LUKE
Hamadefal
Ebangelium we tefayel Luke ila ye halehaloh Jeus le iy Demer we Deus ye hatugulu ngalir re Israel, ngo wol iy Demer we yar panger yarmat. Luke ye wol tefadiy lal babior le Espritu Santus la lamliyel Samol ye fesang Jesus ye bela “foloyu Hapatpat Momay we ngalir mael hafohoy,” iwe ngo Ebangelium le ila ye ssogol kofal hafelfeler rechoka re hafohoy irel sew mo sew formel. Lal pangal loh Ebangelium le ngo yor depel rraey mo cchehas iyang, le ye hammngali chog momol kowe ye hamo irel molwe chapdagel dah Ebangelium le we ye kapta kofal yal budoh Jesus, iwe mo molwe haygugul loh Ebangelium le we ye kapta kofal Jesus yal bidah wol lang. Yeramtale ye tefa kaptal yal kkelloh mo yal palengloh tugulul ladep le yar Kristiano wol miril yael Jesus bidah wol laeng. Wol iy chog yeramtale mele ye tefa babior we Acts.
Meka yadol momol la harwowal mo ila hawolowal (kemahoy mokwe palpal meka yadol babior le, le ye kketabdiy mo wototol) ila Ebangelium le chog mele si wiri mo iyang. Meka ila mokwe kaptal ton kowe yar angelus kowe mo chol matmetal saaf kowe rela tefael mo irel Jesus irel yodwe ye subdoh, mo molwe kaptal Jesus mo lal Templum we irel yodwe ye chil semal yalwich tarmal, iwe mo molwe fiyongol yeramtal Samaria we ye Momay, mo fiyongol Tarmal We Ye Tamel Loh. Lal pangal loh Ebangelium le ngo ye kkel kaptal mapel, mo kaptal Espritu Santus, mo kofal yar fefel yengang irel yengang ka yael Jesus, mo kofal yael Deus ma hachuya molfid.
Palpal Meka Yadol Babior Le
Hamadefal 1:1–4
Yal subdoh mo yal faholdah Johannes Baptista mo Jesus 1:5—2:52
Yael Johannes Baptista yengang 3:1–20
Yael Johannes Baptista baptismusgili Jesus mo yael Moniyan we hagla Jesus 3:21—4:13
Yael Jesus yengang luwul yarmat mo woal Galilee 4:14—9:50
Ye chuy mo Galilee sa loh Jerusalem 9:51—19:27
Hartal wiik mo lengchel Jerusalem mo woal Jerusalem 19:28—23:56
Yael Samol molow tefael mo irel maes, mo yal ma llah ngalir yarmat mo yal bidah woal laeng 24:1–53
1
Ebangelium We Tefayel
Hamadefal
Ssarolwom ho Theophilus:
Ye cholop yarmat le resa yedamgili bo rebe tefadiy ragregel mekla sa weldoh luwulmem le sa tugul depmem iyang. Re tefadiy lal babior mekla siya rongrong mo irer rechokla re mol wiri meka ngo re foloyu mekla kaptal. Ssarolwom ho Theophilus, isa cchiy hamayu pangal meka mo irel mala chapdageldah ngo isa luluwaley bo ye momay le ibe tefadiy ragregel meka bo yiglug. Ibele foru mele bo hobe gola mala tosol kofal pangal mokwe resa foloyu ngalug.
Kaptal Yal Be Subdoh Johannes Baptista
Wolmol Yerodes we kingel Judea ngo ye mel semal temarong le Zechariah mala idal le ye budoh mo irel rel halengel temarong we yael Abijah. Fefel la ril ila Elizabeth mala idal; ila ye budoh mo irel haleng we yael Aaron we sew halengel temarong.+ Rorumal ngo ye fel yar popoa sew mo fael metal Deus ngo re talenga pangal hatobtob kowe yael Samol mo foloy kowe yal. Tor layur yalwich bo ye teyoh le ye siyal Elizabeth, ngo igla ila ir rorumal ngo resa malelap mo yulolap.
