3
Vavinemiyao be moganemiyao.
1-2 Tu omi vevine vetuvetumaganimiyao Kaiwabu yana vehimeya amine yami wawowomumu moganemiyao agevavadiya wanamiyami. Hidede amine agevavadiya wanamiyami be higa kaꞋi moganemiyao tufoidi keke Yaubada bonana hidavetumaganeni digo, mena yami huluva yamumuna againe wananuwaꞋatuyaudiyedi be Yaubada againe hinavetumagana. Keke vaita yami gahegahe againe wananuwaꞋatuyaudiyedi, au yami huluva yegayegana kadu yami veꞋamohimohina hinaꞋitani-yo Yaubada againe hinahagaviladi be hinavetumaganena.
3 Ami aiwaka ana ita inubana keke wowomi ana vaigau againe wananuhagani, higa vaita uꞋumi wanaꞋamoni o kaꞋi odoꞋodo, mokula fatana lakahina wanavelakavini o kaꞋi doki nuwavaivaina wanaꞋoseni-yo kaliva matadiya wanaveꞋiꞋaiwaka.
4 Au ami aiwaka inubana ma nuwahinagemiya. Nuwami umaumana kadu niwaniwalovina amine wanahuluhuluva. Mena nuwahinagemi ana vaigau au fatana lakahi-moꞋena Yaubada matane, kadu gaitoma miyamiya-vagahina. Atu wowomi ana vaigau ma aimo ginayawowola.
5 FaꞋina badi vevine tuwai-moꞋena himiyami be Yaubada againe hihawahegedi, ada yana wonadabadaba guwana faꞋina hilulauboda-ma hidede amine adi aiwaka faꞋina taudiyao hiꞋihagihagiyedi, au moganediyao adi wawowomumu agevavadiya himiyami.
6 Meda anafaiweya Sela moganedi Abelahamo hiꞋiꞋidibumuhigena be hivewagana yadi kauveꞋa. Ada kaꞋi omiꞋiyao wanahuluva yamumuna ada keke tamo gavadi faꞋina wanamatauta, au omi vaita Sela natudiyao nimadi wavaina.
7 Tu omi kaliva moganediyao meda anafaiweya badi vavinemiyao wananuwenuwedi be buye wanamiyaluga. Badi vevine wowokabekabebediyao faꞋina yami waveꞋamohimohina wanahuluvedi. OmiꞋiyao kadu badiꞋiyao buye yawai-vagata Yaubada givetalaiyena-ma wananuhagana faꞋina, vavinemiyao wanawowomumuyedi. Hidede amine wanahuluva be higa keke tamo gavadi yami veꞋoꞋola Yaubada againe ginalubababalimi.
Tobohiyamiyao agaidiya wananuwanuwa hagihagina.
8 Kafoi tobohiyakweyao, yaku nuwanuwa tabo-moꞋena faꞋina ganagahe. Nuwanuwaku moyaꞋaimi veyao againe wanamiyami yami nuwanuwa saꞋeyana. Yaubada yana yoꞋogaga agaidiya wavetobohiyana faꞋina buye wanaveꞋahawahawahega. Tobohiyamiyao adi ayauna wanaꞋayaunevaisedi kadu yami wanuwahobu wanahinekalikaliyedi.
9 Kaliva yadi koyona agaimiya keke koyona againe wanafatani, kadu yadi ihawadamana keke ihawadamana againe wanafatani. Keke medede amine wanahuluva, au badi faꞋidiya wanaveꞋoꞋola be higa Yaubada ginanuwakabubuyedi. Yaubada gikovami be yana nuwakabubu wananuhagana faꞋina, kaliva yadi koyona nuwakabubu againe wanafatana.
10 Meda gahe saꞋeyana Veyao Tuwaina ana bukiya gidadauda gigayo,
Hai kaliva nuwanuwana
yana wavemwamwala ginamiyami
kadu tova yamumuna ginanuhagana,
gilubodana be gahe koyona
kadu fwaya ginaveꞋeduꞋeduyena.
11 Kadu dewa koyona ginavekwaulaugena
be ginaꞋigibagiba yamumuna,
ada yana waꞋatuvefaꞋila veyao ginalelena.
