19
Iyyoobi Haasayees
Hegaappe guyyiyan, Iyyoobi zaaridi, hagaadan yaagiis; “Intte tana aude gakkanaassi mudduuteetii? Aude gakkanaassi intte qaalan tana gaaccuuteetii? Intte tana tammutoo cayideta; tana kaushshiiddikka yeellatekketa. Taani tumu balidabaa gidiyaakkokka, ta balai tana oichchana. Intte taappe kehiyoobaa intteyyo milatin, ‘Hagee metoi ubbai a gakkidoogee, i moorido gishshaassa’ yaagidi, ta bolli pirddeeta. SHin ha metuwaa ubbaa ta bolli gattidaageenne gitiyan tana gelissidaagee Xoossaa gidiyoogaa erite.
“Taani, ‘Naaqettaas’ yaagada waassin, taayyo alliyaabi baawa; qaalaa xoqqu oottada, suure pirddaassi waassinkka, siyiyaabi baawa. Taani kanttennaadan Xoossai ta ogiyaa diriis; ta hemettiyoosaakka xuman gooziis. Ta duretettaa taappe qaariis; ta bonchchuwaakka taappe diggiis. 10 I tana mentteretti yeggiis; ta hidootaakka xaphuwaara xoqolettida mittaa mala oottiis. 11 A hanqqoi ta bolli eexxi kiyiis; i tana ba morkkedan qoodees. 12 Ta bolli woraajjanau i ba olanchchata kiittees; eti tana olanau ogiyaa kessoosona; ta dunkkaaniyaa yuushuwaakka dooddoosona.
13 “Xoossai ta ishata taappe haassiis; tana eriyaageeti muleera taayyo allaga gididosona. 14 Ta dabboti taappe shaahettidosona; ta laggetikka tana dogidosona. 15 Ta son de7iya imattati tana dogidosona; ta macca ashkkaratikka tana imattadaaninne betedan xeelloosona. 16 Taani ta ashkkaraa xeegin, taayyo koyenna; taani woossinkka, taayyo eenenna. 17 Ta maccaasiyaa ta doonaa peenuwaa ixxaasu; ta ishanttikka tana shenetoosona. 18 Harai attin, guutta naatikka tana karoosona; taani eqqiyo wode, ta bolli qilliiccoosona. 19 Ta mata laggeti ubbai tana shenetoosona; taani siiqidoogeetikka taayyo zokkuwaa zaaridosona. 20 Ta meqettai ta gogaara ohettiis; haiquwaappe qiisasan taani attaas.
21 “Inttenoo ta laggetoo, Xoossaa kushee tana dechchido gishshau, taayyo qarettite. 22 Xoossai tana yedettiyoogaadan, intte tana aissi yedetteetii? Hanno gakkanaassi intte tana tuggayidoogee gidennee?
23 “Hanno gakkanaashin taani haasayido qaalai, wai hassayettidaa gideerenneeshsha! Maxaafankka wai xaafettidaa gideerenneeshsha! 24 Daro gam77ana mala, birata maarisan zaallaa bollan woocettidi xaafetteerenneeshsha!
25 “Tana Wozidaagee paxa de7iyoogaanne wurssettan biittaa bollan i eqqanaagaa taani erais. 26 Ta gogai meetetti wurikkonne, taani ta ashuwaappe shaahettada, Xoossaa be7anaagaa erais. 27 Hara uraa gidennan, taani ta huuphen, ta aifiyan a be7ana. Hegaa gishshau, ta wozanai aiba laamotii!
28 “Intte, ‘Metuwaayyo unkkoi a gidido gishshau, ane haayite! A yedettoos!’ giikko, 29 bisuwaayyo yayyite! Xoossaa hanqqoi bisuwaara yaana; pirddai de7iyoogaakka erite” yaagiis.