☰ Korintliⱪlarƣa «2» 6
6
Hudaning japa-muxǝⱪⱪǝt tartⱪuqi ǝlqiliri bolux
1 Əmdi Hudaning ⱨǝmkarliri süpitidǝ silǝrdin Uning meⱨir-xǝpⱪitini ⱪobul ⱪilip turup uni bikarƣa kǝtküzmǝnglar dǝp ɵtünimiz■ 2 (qünki u: «Xapaǝt kɵrsitilidiƣan bir pǝyttǝ duayingni ijabǝt ⱪilixni bekitkǝnmǝn, nijat-ⱪutulux yǝtküzülidiƣan bir künidǝ Mǝn sanga yardǝmdǝ boluxumni bekitkǝnmǝn» — dedi. Mana, ⱨazir bolsa «xapaǝt kɵrsitilidiƣan yahxi pǝyt»; mana, ⱨazir «nijat-ⱪutulux küni»dur!).□  ■ 3 Rǝbning hizmitigǝ daƣ kǝltürülmisun dǝp ⱨeqⱪandaⱪ ixta ⱨeqkimning imaniƣa tosalƣuluⱪ ⱪilmaymiz;■ 4 bǝlki ⱨǝrbir ixta ɵzimizni Hudaning hizmǝtkarliri süpitidǝ nǝmunǝ ⱪilip yürimiz; zor qidamliⱪ bilǝn, jǝbir-zulumlarda, japa-muxǝⱪⱪǝtlǝrdǝ, besim-ⱪistaⱪlarda,■ 5 kamqa yarilirida, zindanlarda, ⱪozƣilang-topilanglar iqidǝ, eƣir meⱨnǝtlǝrdǝ, tünǝxlǝrdǝ, roza tutuxlarda,□ 6 pakliⱪ bilǝn, bilimlǝr bilǝn, sǝwr-taⱪǝtlik bilǝn, meⱨribanliⱪlar bilǝn, Muⱪǝddǝs Roⱨ bilǝn, sahtiliⱪsiz meⱨir-muⱨǝbbǝt bilǝn, 7  ⱨǝⱪiⱪǝtning sɵz-kalami bilǝn, Hudaning küq-ⱪudriti bilǝn, ⱨǝⱪⱪaniyliⱪning ong-sol ⱪollardiki ⱪoralliri bilǝn,□ 8 ⱨǝm izzǝt-xɵⱨrǝttǝ ⱨǝm ⱨaⱪarǝt iqidǝ, tɵⱨmǝt ⱨǝm tǝriplinixlǝr iqidǝ ɵzimizni Hudaning hizmǝkarliri süpitidǝ namayan ⱪilduⱪ; yalƣanqilar dǝp ⱪaralƣan bolsaⱪmu sǝmimiy-sadiⱪ bolup, 9 namsiz bolduⱪ-yu, ǝmma mǝxⱨormiz; ɵlǝy dǝp ⱪalduⱪ-yu, ǝmma mana, ⱨayatturmiz; tǝrbiyidǝ jazalanduⱪ-yu, ǝmma ɵlümgǝ mǝⱨkum ⱪilinmiduⱪ; □
  ■ 10 dǝrd-ǝlǝm tarttuⱪ-yu, ǝmma daim xad-huramliⱪta turimiz; namrat bolƣinimiz bilǝn, ǝmma kɵp adǝmlǝrni bay ⱪilƣuqimiz; ⱨeqnemimiz yoⱪ bolƣini bilǝn, ǝmma ⱨǝmmigǝ igidarmiz.□
11 Silǝrgǝ oquⱪ-yoruⱪ sɵzliduⱪ, ǝy Korintliⱪlar, bizning baƣrimiz silǝrgǝ kǝng eqildi! □ 12 Silǝr biz tǝrǝptin ⱪisilƣan ǝmǝs, lekin ɵz iq-baƣringlarning tarliⱪidin ⱪisilisilǝr; 13 ǝmdi adil almaxturuxta bolup — (ɵz pǝrzǝntlirimgǝ sɵzligǝndǝk sɵzlǝymǝn) — baƣringlarni bizgimu kǝng eqinglar.■
 
Ⱪarangƣuluⱪⱪa ⱨǝmraⱨ bolmanglar
