19
E ’Kuwosh Sinaa/ mo
1-2 ’Kwani ma Israyiil iikin ka pije/ mo ’peni Pa Rep̱idiim mo. Dhali ka cima ’de/ ka ppee ’kup̱i kwara ’ko’di uni iikin mo ’peni Pa Masir mo tani uni p̱u’dkin mo e mombwaasho ma Sinaa/ mo be. Dhali imun mo tani Israyiil bu’thki moŋ’ko me’d i bum’pen i wosha turga/ mo be.
3 Dhali aMusa seki mis wosh mmogam Arumgimis ’kup̱ mo. Dhali TAP̱A yuḵki a’di mo ’peni wosha turga/ mo dhali o gwo mo ki: Yase/ i mina /e i ṯor ’kwani ma Israyiil gwo mo ki:
4 Um mishki to kun miikika/ ’kwani Pa Masir me’dyin mo dhali bahili aha/ borkina um ka bi ma wulu/ mo dhali susu um e aha/ mo be.
5 Dhali waḵki/ um mini ha gwo gi ’twam pem e mo dhali ṯel gwom pem jin gamu/ me’d mo tani um mini ta ’kwani gun kwanyka/ ka me’d pem kun miga/ nyuny mo e bwaman ma aris ’kwani mo haali/ aris mony’ceshi ’baar mo tani uni ta kum pem mo be.
6 Dhali um mini ta kum pem gun c̱inu aha/ aha/ ’de/ mo. Dhali um mini dhu miim pem me’d igasiis mo. Gwo gwansan a’di i mina /e i ṯor ’kwani ma Israyiil mo be.
7 Wakan aMusa thulki’d mo dhali yuḵki gwanyjwahaŋ ’kwani mo dhali ṯor uni aris gwo gwansani ’baar mo uni gun ḵankina TAP̱A a’di mo be.
8 Dhali aris ’kwani ’baar mo thoḵki gwo imonṯal ’de/ mo dhali oki gwo mo ki: Aris gwo gwansan kun okina TAP̱A mo tani mina amani mii mo. Dhali aMusa doḵki gwoŋ ’kwani ka nyaŋ’ko’d bway TAP̱A mo be.
9 Dhali TAP̱A oki’da Musa gwo mo ki: Aha/ mina yaku/ i /e ka raḵ jin dhinya/ e ki dhiny mo ki ’kwani mini mish ki aha/ ṯora ṯor nyaḵki /e mo. Dhali uni si’da/ mini gam /e gwo is ki sule/ sule/ mo. Dhali yan’ko’d aMusa ṯorki gwoŋ ’kwani e TAP̱A mo be.
10 Dhali TAP̱A oki’da Musa gwo mo ki: Yaku/ i ’kwani mo dhali dhu uni ki she/ shwane/ mo dhali ka’thamo/ mo. Dhali dhalki uni wusi burrinyem buni mo
11 dhali thosoni is mo goma ’thamo/ c̱an mo. Haali/ ka’thamo/ c̱an mo tani TAP̱A a’di midi i thulu ka ’cesh mo ap̱o/ ’Kuwosh Sinaa/ mo e jis e gi ’kwani ’baar mo.
12 Dhali /e mini kar gwayu/ ka kukul is mo ki ’ko’d gwar wosh jin mina ’kwani ’koki ’ciṯẖ a’di mo. Dhali oyi gwo mo ki: Hili ki ’bore/ ki um ’koki se ’ku wosh mo walla ’dish a’di is mo. Ba a’di yin jin midi ta Wosh Sinaa/ is ki me’d mo tani minu ’kosh jwa mo be.
13 Me’da kamu/ yisa midi ta a’di is ki me’d yisa mo hili a’di minu ’kosh ki wosh mo walla minu shin ka thop̱a mo. Waḵki/ ta to e walla wathimpa mo tani a’di midi mish di ki e yisa. Ka poome/ midi ko mo tani yan’ko’d uni mini iiku/ ’kup̱ ki wosh mo.
14 Wakan aMusa yaki’d ka ’cesh mo ’peni ’kuwosha turga/ mo e ’kwani mo dhali ṯor ’kwani gwo mmothoson is mmoluŋ mo. Dhali uni wuski burrinyem buni mo be.
15 Dhali a’di oki ’kwani gwo mo ki: Thosoni is mo goma ’thamo/ c̱an mo. Dhalku/ up̱ ki mii ’dish is mo.
16 Mon’thamo/ jin ’kon ma p̱o/i kwara mo tani kon dor ma sho’k diki’d mo dhala wara sho’k mo dhali araḵ jin ’cethe’da ’tum ap̱o/ ’kuwosha turga/ mo. Dhali ko ma poome/ dhi’thki’d ki nyanye/ mo. Wakan aris ’kwani kun ’kokin e mo jin butha uni moŋ’ko me’d mo tani uni dekin ki bir bir mo.
17 Dhali yan’ko’da Musa suski ’kwani ka pije/ mo ’peni moŋ’kom buni mmogama Arumgimis ’kup̱ mo. Dhali uni doshkin mo e bum’pen wosha turga/ mo.
18 Dhali ’kuwosh Sinaa/ ka kuluny a’di koṯẖkunu is ka ku’d mo haali/ TAP̱A i thulki’di a’di ki o’d mo. Dhali aku’d piti a’di yaki mis mo me’d ji ma p̱urun mo. Dhali wosha turga/ kakulu mo tani a’di yiḵinki is kagahara ki nyanye/ mo.
19 Dhali ki ko ma poome/ gwoki’d ki nyanye/ dhali ki nyanye/ mo tani aMusa ṯorki’da ṯor mo dhali Arumgimis thoḵki a’di gwo ki ’twa/ jin wa ki kon dor ma sho’k mo be.
20 Dhali TAP̱A thulki’d ka ’cesh eya liman wosh Sinaa/ mo dhali yuḵa Musa bwaya liman wosh mo. Dhala Musa a’di i seki ’kuwosh mo be.
21 Dhali TAP̱A oki’da Musa gwo mo ki: Thulku/ ka ’ceshi ’kwani dhali rumi ’kwani ki gwo mo isi ciki/ ki uni mini ’koki ’ceṯẖku/ ki tur mo mmohil aha/ mo ka ’thime/ mo. Haali/ waḵki/ miinu kan tani uni ka ris ka ris mini wu mo be.
22 Dhali si’da/ dhalki igasiis uni kun iiyin ki ’dishe/ e TAP̱A dhagam is buni mo isi ciki/ ki TAP̱A midi diki dor uni mo.
23 Dhali aMusa oki TAP̱A gwo mo ki: ’Kwani mini molku/ seku/ bway ’kuwosh Sinaa/ mo haali/ /e ki is pini ḵanki aman gwo mo mmo/o ki: Kari gwayu/ mo mmo’kam ’kuwosha turga/ is mo dhali dhagami a’di mo.
24 Dhali TAP̱A oki a’di gwo mo ki: Yaku/ ka ’cesh mo dhali susa Haruun nyaḵki /e bway aha/ mo. Hili dhalku/ ki dhal igasiis bway dhali aris ’kwani mo mmo’ciṯẖ gwayu mo mmo/ii i aha/ mo haali/ waḵki/ miina uni kan mo tani aha/ mina dor uni mo be.
25 Wakan aMusa a’di i yaki’d ka ’cesh mo e ’kwani mo dhali ṯorki uni gwo jin okina TAP̱A mo be.