25
Xoossaa Dunkkaaniyaa Keexxanau Imettida Imuwaa
1 GODAI Muuseyyo hagaadan yaagiis;
2 “Taayyo immiyoobaa ehaanaadan neeni Israa7eelatuyyo yoota; taayyo immanau a wozanai a imma imma giyo asa ubbaa imotaa neeni taayyo ekka.
3 Intte etappe ekkana imotai hagaa: worqqaa, biraa, nahaasiyaa birataa,
4 salo milatiya qacinaa, ochchaa teeraa milatiya qacinaa, shololla zo7o qacinaanne liiqo liinuwaa, deeshshaa agoziyaa,
5 dorssa orggiyaa calaa zo7o qalamiyan yeggi kessidoogaa, irppaniyaa, guuganttaa,
6 xomppiyaassi wogaraa zaitiyaa, tiyettiyo zaitiyaanne ixaanaa sawettiya qimamiyaa;
7 eefuudiyaaninne tiran wottiyoogan yeggiyo maragidiyaa geetettiya shuchchatanne hara phooliya al77o shuchchata eho.
8 “Yaatidi taani eta giddon aqanaadan, eti taayyo goinniyo sohuwaa giigissona.
9 Likke taani nena bessana leemisuwaadan Xoossaa Dunkkaaniyaanne a giddon de7iya miishshata oottite.
Maachchaa Taabootaa
10 “Eti guuganttaa mittaappe zananai naa77u waranne baggaa, gomppai issi waranne baggaa, geesai qassi issi waranne baggaa gidiya Taabootaa medhdhona.
11 Suwaanne kariyaa walahi bainna worqqan sheeshsha; a yuushuwaakka worqqa tigettan yuushsha aatta.
12 He Taabootaayyo oiddu worqqa sagaayota tiga; tigada oiddu gedetun issi baggaara naa77u sagaayota, qassi hankko baggaara naa77u sagaayota aatta.
13 Hegaappe guyyiyan, guuganttaappe kasota kessa; kessada worqqan sheeshsha.
14 Taabootaa tookkanau, Taabootaa miyyiyan de7iya sagaayotun kasota aatta.
15 Tookkiyo kasoti Taabootaa sagaayotu giddon de7ona; eti hegaappe mulekka kiyoppona.
16 Taabootaa giddon taani neeyyo immiyo, tammu azazoti xaafetti uttido naa77u masettida shuchchata wotta.
17 “Walahi bainna worqqaappe naa77u waranne baggaa aduqqiya, issi waranne baggaa aakkiya atto giyo sohuwaa qum77uwaa medhdha.
18 Qum77uwaayyo wurssetta naa77u bagga gaxan naa77u kiruubeta, qoxettida worqqaappe medhdha.
19 Issi kiruubiyaa issi bagga gaxan, naa77antto kiruubiyaa hankko bagga gaxan naa77aakka qum77uwaara gatta oittada medhdha.
20 Kiruubeti bantta qefiyaa denttidi, atto giyo sohuwaa qum77uwaa bantta qefiyan kuwayi wottona; qassi issoi issuwaakko simmi uttidi, qum77uwaa xeellona.
21 Qum77uwaa Taabootaayyo bolla baggan wotta; qassi taani neeyyo immiyo azazoti xaafettido masettida shuchchata Taabootaa giddon wotta.
22 Maachchaa Taabootaa bolla qum77uwaa bolli de7iya naa77u kiruubetuppe gidduwan taani nenaara gaittana; gaittada Israa7eela asaayyo taani immiyo azazo ubbaa yan neeyyo immana.
Oittaa Wottiyo Xaraphpheezaa
23 “Guuganttaa mittaappe zananai naa77u wara, gomppai issi wara, geesai qassi issi waranne bagga gidiyo issi xaraphpheezaa medhdha.
24 Yaatada walahi bainna worqqan sheeshsha; qassi a yuushuwan worqqaa tigettaa yuushsha aatta.
25 Hegaadankka, qassi gomppai takkaaro gidiyo shaashiyaa a bolli yuushsha aatta. Yaatada a bolli worqqa tigettaa yuushsha.
26 He xaraphpheezaayyo oiddu worqqa sagaayota medhdhada, xaraphpheezaa tohoti de7iyo oiddu zoozetun oitta.
27 Xaraphpheezaa tookkanau kasota aattiyo sagaayoti xaraphpheezau shaashiyaa lanqqiyan shiiqidi de7ona.
28 He tookkiyo kasota guuganttaappe kessada, worqqan eta sheeshsha.
29 Hegaadankka, qassi sainetanne cilppata, yarshshuwaa yarshshiyo wode go7ettiyo duuqqiyoobatanne xuu7ata walahi bainna worqqaappe ootta.
30 Ta sintti aattiyo geeshsha oittai ubba wodekka xaraphpheezaa bolli xayoppo.
Xomppiyaa Wottiyo Ballaa
31 “Xomppiyaa wottiyo ballaa qoxettida walahi bainna worqqaappe ootta; he ballai eqqiyo gedeekka, qassi giddo toomaikka ubbai qoxettida worqqaappe oosettanau koshshees. A qururuusoti, a kukkumotinne a ciishshati ubbai aara issippe oiqetti merettanau koshshees.
32 Miyyiyaara usuppun marati ayyo kiyona; maratuppe heezzati issi baggaara, qassi heezzati hankko baggaara de7ona.
33 Usuppun maratussikka huuphiyan huuphiyan issi issi kukkumoinne ciishshai de7iyo lauziyaa ciishshaa milatiya wanccai de7o.
34 Xomppiyaa wottiyo ballaassi giddo toomai, kukkumotinne ciishshati de7iyo lauziyaa ciishshaa milatiya oiddu wanccan alleeqetto.
35 Naa77ai naa77ai issippe waattan de7iyo heezzu maratuppe garssaara issi issi kukkumoi de7o.
36 Kukkumotinne marati ubbai xomppiyaa wottiyo ballaara issippe, oiqetti issuwaa gididi, walahi bainna worqqaappe qoxettidi oosettona.
37 “Hegaappe guyyiyan, xomppiyaa wottiyo ballau laappun xomppeta giigissada, eti sinttaa poo7ana mala xoqqu oottada wotta.
38 Xomppiyaa toissiyo qaphetanne eta wottiyoobata walahi bainna worqqaappe ootta.
39 Xomppiyaa wottiyo ballainne an go7ettiyo miishsha ubbai hasttamanne ichchashu kilo giraame gidiya walahi bainna worqqaappe oosettona.
40 Akeeka; taani nena deriyaa huuphiyan bessido leemisuwaa kaallada ootta.