12 Gilubodami be hidedemi wanahuluva,
faꞋina todewahagihagi agaidiya
Kaiwabu matana gise-vagahina,
kadu yadi veꞋoꞋola givenovenogalena,
atu tokoyona agaidiya gilumagibou.
Au hidedemi tuwaina Yaubada Devida awane gigahe.
Tamo tova yada dewa yamumuna faꞋina vita kanuhagana.
13 Tu kaꞋi tova moyaꞋaina nuwanuwami dewa hagihagina wanamulimuliyena, au keke tamo hakwadi ginaveꞋumagigiyemi.
14 Atu kaꞋi yami dewa hagihagina faꞋina veꞋumagigi wananuhagana digo, Yaubada vemwamwala ginavelemi. ToveꞋumagigi keke wanamatausedi, kadu vita faꞋina keke nuwami ginanauna.
15-16 Au aseꞋasemiya Keliso wanaveꞋamohimohinena, Bana yami Kaiwabu amanadi. Bana againe wahawahegemi-yo waluluveꞋavina. Gilubodami be yami abaluveꞋavina ana nuwanuwa wanahalamane-hagihagiyena be higa kaꞋi tamo hakwadi ginatoliluveluvemi ginagayo, “Gavana faꞋina Yesu againe ululuveꞋavina?”, au amifaiweya wanamadubonalaufata hagihagina. Tu bona bikabikana againe kadu yami wawowomumu agaidiya wanabonalaufata. Kadu yami dewa wanaꞋitaveꞋavina be higa keke tamo vita nuwafoumiya wanaꞋayauneni. Au hidede amine omi Keliso yana kaliva hinagahekoyokoyomi againe, yami dewa yamumuna hinaꞋita-yo yadi gahe-kawowo faꞋina wowomumu hinaꞋayaunena.
17 KaꞋi yami dewa koyona faꞋina veꞋumagigi wananuhagana, au taumiyao ami vita. Tu kaꞋi Yaubada yana nuwanuwa againe yami dewa hagihagina faꞋina veꞋumagigi wananuhagana, medema gilubodana.
Yesu yana alika be bafitaiso ana nuwanuwa faꞋina.
18 WaꞋita, Keliso yana dewa hagihaginaga tu veꞋumagigi ginuhagana be omi yami dewa keke hagihagina ma yami koyona faꞋina giꞋalika. Tova saꞋeyanaga giꞋalika be koyona fatana giluyabu-vagahina. E, yami koyona faꞋina giꞋalika be higa Yaubada againe ginavegaꞋaulemi. Wowona hiluveꞋalikana tu aluꞋaluwane wayawaina ivaguna gimimiyami.
19 Keliso giꞋalika-yo aluꞋaluwana gina toꞋalika aluwadi agaidiya gilumamala, badi toꞋalika yadi abageya yogoyogonidiyao himiyami-ma kalivai-dina.
20 Badi toꞋalikai-dina ma tuwai-moꞋena Nowa yana toveya Yaubada hidibutoyogena. Nowa waka giyogoyogona tu Yaubada yana waꞋatuvefaꞋila gibodaboda higa vaita mena kalivai-dina hidahagaviladi yo keke. Waka giyogona gihavaina kaliva hiyage, keke moyaꞋaidi hidayage au eitagaga hiyage. Ilumonaita giꞋadobodoboni-yo mala gituwa be waka gituwalakahini-yo badi toyage gufa againe adi kibababala hinuhagana.
21-22 Mena gufai-nadi yada abaluvefota bafitaiso faꞋina, ada tova adamoya medede againe ami kibababala wanunuhagana. Bafitaiso keke wowomi ana bwanene ana yaudihega faꞋina. Au hida bafitaiso ana nuwanuwa ma Yaubada kawonadabedabena vaita dewa koyona kavenikohiyeni-yo Bana nuwafouda ana bwanene givaihegena. Bafitaiso againe kibababala wanunuhagana faꞋina Yesu Keliso alikeya gimididi-havagi be lobameya gilaka ada Yaubada iꞋatagine gimimiyami tu lobama ana tovenuwaꞋata kadu ana tovehimeya kadu ana tofaiwala givehivehimeyedi.