94
1 Ayy Tap̱a, /e tana Arumgimis jin ri’cki’da ri’c mo.
/E tana Arumgimis jin ri’cki’da ri’c mo tani dhalki /e kushki mo mo.
2 Cuyi mis mo, ayy /e jin tana Amandwall mony’cesh gwo mo.
C̱iki uni gwahan kun dhu is ki ca tom buni kun ’dap̱a uni ki ’dap̱ mo.
3 Ayy Tap̱a, ki mo gi wakata imina uni kun ta thus ki thus i’ko mo?
Ki mo gi wakata imina uni kun ta thus ki thus ’ko mo mmop̱e ki bwaŋ ’kunyu’d mo?
4 Uni wolki gwom p̱us buni kun dhunu uni ’ba/ ki ca ka pije/ mo,
uni dhu ’ba/ ki ca mo, aris uni ’baar mo kun miiki tonthus mo.
5 Uni siri’cki ’kwanim pini ap̱o/ ki sho’k mo, ayy Tap̱a,
dhali wa’th mal pini i e mo.
6 Uni ki ’kosh up̱a dhalla/ mo dhali uni kun ii ii yilkina/ mo,
dhali ta iman’kosha mee ki ’kwani kun dar gi icom mo.
7 Dhali uni ki o gwo mo ki: Tap̱a mishki toŋ kamu/ p̱ar eya?
Arumgimis ma Yakuub a’di mish toŋ kamu/ nyiṯẖa/?
8 Mishi gwo ’ban ma, ayy ’kwani kun ta dholgon ki dholgon mo.
Um kun tana rwa/e/, ki um mini yuḵ kakasja mo?
9 A’di jin uḵki gu’ban’ce mo tani mina a’di diki ciḵ gwo mowa?
A’di jin uḵki e mo tani mina a’di diki p̱ar mo e mowa?
10 A’di jin dorki kal gi ’kwaniny’cesh mo tani mina a’di diki dora dor garaa?
A’di jin ṯorki ’kwani gwo mmonyiṯẖ to mo tani,
11 Tap̱a a’di mishki to kun kuluma ’kwani ibwa mo,
ki uni ta toŋ kamuwa? ayy jasa wulp̱e/ ’te/ mo.
12 Mom’bor mii gom wathi/ a’di jin dorkina /e mo, ayy Tap̱a,
dhali a’di jin ṯorkina /e gwo ’peni gwoŋḵan pini jin c̱inu mo,
13 mmoc̱i a’di isa haju/ ’pena teem piti jin ṯoju a’di bwa mo,
ntagi jisa ’kulga/ minu c̱wany mo gom a’di jin ta thus ki thus mo.
14 Haali/ Tap̱a midi diki dhal ’kwanim piti ’pen mo.
A’di midi diki dhal mal piti ’pen mo.
15 Mo jin dhunuwa dhu ka p̱o/ midi doḵu/ mo e mo jin ta’da ḵar/e mo,
dhali aris uni ’baar mo kun dhelel ma du mo tani uni mini baṯẖ a’di isho’k mo be.
16 Kaja a’di jin cu mis gom aha/ ap̱o/ uni kun ta thus ki thus mo?
Kaja a’di jin doshki’d gom aha/ ap̱o/ imanmii tonthus mo?
17 Waḵki/ Tap̱a midi diki ta manwoṯẖ pem mo tani
aḵashiram pem ishunsan gana/ moyi midi c̱a’b ki shwamm e mony’cesh jin ’konu ki shwamm mo.
18 Ki aha/ kulumkina gwo ibwa mo ki: Sho’k pem yereski’d mo tani
mo/en pini jin ṯelu sho’k mo, ayy Tap̱a, a’di ibu’thki aha/ mmodosh mo be.
19 Ki mo ma teṯe/ ma dum pem tana ris mo tani
momalas pini uni ’kunykina ḵashiram pem bwa mo be.
20 Mina itap̱a kun ta thus ki thus mish gwo gam me’d nyaḵki /e mo,
uni kun thosonki gwoŋḵan kun bahu kun tanuwa pibi ka pibi mo?
21 Uni ’tuntulki isi monṯal ’de/ ap̱o/ mondiki/e gi wathiŋ ḵar/e mo,
dhali waḵ a’di jin di’d ka p̱o/ mmokar a’di mmowu mo.
22 Hili Tap̱a a’di warki’d ka cur pem jin ṯenu gwo mo,
dhali Arumgimis pem ta wosh pem jin hurga/ jwa mo.
23 A’di midi doḵki uni to i is mo gom miiny ’coḵgam buni mo
dhali dhi’th uni sho’k ka pupush ’peni miim buni kun tana uni thus ki thus mo.
Tap̱a Arumgimis bana midi dhi’th uni sho’k ka je’desh mo.