14 Etiⱪadsizlar bilǝn bir boyunturuⱪⱪa qetilip tǝngsizliktǝ bolmanglar; qünki ⱨǝⱪⱪaniyliⱪ wǝ ⱪǝbiⱨlik otturisida ⱪandaⱪmu ortaⱪliⱪ bolsun? Yoruⱪluⱪning ⱪarangƣuluⱪ bilǝn ⱪandaⱪ ⱨǝmraⱨliⱪi bolsun? □  ■ 15 Mǝsiⱨning Belial bilǝn nemǝ inaⱪliⱪi bolsun? Ixǝngüqining ixǝnmigüqi bilǝn ⱪandaⱪ ortaⱪ nesiwisi bolsun? □ 16 Hudaning ibadǝthanisining butlar bilǝn ⱪandaⱪ birliki bolsun? Qünki silǝr tirik Hudaning ibadǝthanisidursilǝr — Hudaning: «Mǝn ularda turimǝn, ularning arisida yürimǝn; ularning Hudasi bolimǝn wǝ ular Mening hǝlⱪim bolidu» deginidǝk silǝr Uning ibadǝthanisidursilǝr; □  ■ 17 Xuning üqün «Ularning arisidin qiⱪip ketinglar, Manga ayrilinglar», — dǝydu Rǝb, — «ⱨeq napak nǝrsigǝ tǝgküqi bolmanglar», «xundila Mǝn silǝrni ⱪobul ⱪilimǝn», □  ■ 18 wǝ: «Mǝn silǝrgǝ Ata bolimǝn, silǝr Manga oƣul-ⱪizlirim bolisilǝr» — dǝydu Ⱨǝmmigǝ Ⱪadir bolƣan Rǝb.□  ■
 
 
■ 6:1 1Kor. 3:9; Ibr. 12:15. □ 6:2 «xapaǝt kɵrsitilidiƣan bir pǝyttǝ duayingni ijabǝt ⱪilixni bekitkǝnmǝn, nijat-ⱪutulux yǝtküzülidiƣan bir künidǝ mǝn sanga yardǝmdǝ boluxumni bekitkǝnmǝn» — «Yǝx.» 49:8. ■ 6:2 Yǝx. 49:8. ■ 6:3 Rim. 14:13; 1Kor. 10:32. ■ 6:4 1Kor. 4:1; 2Kor. 11:23. □ 6:5 «tünǝxlǝrdǝ» — demǝk «tünǝp dua ⱪilixlarda». Baxⱪa birhil tǝrjimisi «uyⱪusizliⱪlarda». □ 6:7 «...ⱨǝⱪⱪaniyliⱪning ong-sol ⱪollardiki ⱪoralliri bilǝn...» — bǝlkim zǝrb ⱪilidiƣan ⱨǝm ⱪoƣdaydiƣan roⱨiy ⱪorallarni kɵrsitidu. □ 6:9 «namsiz bolduⱪ-yu, ǝmma mǝxⱨormiz» — dunyadiki «mǝxⱨor»lardin bolmisimu, lekin Huda, pǝrixtilǝr wǝ jamaǝtlǝr tǝripidin mǝxⱨordur, degǝn mǝnidǝ dǝp ⱪaraymiz. «tǝrbiyidǝ jazalanduⱪ-yu, ǝmma ɵlümgǝ mǝⱨkum ⱪilinmiduⱪ» — «tǝrbiyidǝ jazalanduⱪ-yu...» degǝnlik baxⱪa bir tǝrjimisi «dǝrrǝ-ⱪamqa yeduⱪ-yu ...». Bu muⱨim sɵz toƣruluⱪ «ⱪoxumqǝ sɵz»imizni kɵrüng. ■ 6:9 Zǝb. 118:18; Yǝx. 26:19. □ 6:10 «namrat bolƣinimiz bilǝn, ǝmma kɵp adǝmlǝrni bay ⱪilƣuqimiz; ⱨeqnemimiz yoⱪ bolƣini bilǝn, ǝmma ⱨǝmmigǝ igidarmiz» — «namrat bolƣinimiz bilǝn,...  