Irel yodwe rel halengel temarong we yael Abijah mele re yengang ngo Zechariah ye foforu yengang kowe temarong rema foru lal Templume we. Yodle ngo sa tugul le Zechariah mele yebe hagsu incense we wol altar we. Iwe yesa bulong lal Templum we yael Samol. 10 Irel yodwe sa gus incense we ngo yarmat re ttey le re memapelmo merawayel loboswe ye mel Altar we rema fifis incense uwol. 11 Semal angelusel Samol yesa llah ngali le ye su mo rela gilemra irel altar we. 12 Yodwe Zechariah ye wiri ngo yesa lluwdah ngo sa budoh yal motog. 13 Iwe ngo angelus we sa kangalu bo, “Ho towe motog ho Zechariah! Deus yesa rongrong yalol mapel we yam, ila ngo Elizabeth we rim ye bele siylagili semal yalwich mal. Iwe ngo hobe hadeda bo Johannes. 14 Yebe kkel yam raey mo cchehas ngo ye wol cholop rechokla yebe kkel yar raey irel yodla yebe subdoh iyang. 15 Yebe mel le semal mal le ye tagiyet mo fael metal Samol. Ye towe ma yul wine hare hachi ka ye kkel. Ye bela subdoh chog ngo ye mel Espritu Santus uwol.+ 16 Iwe ngo ye cholop yeramtal Israel le bele hatefalir ngal Samol le yar Deus. 17 Ye bele hamo mo imol Samol le yebe kkel, ngo ye kkemal le yebe wochog profeta Elijah. Ye bele wol hatefali fengalir temtam mo loaloy; ngo ye wol hatefalir yarmat ngal yalap la ye fel; ngo ye hafle ngal Samol mekla lol.”+
18 Zechariah sa kangal angelus we bo, “Be ifa sengal ngo isa gola le yebe yoh mekla ho sosor? Ngang ila isa malelap ngo mala riy ila sa wol yulolap.”
19 Angelus we yesa sor bo, “Ngang Gabriel. Ima su fael metal Deus, le iy mele ye fangdoh ngang bo ibe kangalug hapatpat momay le.+ 20 Iwe ngo gel ho ted chepar irel meka ikangalug. Iwe ngo bela hola mala yodol ngo bele llah le ye katos meka ikangalug. Ila towol mmal le hobe hapatpat le fal mala ho te chepar irel meka iy sa kangalug. Ho bele paoy le towol mmal le hobe hapatpat yee la hola yodla ihatugulu ngalug bo be llah le ye katos meka iy kangalug.”
21 Chowe re wiwidi Zechariah resa luluwaley hare meda mele sa sulay lal Templum we iyang. 22 Yodwe yela buyoy ngo tay mmal le yebe hapatpat. Iwe chog ngo resa gola le Samol yesa llah ngali mo lal Templum we. Tor sepad hapatpat le ye mmal le yebe kangalur. Iwe yesa pongpong ngalir chog.
23 Yela haw bungul yal yengang mo lal Templum we ngo Zechariah sa tefael loh lubugtal. 24 Yela wol miril ngo yesa siyal molwe ril, iwe ngo lemow meram le ye mel chog irel imw we imwer. 25 Iwe ngo yesa sor bo, “Igala ila Samol yesa holbuwayey bo yesa hachuyaloh maa we yai!”
Kaptal Kofal Yal Be Subdoh Jesus
26 Yela wolow meram yael Elizabeth siyal ngo Deus yesa fangdiy angelus we Gabriel irel sew haplom woal Galilee le Nazareth mala idal. 27 Angelus we ye hasidoh sew hapatpat irel semal lefechig le Maria idal. Maria ila resa faesul kapta mo semal mal le Joseph idal bo rebe ppao fengal. Joseph ila ye budoh mo irel daowe yael King David.+ 28 Yesa budoh angelus we irel lefechig we ngo yesa kangalu bo, “Ha rrayi lal depom! Samol ye mel irem ngo yesa holbuwah mo luwulur fefel!”
