.
‘Pulu Yemone yu kamu topa mundumba enamo
nondopa wendo ombá.’ nimba pilipa
yu paa mumindili kolopa molemo.”
nirimu.
13 Wambiye derekonomo yu toko mana mania mundoringi kinia kanopale pe kango merimu ambomo andopa pulu sirimu.
14 Aku-na-kolo ‘Yu wambiyemone naa topili.’ nimba kolea ku lieli sulu senga lierimuna yu kalia-ingi yopoko oli talo-pakara molopili nokonge kolea se Pulu Yemone sepa wamorumumu ‘yu akuna mangopa yu kowa pupili.’ nimba ambo kanumu kera iliaka pou awili talo sirimu.
15 Yu kowa purumu kinia kanopale wambiyemone ‘Yu none topa memba pupili.’ nimba yunga kerena meku torumu kinia ambomo purumu aulkana no awili sepa topa pulu sirimu.
16 Aku-na-kolo mamone ambomo lipa tapondopa ma awili sepa kengeya lepa wambiye derekonomone meku torumu nomo pali akuna omba mania purumu.
17 Kanu-kinia wambiyemone aku serimu kanopale ambomo-kinia paa mumindili kolopale ambomonga bolango wema kinia opa sembá purumu. Ambomonga bolango kanuma Pulu Yemone “Saa.” nilimú ungu-manema pilku liku sengena panjiku seko, Yesusinga unguma ningu siku molemele yomboma.
18 Wambiye derekonomo nomu-kusa kelona gilierimu.