23
Gway ma Dawuu’d.
1 Tap̱a a’di ta’da Manhil aha/ mo.
Aha/ mina diki har to mo.
2 A’di karki aha/ mmo/ish ’ko’da shon dhii/i’d mo.
A’di suski aha/ e shemen yi’de/ jin doshki’d mo.
3 A’di warki aha/ aḵashiram pem is mo.
A’di suski aha/ e bway mii ma ḵar/e mo
gom gway gi gway piti mo.
4 Ba isi waḵki/ aha/ mina ya e embul wosh ma la gi mowu mo tani
aha/ yisa mina ḵo/ tonthus yisa,
haali/ /e nyaḵki di ki aha/ mo.
Ajap̱p̱am pini dhali cwam pini uni malaski aha/ mo be.
5 /E thosonki tonṯe/ ibwambori aha/ mo
e buŋ’kus ma ris uni gun ta ’kup̱ ki aha/ mo.
/E ’koshki aha/ ’kup̱ pem ka yin mo.
Aḵubbaayam pem a’di ’tu’dki’d iwol ’kup̱a sho mo.
6 Ka jiŋ gana/ miim ’boron dhali momiimii mo tani uni mini baṯẖ aha/ nsho’k mo
ka teem pemi ’baar mo jin dika/ ki e mo,
dhali aha/ mina c̱a’b e gu’b gi Tap̱a ki sule/ sule/ ya ye ’ba/ mo.