29 Iwe sala weres loh lal depel Maria irel mokwe yalol angelus we ngo yesa luluwaley loh chog hare meda fael mokwe yalol angelus we ngali. 30 Iwe angelus we yesa kangalu bo, “Maria, ho towe motog. Ye fel depel Deus irem. 31 Ho bele siyal le hobe dimolwagili semal yalwich mal. Iwe ngo hobe hadeda bo Jesus.+ 32 Yebe tagiyet ngo rebe ffesangu le iy Lol Deus we ye Hartal Tagiyet. Samol Deus ye bele foru le be mel bo semal king, le be wochog David we yal chaep,+ 33 ngo ye bele mel le kingel haleng we yael Jacob le towe yor siyal ngo mala lamliyal ila tor yugul!”
34 Maria sa kangalu angelus we bo, “Ngang semal birgo. Be ifa sengal chog ngo sala mmal mala ho sosor?”
35 Angelus we sa kangalu bo, “Be bidiy Espritu Santus uwom ngo mala kamalal Deus be mel uwom. Ila fal yalwich le ye santus le rebe ffesangu bo Lol Deus. 36 Luluwaley Elizabeth we chol bugtam. Iwe re sor bo towe yoh le yebe loloy ngo yela igla le sa yulolap ngo sa wolow mermal yal siyal. 37 Bo tor mele towe yoh ngal Deus le yebe foru.”+
38 Iwe ngo Maria sa sor bo, “Ngang re haforol yalol Samol. Ligdi bo yebe faor ngaliyey le be wochog ikala hosa sor.” Iwe ngo angelus we sa ligdi Maria ye sa loh.
Maria Yela Tefael Mo Irel Elizabeth
39 Yela wol miril ngo Maria sa hamallo fedaley ngo yesa yesa loh le ye nngat wol sew haplom le ye meldah wol tayit mo wol Judea. 40 Yela bulong lal imw we imwel Zechariah re sala wer fengal mo Elizabeth. 41 Yodwe Elizabeth ye rongrong chog lliyalol Maria ngo yesa mmagud yalwich we mo lal siyal. Iwe ngo yesa bidiy Espritu Santus uwol Elizabeth. 42 Ngo yesa tawulagliloh le ye sor bo, “Ho hartal yolbuw mo luwur panger fefel ngo yebe wol yolbuw yalwich la ho bele dimolowagili! 43 Meda mele sala wel ngaliyey mele iyang. Meda mele sil Samol la yai sala budoh tefael mo irey iyang? 44 Yodwe chog iy rongrong lliyalom ngo sa mmagud yalwich le mo lal mele siyey irel yal raey. 45 Ifa lepal yam raey le yela tugul lal depom le mala yalol Samol ngalug ila ye bele llah le ye katos!”
Tonol Hapingping We Yael Maria
46 Maria ye sor bo,
“Mele buley ila ye kapingpinga Samol;+
47 sa momay depel mele nguluy bo fael Deus le yai Demer,
48 bo ye chil luluwaleyey chog le ngang re haforol yalol le iy totol!
Bele chaep igla sa loh le pangal yarmat ngo re bele ffesanguyey bo iraey,
49 le fal mekla ye paleng fal le Deus le ye Hartal Tagiyet sa foru ngalyey:
Ye santus mala idal;
50 Pangal yad ngo ye kaweraloh ffahol ladep la yal ngalir rechoka rema hasrowu.
51 Yesa kaweraloh mala kkelal ngo ye hataropropa yar luluwal rechokla re hattodah.
52 Yesa hatetalordiy King kala re tagiyet mo wol mekla liliyer ngo ye hatagitardah rechoka re totol.
53 Yesa fang ngalir rechokla re hafohoy pangal mekla ye momay,
54 ngo yesa ddaberloh rechoka re mmal le tor mele ye fang ngalir. Ye yitli chog liliyel molwe ye hatugulu ngalir chapdoh kowe yach.
55 Yesa budoh tipingi Israel we yal re hagoloy. Ye luluwaley chog le yebe kkewar ngal Abraham mo panger chol daowe yal ffahol ladep la tor siyal!”
56 Malbo be suluw meram yal mel Maria irel Elizabeth ngo yesa moch tefael ngal bugtal.
Yal Subdoh Johannes Baptista
57 Yela hola yodwe yebe molow Elizabeth iyang ngo ye dimolowagili semal yalwich mal. 58 Mekla yeramtal mo rechokla re harpa resa rongrong molwe ye kamdidiy we Samol yesa faor ngali Elizabeth. Iwe ngo panger fengal mo Elizabeth ngo yesa raey lal deper.
