3
3:1-6
Sadisi Taono Karasinga Yomboma Nimba Mundorumu Ungumu
1 ⸤Yemone kelepa nimbale:⸥ “Sadisi taono Karasinga yombo talapemonga angellomondo i-siku pepá toko mundani:
“Pulu Yemonga mini yopoko-pakara kinia kombokandi yopoko-pakara kinia ambolopa molemo yemone ‘Pepá toko mundani.’ nimba, aku angellomondo nimba mundukumu. Yuni nimbale:
“Nane nu uluma seleno mele pilipu kanolio. Yombomane ‘Nu konde moleno.’ nilimili-na-kolo nu kolko pora sirinu.
2 Nu uru naa peli makilku ola molou. Ulu peanga kanga-kolte selenoma ‘kamu mania naa pupili.’ ningu aku uluma tondolo munduku kelko sei. Nuni seleno uluma nane kanolio kinia nanga Pulu Yemone kanopa peanga pilielemo uluma aku sipu mele naa kanolio kene aku sei.
3 Aku kene ungu u pilku liltinu unguma kelko konopu kimbu siku pilku, pilku liku sengena panjiku konopu topele tou. Molo kelko nu makilku ola naa molonu liemu na wa noli ye se olemo mele kiyongo nimbu nu molonina ombó. Ombó walemo nu naa pilku molani ombó.
4 Aku-na-kolo nunga kolea Sadisi yombomanga mare ononga mulu-maminiamanga ‘kalaro naa molopili.’ niringi. Ono kanopo peanga pilielio uluma seko molemelemonga mulu-maminia kake selima simbú pakoko na kinia pea kopu sepo molomolo.
5 Yombo se enge nimba opa-toumu kamu topa mania mundumba yombomo ono mulu-maminia kake selima simbú pakonge mele aku sipa yu mulu-maminia kake sélimu simbú pakopa molombala, kanu yombomonga imbimu konde molko mindi pungí yombomanga imbima molemo bokuna pe-pe kepe paa kulu naa tondombo. Tata kinia yunga angelloma kinia ononga kumbikerena yunga imbimu lepo ‘Nanga yombomo.’ nimbú lémo.
6 Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliangi.”
ningu pepá toko Sadisi yomboma nokolemo angellomo sieni.” nikiru.” ⸤nirimu.⸥
3:7-13
Pilladepia Taono Karasinga Yomboma Nimba Mundorumu Ungumu
7 ⸤Yemone kelepa nimbale:⸥ “Pilladepia taono Karasinga yombo talapemonga angellomondo i-siku pepá toko munduku nieni:
“Ye paa sika kake sepa, ulu-pulu sikamo yu-kinia pepa, u ye nokoli kingi Depitini yunga yomboma nokopa ‘Paa.’ nirimu kinia pungu, ‘Kongono i-siku saa.’ nirimu kinia seringi tondolomo yu-kinia perimu mele kanu yemo aku sipa tondolo pepili yunga talape yomboma nokopa yuni kuna wendo limú kinia yombo sene manda lloko naa tolemo, lloko tolemo kinia yombo sene manda ki naa limú, kanu yemone ungu se nimba mundupa nimbale:
8 “Nane nu uluma seleno mele pilipu kanolio. Kána! Nu molenona ombo kuna se wendo lindu kanumu yombo sene manda pipi naa simba. Kanolio kinia nunga enge kanga-kolte mindi pelemo-na-kolo nanga ungumu munduku naa kelko, nanga imbimu seko naa kinjiku ‘Yu naa pilielio.’ naa nilinu.
9 Yombo mare “Juda yomboma molemolo.” nilimili-na-kolo kolo tolemele. Ono Juda yomboma mólo, ono ⸤kurumanga nokoli⸥ Setenenga talape molemele yombo kanuma ‘Nunga kumbikerena ongo tamalu pekole ‘Nane nu sika konopu mondolemo.’ niengi.’ nimbú.
10 Nane ‘Nu enge ningu nanga unguma munduku naa keliei.’ niliu mele seko molenomonga ulu-umbunama koleamanga pali wendo ombá kinia nane nu lipu tapondombo. ‘Mana-yomboma enge ningu molemelenje.’ nimba kanombando umbuna kanuma wendo ombá.
11 Na nondopo ombó sekero kene nu ambololeno mélema tondolo munduku ambolko molou. Nunga méle kaloli taltondoliomo ‘yombo sene lupa naa lipili.’ ningu aku siku seko moloyo.
