11
Afositolo fwayafwayadiyao faꞋidiya givenuwaꞋatadi.
1 Siule tobohiyakweyao, yaku gakahikahi faꞋina iya kaliva kwavakwavaku tu au aiꞋadi wadaꞋatuvefaꞋileku. Tu taumadi ahe waꞋatuꞋatuvefaꞋileku.
2 Yaubada yana kaliva ginuwenuwedi be higa Bana anakaibe yana giba hinamiyami amine, meda iya ganuwenuwemi. Keke nuwanuwaku mali kaliva yana abavehimeya againe wanadamana faꞋina kaliva natuna kwamayoku kaliva saꞋeyana againe gihawakivefosena amine, meda iya omi moganemi saꞋeyana higa Keliso againe gahawakivefosemi. E, gaꞋitaꞋitaveꞋavimi be vaita kwamayoku yamumuna keke tamo kaliva hidadauveni-ma amine omi keke mali nuwanuwa wadamuliyeni-ma Keliso againe ganatunedamanemi be bana vavinena faꞋina.
3 Iya gamatauta vaita tuwai-lokalokana Setani oloto giluvaiyena be yana veꞋalololo againe Ive ginuwaꞋabiyena amine, meda mene kaliva tufoidi aikaunuwanuwadiyao omi yamumumiyao yami waꞋasehawahega Keliso anakaibe waluluveꞋavinena-ma hinanuwaꞋabiyemi be wananuyabuyabuna.
4 Boi tuwaina Yaubada giꞋiveninisema be agaimiya amaduꞋela Yesu faꞋine alumamalemi, yana VenuwaꞋata Yamumuna alukahihiyena be wavetumaganeni-yo AluꞋaluwa Mahalina wanuhagana. Tu muliya mene kaliva tufoidi taudiyao yadi nuwenuweya agaimiya hiꞋela Yesu ana itaꞋita tulina hilumamalemi keke Bana ime alumamalemi-ma amine. Yadi vehawala tulina tuli-moꞋena nonogana wamaduvegaꞋauledi be mali venuwaꞋata yamumuna wamaduvetumaganeni-yo mali aluꞋaluwa wanuhagana.
5 WaꞋitami, badi kalivai-dina wanuwenuwedi vaita yami afositolo kikaiwabudiyao kikaiwabu-moꞋediyao. KaꞋi mene wanuwanuwa vaita badi hidakaiwabuhegeku? Keke-moꞋa hidakaiwabuhegeku!
6 Wona velemona laumamala nuwaꞋabiꞋabina ana sikulu againe keke gadaluku tu weꞋa halamana agaikuya. Tova moyaꞋaina yaku laumamala tulina tulina agaidiya yaku halamana gaseseyemaunena be agaimiya gimahali-moꞋena, faꞋina keke-moꞋa badi hidakaiwabuhegeku.
7 Bonaku wanafatana. Boi Yaubada yana VenuwaꞋata Yamumuna faꞋina galumamalemi ana toveya, keke tamo akuga aku kevakeva o kaꞋi mani agaimiya gadavaini. Au hidede amine tauku gakihobuyeku be higa omi ganakilakahimi. Gavaiyami? KaꞋi medema vaita gadadewa koyona matamiya?
8 Aku veluga faꞋina mali ekelesiya mani hiveleku againe vaita agaidiya gadakaiꞋafu-yo higa omi hinafamiya akufaiweya gafaisewa.
9 Kadu boi omi buye kamiyami be tamo gavadi againe gakaliꞋuho ana toveya, keke veluga agaimiya gadaveꞋoꞋola, au badi tobohiyadeyao Masedoniya againe hitauya be hiꞋela-ma hivelugaku. Gavadi gavadi agaidiya gakaliꞋuho, medema hiveleku. Tauku gahawataku be keke tamo vita aku itaveꞋavina againe ganavelemi. Tuwaina hidedemi gahuluvimi, kadu aimo ganahuluvimi.