ⱨeqnemimiz yoⱪ bolƣini bilǝn,...» — Pawlus wǝ baxⱪa rosullar bu dunyaning kɵzⱪarixidin ⱪariƣanda xundaⱪ kɵrüngǝn bolsimu, ular ⱨǝrgiz ɵzlirini undaⱪ ⱨesablimaydu, bǝlki ɵzlirini ⱨǝⱪiⱪiy baylar (mǝnggülük bayliⱪlarƣa igǝ) dǝp sanaytti. □ 6:11 «Silǝrgǝ oquⱪ-yoruⱪ sɵzliduⱪ, ǝy Korintliⱪlar,...» — grek tilida «Aƣzimiz silǝrgǝ oquⱪ, i Korintliⱪlar,...». ■ 6:13 1Kor. 4:14. □ 6:14 «Etiⱪadsizlar bilǝn bir boyunturuⱪⱪa qetilip tǝngsizliktǝ bolmanglar» — «Ⱪan.» 22:10dǝ «Exǝk wǝ kalini bir boyunturuⱪⱪa tǝng ⱪoxmanglar» deyilidu. Tǝngsizlik bolƣaqⱪa, ixǝngǝn adǝm wǝ ixǝnmigǝn adǝm tǝng yük tartmaydu, ⱨǝtta bir-biridin baxⱪa yɵnülüxkǝ tartidu. Bu sɵzlǝr pǝⱪǝt nikaⱨⱪila baƣliⱪ ǝmǝs, türlük ǝⱨwallarda etiⱪadsiz adǝm bilǝn «ⱨǝmboyunturuⱪ» bolux qong qataⱪlarni qiⱪiridu, degǝnliktur. «...ⱨǝⱪⱪaniyliⱪ wǝ ⱪǝbiⱨlik otturisida ⱪandaⱪmu ortaⱪliⱪ bolsun?» — «ⱪǝbiⱨlik» grek tilida «ⱪanunsizliⱪ», ǝmma bu «ⱪanun» ⱨɵkümǝtningki ǝmǝs, Hudaning ⱨǝⱪⱪaniy tǝlǝplirini kɵrsitidu. ■ 6:14 Ⱪan. 7:2; 1Sam. 5:1, 2; 1Pad. 8:21; 1Kor. 5:9; 10:21; Əf. 5:11 □ 6:15 «Mǝsiⱨning Belial bilǝn nemǝ inaⱪliⱪi bolsun?» — «Belial» degǝnning ibraniy tilidiki mǝnisi «ǝrzimǝs, osal» bolup, Xǝytanning yǝnǝ bir ismi bolidu. □ 6:16 «Mǝn ularda turimǝn, ularning arisida yürimǝn; ularning Hudasi bolimǝn wǝ ular Mening hǝlⱪim bolidu» — «Law.» 26:12 wǝ «Yǝr.» 28:32, «Əz.» 32:27ni kɵrüng. ■ 6:16 Mis. 29:45; Law. 26:11-12; Yǝr. 32:38; Əz. 37:27; 1Kor. 3:16; 6:19; 10:7, 14; Əf. 2:21; Ibr. 3:6; 1Pet. 2:5 □ 6:17 «Ularning arisidin qiⱪip ketinglar, manga ayrilinglar... ⱨeq napak nǝrsigǝ tǝgküqi bolmanglar» — «Yǝx.» 52:11ni kɵrüng. Əslidǝ bu sɵzlǝr Israilƣa Babil imperiyǝsidiki kǝyp-sapa wǝ butpǝrǝslikni taxlap qiⱪixi üqün eytilƣan. «xundila Mǝn silǝrni ⱪobul ⱪilimǝn» — «Əz.» 20:41ni kɵrüng. ■ 6:17 Yǝx. 52:11; Əz. 20:34,41; Wǝⱨ. 18:4. □ 6:18 «Mǝn silǝrgǝ Ata bolimǝn, silǝr Manga oƣul-ⱪizlirim bolisilǝr» — Tǝwrat, «2Sam.» 7:14, «Yǝx.» 43:6, «Yǝr.» 31:9ni kɵrüng. ■ 6:18 2Sam. 7:8,14
☰