12 Enge nimba opa-toumu kamu topa mania mundumba yombomo nanga Pulu Yemonga ulka-tembelemonga ulka simu mele ‘giliepili.’ nimbú. Kanu-kinia yu kelepo ulkamo mundupa kelepa penando manda naa pumbá. Nanga Pulu Yemonga imbimu kinia, nanga Pulu Yemone kolea-awili Jerusalleme konde sembá Pulu Yemo molemo mulu-koleana lepa mania ombámonga imbimu kinia, nanga imbi kondemo kepe, aku imbi-poko nane yunga mambelena imbi topo mondombo.
13 Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliangi.”
ningu pepá toko Pilladepia yomboma nokolemo angellomo sieni.” nikiru.” ⸤nirimu.⸥
3:14-22
LLadosia Taono Karasinga Yomboma Nimba Mundorumu Ungumu
14 ⸤Yemone kelepa nimbale:⸥ “LLadosia taono Karasinga yombo talapemonga angellomondo pepá toko munduku i-siku nieni:
“Ungu i pepána tokoroma ungu sikama mindi pelemo yemo, Pulu Yemonga unguma kolo naa topo sumbi sipu mindi nimbu siliu yemo, Pulu Yemone méle serimumanga pali pulumu, mélemanga pali nokolemo ye nokoli olandopamo, akumuni i unguma nundu nimba mundukumu. Yuni nimbale:
15 “Ulu selenoma pali nane pilipu kanolio. Nu tondolo monda naa topa, tondolo mulu-mulu naa nimba, suku-singina mele moleno kanolio. ‘Nu kamu monda topili molenanje peanga. Molo nu kamu mulu-mulu nipili molenanje peangala.’ konopu lekero.
16 Aku-sipa na-kolo nu tondolo monda naa topa, tondolo mulu-mulu naa nimba kuma-kuma liepili molenomonga nane nu meku topo eltombo sekero.
17 Nuni ninguli:
‘Kou-mone kinia méle awisili
taltopo molopo kamako molio.
Mélse mólo naa tolemo.’
nilinu-na-kolo koropa pupili mindili nongo molko kinjiku, mélse naa panjiku we-we molko, mongotolo kiri liepili kolea naa kanoko moleno mele nu nunu ‘Molopo kinjikiru.’ ningu naa pilieleno. Yombomane yombo koropama kondo kololemele mele nu aku siku moleno.
18 Sekole molko kondoni mele nimbu siembo: ‘Kamako leambo.’ ningu kou-gollo sepena kamu kalopa kake seli taltoliomo topo toko liku, ‘We-we naa andopo molambo. Pipili naa sepili.’ ningu mulu-maminia kake taltolioma pakani topo toko liku, ‘Kolea kanambo.’ ningu mongona kandoni marasene taltoliomo topo toko lieni.
19 Yombo konopu mondolioma ‘Molko kondangi.’ nimbu mane sipu iri tolio kene nu konopu kimbu sikuli seko kinjilinu mele kanoko kiri pilku munduku kelko konopu topele taa!
20 Kána! “Na sukundu wamboye?” nimbu kerepuluna mangilipu giliu. Yombo se nanga ungumu pilipa imbi sipale “Sukundu ou.” nimu liemu na sukundu ombo yu-kinia pea kopu sepo molopo, na pea ga nombo molombolo.
21 U na enge nimbu opa-toumu topo mania mundorundu kinia Tata ye nokoli kingimu molopa kolea nokopa molorumu polona pumbu pea molorumbulu molembolo mele aku sipa enge nimba opa-toumu kamu topa mania mundumba yombomo na ye nokoli kingimu molopo koleama nokopo molio polona “Pea nokopo molambili ou.” nimbú.
22 Yombo se komu gilimbamone Mini Kake Sélimuni Karasinga yombo talapemando nimba sikimu ungumu piliangi.”
ningu pepá toko LLadosia yomboma nokolemo angellomo sieni.” nikiru.” ⸤nimba kanu yemone na Jonondo⸥ nirimu.
Kolomongo-Awili 4-11
Mulu-Koleana Sipisipi Walomone Lemó Bokumunga Pipima Wendo Liltimu Kinia Mana Ulu Mare Yomboma-Kinia Wendo Orumu Semanema