59 Yela haw bungul yalwich we ngo resa budoh bo rebe hagilla ngo re hadeda ngal Zechariah we idel molwe temal.+ 60 Iwe ngo molwe sil sa sor bo, “Yeab! Mala idal ila be mel bo Johannes.”
61 Iwe ngo resa kangalu bo, “Iwe ngo ifa sengal mala tor semal yeramtam le ila sengal idal!” 62 Iwe resa pongpong ngal Zechariah hare ifa sew yid le ye dipli bo yebe hadeda ngali yalwich we.
63 Zechariah yesa dongor sew mokwe rema teftaf uwol ngo yesa tefadiy bo Johannes mele idal. Pangerloh ngo re lluwdah irel molwe. 64 Irel chog yodle ngo Zechariah sa mmal le yebe kaptapat. Iwe ngo yesa chaep yal hapingpinga Deus. 65 Pangaer rechokwe re tteydoh ngo sa budoh yar motog. Iwe ngo sa palengloh kaptal meka mo wol pangal loh lobowle mo wol Judea. 66 Panger rechokwe re rongrong kaptal molwe ngo resa luluwaley long lal deper ngo resa kasiy bo, “Be ifa sengal yalwich le wagey? Yesa lleloh le ye mel mala kkelel Samol uwol.”
Yalol Zechariah Irel Meka Ye Bele Weldoh
67 Espritu Santus yesa bidiy woal Zechariah we temal Johannes. Iwe Zechariah yesa kaptaloh mokwe yalol Deus:
68 “Siya hapingpinga Samol Deus we yar re Israel!
Yesa budoh bo be tipingir ngo ye hataldagir mekla lol.
69 Yesa hayaho ngalgich Demer we ye tagiyet le ye budoh mo irel daowe yael David we yal re hagoloy.
70 Muswe chog ngo yesa hatugulu ngalgich mo irer profeta kowe lol we re santus,
71 le iy yebe hadoragich mo irer rechoka re hatodah ngalgich ngo ye taldigich mo irer rechoka re hafobidirigich.
72 Ye sor bo yebe kaweraloh ffahol ladep la yal ngalir chapdoh kowe yach.
Iwe ngo ye mel chog lal le yebe foru mokwe ye mel lal bogtag we yal ngalgich we ye santus.
73-74 Ye hatosiya ngal Abraham we yach chapdoh le yesa hatugulu le yebe hafaligich mo irer rechokla re hattohar ngalgich.
Iwe ngo ye taldigich bo sibe foru mekla yalol le si towe motog,
75 bo si bela mel le sibe santus ngo si fel mo fael metal irel yodle si molow iyang.
76 “Gel layi, re bele ffesangug le gel semal profeta le lol Deus we ye Hartal Tagiyet.
Ho bele hamo mo imol Samol bo ho bela hafle mala yalepal,+
77 ngo hobe kangalur mokwe lol bo ir ila re bele daor bo ye bele hachuya molfidir.
78 Deus le yach ila ye malulu ngo ye ffaho depal.
Ye bele fang ngalgich termal molow,
79 le ye bele werdiy mo wol laeng le yebe werloh uwor rechokla re mel luwul rochopung ngo resa harpal mes bo yebe maldi yalap la yebe hasgichloh luwul falmay.”+
80 Yela doh yalwich we ngo ye kkel ngo ye fel depel Deus irel, ngo yema mel fedal chog loboka ye tolmay loh yee la hola yodwe ye budoh irer re Israel.
+ 1:5 1 Ch 24:10 + 1:15 Nu 6:3 + 1:17 Ml 4:5–6 + 1:19 Dn 8:16; 9:21 + 1:27 Mt 1:18 + 1:31 Mt 1:21 + 1:32 1:32–33; 2 S 7:12, 13, 16; Is 9:7 + 1:37 Gn 18:14 + 1:46 1:46–55; 1 S 2:1–10 + 1:59 Lv 12:3 + 1:76 Ml 3:1 + 1:79 Is 9:2