10 Keliso yana nuwanuwa velemoꞋena weꞋa agaikuya gidadauda tu gagahegahe. Keliso yana VenuwaꞋata Yamumuna omi miAkaiya agaimiya galumamalena tu keke tamo aku laufata nimamiya gadavaini. Hidedemi gagakahikahiku ada keke tamo hakwadi mene Akaiya ana fafali matatabuna agaidiya yaku gakahikahi ginahawatani.
11 Gavana faꞋina gagakahikahi vaita aku veluga mali ekelesiya hiveleku tu omi keke? KaꞋi keke agaimiya gadanuwanuwa faꞋina? Keke-moꞋa! Yaku nuwanuwa lakahina agaimiya ma Yaubada gihalamanena.
12 KaduꞋe boi gahuluvimi amine aimo kadu ganahuluvimi. Keke omi agaimiya mani ganavaini. Badi toveꞋalololo ma aꞋa mani agaimiya hivaivaina. Keke nuwanuwaku hinagahe hinagayo, “Bana Folo afositolo yadi faisewa giꞋabina amine, meda ime afifaisewa be aveꞋafositolo,” faꞋina keke mani agaimiya ganavaini. E, keke tamo gavadi ganahuluvini be medema againe adifaiweya taudiyao hinagakahikahiyedi higa vaita yadi faisewa yaku faisewa adi ita leleleya.
13 WaꞋita, wama kalivai-dina afositolo fwayafwayadiyao, yadi waveꞋalololo hifififaisewa, taudiyao hikivenuyadi vaita badi Keliso yana afositolo velemoꞋedi.
14 Taumadi! Yadi veꞋalololo keke wanayaulowogeni, faꞋina Setani tauna anafaiweya ginakivenuyana be ana nuya ginaꞋosena-ma mahamahalina vaita Yaubada yana tovenuwaꞋata amine.
15 Setani vaita mahalina amine tauna gikivenuyana faꞋina, kaꞋi yana tofaisewa taudiyao hinakivenuyadi vaita badi eda tunutunugina ana tofaisewa, au keke kanayaulowogedi. Aimo adi laufata yadi dewa koyona amine hinanuhagana.
Folo miKolinita gigahekilukilumedi.
16 KaduꞋe ganagahe-havagi. Keke gidalubodani be tamo hakwadi iya tokwavakwava ginanuwenuweku. Tu kaꞋi omi iya tokwavakwava wanuwenuweku digo, kaliva kwavakwavana waꞋatuvefaꞋilena amine iya wanaꞋatuvefaꞋileku be akufaiweya maꞋi ganagakahikahiku.
17 Hida tauku gagakahikahiyeku ma keke Kaiwabu nuwanuwana amine. Au babi ana nuwenuweya kaliva kwavakwavaku amine gagakahikahiku.
18 Kaliva tufoidi moyaꞋaidi babi ana gaitoma faꞋidiya higagakahikahi faꞋina, kadu iya ganagakahikahiku.
19 WaꞋitami, omi mene vaita yami wanuwahuya lakahina faꞋina tokwavakwava yami waꞋasehawahega waꞋatuvefaꞋiledi.
20 Ha! Omi atuꞋatuvefaꞋilimiyao nonogana. WaꞋitadi, kaliva higagakikaiwabu be vehimeya moyaꞋaina agaidiya omi hiveꞋagetogemi, o kaꞋi yami giba hiꞋa-Ꞌowona, o kaꞋi hiꞋalasebesebemi, o kaꞋi hiꞋitatagomi, o kaꞋi hitafimagigimi, tu gavadi-yo waꞋatuvefaꞋiledi?
21 Mena huluva aseꞋasebouna kadu toyogina amine keke gadahuluvimi faꞋina, iya vaita kaliva kowakowaku ada au gawowomumu.
Folo vita moyaꞋai-moꞋena ginuhagadi-ma giyakahina.
