PHILIPPI
Hamadefal
Babior we yael Paulus ngalir Kristianol Philippi ila Paulus ye tefaloh irel metamol eklesia we ye chapdah mo woal totolol Europe, woal sew mokwe faluyel Roma we ye mel woal Macedonia. Ye teftaf irel yodwe ye mel iy apostel le lal kalbus; iwe ngo ye teftaf irel sew yad kowe sa weres lal depal irel yar sibis chol yengangel Kristiano kowe ma hapaliyel ngali, ngo ye wol tayikof lal depal irel foloy kowe te katos we resa fofoloyu mo irel eklesia we wol Philippi. Iwe ngo yalol babior le ila ye llah rraey mo luglugul ladep mo iyang, iwe ngo hamadefael mele ila ye mel chog irel kkelel yael Paulus tugulul ladep irel Jesus Kristus.
Mala metamol fael yal teftaf babior le ila yebe kangalur Kristianol Philippi yar hachigchig irel kkefang we re fangloh bo hammalel irel yodwe yesa hafohoy. Yesa tapeli yodle bo yebe hakkela deper bo hare yebe kkel chog lal deper, ngo ye kkel yar luglug le ila mwo re mel luwul weres kala yar mo hafohoy irel igegel yar memel. Ye wol kangalur bo rebe hatetalor bo rebe wochog Jesus ngo re towe dabey depel yar luluwaley chog kofer llufulyer mo yar habos. Ye hamangi ngalir le yar molow irel yar sew chog mo Kristus, ila sew kkefang le ye budoh mo irel haradiya la yael Deus le yesa yoh ngalir mo irel yar tugulul ladep, ngo yete yoh ngalir mo irel yar ma foru mokwe Hatobtob we yar Jews ye sor. Ye tefa kofael rraey mo hopos la yael Deus le yema fang ngalir rechokla re mel le re sew chog mo Kristus.
Babior le ila ye gilafiloh chog irel yal kapta kofael rraey mo luglugul ladep mo yar sew chog yarmat, iwe mo yedamgel irel tugulul ladep mo molow le yar Kristiano. Iwe ngo ye wol halehaloh lepal kkelel yael Paulus hachangi eklesia la wol Philippi.
Palpal Meka Yadol Babior Le
Hamadefal 1:1–11
Igegel yal mel Paulus llufulyal 1:12–26
Yach molow irel Kristus 1:27—2:18
Kofael mekla Timothy mo Epaphroditus 2:19–30
Yal hadpar irel rechokla rebe tayikof ngalir mo hamerah kala rebe chungu 3:1—4:9
Paulus mo yarmetael Philippi kala wol maryarel 4:10–20
Haygul loh 4:21–23
1
Babior We Yael Paulus Ngalir Kristianol
Babior le ila ye budoh mo irel Paulus mo Timothy, le ir lol Kristus Jesus boy —
Ngalir panger mekla lol Deus woal Philippi mo mekla yarmetael eklesia, mo ikla rema tipingi eklesia le resa sew chog mo Kristus Jesus.+
Deus le Temach mo Samol Jesus Kristus rebe fang ngalugmi haradia mo hopos.
Paulus Ye Mapelar Rechokla Rebe Yawli Babior Le Yal
Pangal yad le ibe luluwalehmi ngo ima kangalu Deus yal hachigchig le fael hami, ngo pangal yad le ibe hasi yami mapel, ngo ima mapel luwul yai rraey bo fael molwe ha tipingiyey bo ibe foloyu Hapatpat Momay we irel yodwe ichapdah iyang yee, la hola igla. Ila ye tugul lal depey le Deus le iy mele ye chapidah yengang le ye momay mo luwulumi, ila yebe taboloh yal yangtali yee, la hamallo irel Ralla be tefaeldoh Kristus Jesus iyang. Pangal yad ngo ha mel lal yai luluwal! Ila ye fel le be iye sengal yai luluwal ngalugmi. Bo pangmi ngo ha tipingiyey irel yengang le Deus ye fang ngaliyey, yodle igla le imel lal kalbus, mo yodwe ited kalbus we ima kapta le ye katos Hapatpat Momay we bo yarmat rebe chepar iyang. Deus ye gola le ye katos meka ikapta irel yael sor bo pangmi ngo ihachangugmi le ye wochog yael Kristus hachangugmi.
Imapel bo be kkel yami hachangi fengalugmi ngo ha gola mekla ye katos, ngo ye fel yami ma hatugulu kofael formel, 10 ila ngo be yoh le habe gola mekla ye hartael momay. Iwe ngo habe tal mo irel pangal metmetael tayikof, mo der irel Ralla bela tefaeldoh Kristus iyang. 11 Ha bele la mel pangal mekla hama foru ngo bele momay. Halachog Jesus Kristus mele be yoh le be foru bo be iye sangmi, bo fael mala yarmat rebe hasrowu ngo re hapingpinga Deus.
Yach Molow Ila Kristus
12 Hami rewol bisiy, idipli bo habe gola le mokwe sa wel ngaliyey ila ye far kkel yal tipingi Hapatpat Momay we, bo be cholop tot yarmat le rebe chepar iyang. 13 Mala ye budoh mo iyang ila panger posol molwe bugter tamol mo ika sibis iga, ngo resa gola le ngang imel lal kalbus le fael mala ngang lol Kristus boy.+ 14 Yar kalbusuyey mele sa cholop meka wol bisich le sa kkel deper irel Samol, le sa pangal yad ngo re tay motog le rebe foloyu molwe yalol Deus.
15 Ye katos bo sibis re fofoloyu kofael Kristus, ngo te ila wey mo lal deper, ngo re foloyu le fael mala re loltemay irey. Iwe ngo rema fedgagil hapatpat. Iwe ngo sibis re foloyu Hapatpat Momay we, le ila wey mo lal deper bo rebe foru mekla ye fel. 16 Rechoka ila re foru mele luwul hachangcheng, bo re gola le Deus ye fang yai yengang bo ibe hatugulu ngalir yarmat le iy Hapatpat Momay le ila ye katos. 17 Ikla sibis rete foloyu kofael Kristus wol mala ye fel, bo far mil mala re luluwaley chog kofer llufulyer; re luluwaley bo rebe foru tot mekla ibe weres iyang igla ichil mel lal kalbus.
18 Iwe ngo tor pelal! Ngang irraey iyang — mala ye palleng fael ila folol kofael Kristus pangal yad, le be mmal te tugul hare re fofoloy bo yagel Kristus hare, re luluwaley chog kofer llufulyer. Iwe ngo ngang be tobtobloh chog yai rraey, 19 bo fael mala ngang igula le fael mapel kala yami mo Espritu Santus la lamliyel Kristus mele ibe tal iyang. 20 Ye kkel depey le ibe foforu chog yengang le yai bo de temmal ngaliyey. Iwe ngo ligdi bo igla mo pangal yad, ngo ibe hapatpat le tor le ibe metagu bo hare be ssor Kristus irel pangal mekla ima foru, te tugul hare imolow hare imes. 21 Meda fal mele molow? Ngang isor bo fael molow ila Kristus. Iwe ngo hare ibela mes ngo mmal le, ila be holayey. 22 Iwe ngo hare yor yengang kala ye palleng pelal le be yoh le ibe foru irel mele iy chil molow, ila ngo itai gola hare ye momay le ibe molow hare iy be mes. 23 Iy tai gola sew meka le ibe dabey. Yesa kkel depey ibe ligdi molow le wol talop, bo ibela mel irel Kristus le ila mala ye kkel yal momay; 24 ngo ligdi bo ye palleng pelal le ibe chil molow bo yaglugmi. 25 Ye tugul depey irel mele ngo igula le iy be chil mel iremi bo ibe tupungugmi habe rraey irel yami tugulul ladep. 26 Ila ngo ibela tefaeldoh iremi, ngo ha bele rraey bo fael mala ha bele rol sew chog mo Kristus Jesus.
27 Mala ye palleng pelal ila habe dabey chog mokwe Hapatpat Momay we kofal Kristus ye sor habe ma foru. Ila ngo te tugul hare ye yoh, hare ye teyoh le ibe buyoy tefael mo iremi, ngo ibe rongrong le sa sew chog yami luluwal irel yami yedamgel bo be yoh ngalugmi tugulul ladep le ma budoh mo irel Hapatpat Momay we. 28 Ha towe metagur rechokla re hattohar ngalugmi; ha hakkela dipmi pangal yad bo ila ngo be tugul deper le ir mele rebe lus, ngo hami habe kkel bo fael mala Deus mele ye foru bo habe kkel. 29 Deus mele ye foru bo be yoh le habe yengang ngal Kristus, ngo te mil chog mala habe chepar irel, bo habe wol hafohoy bo yagili. 30 Igla ila be yoh le habe dabeyey bo sibe rol yedamgel. Iye chog iy molwe ha wiri lepal yai yedamgel iyang ral kowe. Iwe ngo hasa rongrong le ila chog mala ichil yedamgel iyang igla.+
+ 1:1 Ac 16:12 + 1:13 Ac 28:30 + 1:30 Ac 16:19–40