Tu iya vaita tokwavakwava amine ganagahe. Gavadi gavadi faꞋina mali kaliva yadi waselakalaka higakahikahidi, medemi yaku waselakalaka kadu iya ganagakahikahiku.
22 Gavaiyami? KaꞋi badi Hibeliu kaliva? Meda iya Hibeliu kaliva. KaꞋi badi Isileli yadi tubuga? Meda iya Isileli yadi tubuga. KaꞋi badi Abelahamo againe hitubuyemu? Meda iya Abelahamo againe gatubuyemu.
23 KaꞋi badi Keliso yana tofaisewa? Iya yana tofaisewa-moꞋa. Iya hima vaita kabakabaleyaku amine gagahe. Yaku vediwe yaku luku deliya againe gatubuhegedi. Aku munugakoyokoyo a gavaiyehi tu badiꞋiyao maꞋita. Alikeya yaku lowogaluvaluva tova a gavaiyehi.
24 Tova faifi miYuda bulava metametana againe hilaulauku yadi ailauga teti-naeni (39) amine.
25 Tova tohiye miLoma fuluma againe hilaulauku, tova saꞋeyana miYuda hifihafihaku higa hidatutuveꞋalikaku, tova tohiye laiya gatula, bogi saꞋeyana aiyeta saꞋeyana laiyoweya gakayokayo.
26 Tova moyaꞋaina ganunumiyamiyana. Abagilagi vaita gufeya gadanuhagani, vaita tomunugakaiꞋafu agaidiya, vaita tauku yaku yoꞋo kalivai-dina agaidiya, vaita yoꞋo tulidiyao kalivai-dina agaidiya gadanuhagani. Kadu vaita melaleya vaita walaꞋaiya vaita lehageya abagilagi gadanuhagadi. Kadu vaita tobohiyakweyao veꞋalololodiyao agaidiya gadagilagi.
27 Yaku wavediwe gafifaisewa kadu bogi a gavaiyehi keke gadadauda. Mafulauga agotaina gaꞋayaꞋayaunena. Tova moyaꞋaina akuga keke, yaku aiwaꞋu keke, yaku lifi keke.
28 Mena vitai-dina ahe gayakahidi tu kadu vita tufona moyaꞋaina keke gadavehawadi-ma agaidiya badi afositolo fwayafwayadiyao gatubuhegedi. Kadu keke mena gaitomai-dinagaga gadanuhagadi, au aku vita saꞋeyana lakahina ma tovetumagana adi yoꞋo fafali tulina tulina agaidiya nuwaku ginanauna lakahina, kaꞋi yadi vetumagana hikidonena o kaꞋi keke.
29 HakwaꞋadi yana vetumagana againe gigakowakowa, medema iya buye gakowakowa gaꞋayaunena. Kadu hakwaꞋadi dewa koyona ginuwaꞋabiyeni-yo gibeꞋu, medema faꞋina gaꞋaseꞋuꞋaulolo be aseꞋasekuya vaita ai gidaꞋalaꞋalata. Au hidedemi aku vita tulina tulina gawahiwahidi.
30 Tu kaꞋi gilubodaku be gadagakahikahiku digo, gaitoma tulina tulina yaku gakowakowa hiseseyemaunedi-ma faꞋidiya ganagakahikahiku.
31 Yaubada gihalamaneku tu gagahegahe, Bana Kaiwabu Yesu yana Yaubada kadu Tamana. Bana ana egana kanakilakahi-vagahina.
32 Boi tuwaina Damasiko againe gamiyami ana toveya, melala ana tovehimeya saꞋeyana bana Kini Aletasi faisewai-nadi faꞋina givegidena-ma nuwanuwana ginakiveꞋaviku faꞋina melala ana abaluku hibodafifina.
33 Tu tobohiyakweyao Yesu yana yoꞋo agaidiya feyawa againe hidodoku digo yogowaiya hisehobuyeku melala ana sifa kugakugana tabone hitunevelowoku, ada au Kini gaꞋotayabuyabuna.