33
Israa7eelatu Hemetaa Taarikiyaa
1 Israa7eelati Muuseenne Aarooni kaalettin, bantta citan citan Gibxxeppe kiyido wode, yaanidi hemettidosona.
2 GODAI azazin, eti baana beettaa doommido sohota Muusee xaafiis; eta beettaa maarai hagaa.
3 Koiro aginaayyo tammanne ichchashantta gallassi, Paasikaa bonchchiyo gallassaappe kaalliya gallassi denddidi, Gibxxe asai ubbai xeellishin, yayyennan Raamisappe kiyidosona.
4 He wode Gibxxe asai GODAI worido bantta baira naata moogoosona. Hagaadan oottidi, GODAI eta xoossatu bolli pirddaa ehiis.
5 Israa7eelati Raamisappe denddidi, Sukkota giyo sohuwan dunkkaanidosona.
6 Sukkotappe denddidi, bazzuwaa xeeran de7iya Etaaman dunkkaanidosona.
7 Etaamappe denddidi, Ba7aali-Xafoonappe arshsho baggaara de7iya Pihaahiroota simmidi, Migidoola matan dunkkaanidosona.
8 Pihaahirootappe denddidi, Zo7o Abbaa pinnidi, bazzuwaa biidosona. Etaama Bazzuwan heezzu gallassa ogiyaa hemettidi, Maaran dunkkaanidosona.
9 Maarappe denddidi, tammanne naa77u pulttotinne laappun tammu zambbati de7iyo Eliima biidi, yan dunkkaanidosona.
10 Eliimappe denddidi, Zo7o Abbaa lanqqen dunkkaanidosona.
11 Zo7o Abbaa lanqqeppe denddidi, Siinaa Bazzuwan dunkkaanidosona.
12 Siinaa Bazzuwaappe denddidi, Doofiqan dunkkaanidosona.
13 Doofiqappe denddidi, Aluushan dunkkaanidosona.
14 Aluushappe denddidi, Rafiidiman dunkkaanidosona. Yan asaayyo uyanau haatti baawa.
15 Rafiidimappe denddidi, Siinaa Bazzuwan dunkkaanidosona.
16 Siinaa Bazzuwaappe denddidi, Amuwaa Duufuwaa giyoosan dunkkaanidosona.
17 Amuwaa Duufuwaa giyoosaappe denddidi, Haxerootan dunkkaanidosona.
18 Haxerootappe denddidi, Riitiman dunkkaanidosona.
19 Riitimappe denddidi, Rimmooni-Pereezan dunkkaanidosona.
20 Rimmooni-Pereezappe denddidi, Liibinan dunkkaanidosona.
21 Liibinappe denddidi, Riissan dunkkaanidosona.
22 Riissappe denddidi, Qahelaatan dunkkaanidosona.
23 Qahelaatappe denddidi, SHefaara Deriyan dunkkaanidosona.
24 SHefaara Deriyaappe denddidi, Haraadan dunkkaanidosona.
25 Haraadappe denddidi, Maaqihelootan dunkkaanidosona.
26 Maaqihelootappe denddidi, Tahaatan dunkkaanidosona.
27 Tahaatappe denddidi, Taaran dunkkaanidosona.
28 Taarappe denddidi, Miitiqan dunkkaanidosona.
29 Miitiqappe denddidi, Hashimoonan dunkkaanidosona.
30 Hashimoonappe denddidi, Moserootan dunkkaanidosona.
31 Moserootappe denddidi, Bene-Yaa7iqaanan dunkkaanidosona.
32 Bene-Yaa7iqaanappe denddidi, Hoori-Hagidigaadan dunkkaanidosona.
33 Hoori-Hagidigaadappe denddidi, Yoxibaatan dunkkaanidosona.
34 Yoxibaatappe denddidi, Abroonan dunkkaanidosona.
35 Abroonappe denddidi, Eexiyooni-Gaabiran dunkkaanidosona.
36 Eexiyooni-Gaabirappe denddidi, Xiina Bazzuwan de7iya Qaadeesan dunkkaanidosona.
37 Qaadeesappe denddidi, Eedooma biittaa zawan de7iya Hoora Deriyan dunkkaanidosona.
38 Qeesee Aarooni GODAI azazin, Hoora Deriyaa huuphiyaa kiyiis; kiyidi Israa7eelati Gibxxe biittaappe kiyido oitamantta laittan, ichchashantta aginan, aginaayyo koiro gallassan yan haiqqiis.
39 Aarooni Hoora Deriyaa huuphiyan haiqqiyo wode, a laittai xeetanne laatammanne heezza.
40 Neegeeba Bazzuwan, Kanaanen de7iya Araada giyoosaa kawoi Israa7eela asaa yuussaa siyiis.
41 Israa7eelati Hoora Deriyaappe denddidi, Xalmmoonan dunkkaanidosona.
42 Xalmmoonappe denddidi, Punoonan dunkkaanidosona.
43 Punoonappe denddidi, Obootan dunkkaanidosona.
44 Obootappe denddidi, Moo7aaba biittaa zawan de7iya Abaariman dunkkaanidosona.
45 Abaarimappe denddidi, Diboona-Gaadan dunkkaanidosona.
46 Diboona-Gaadappe denddidi, Almmoona-Dibilaataiman dunkkaanidosona.
47 Almmoona-Dibilaataimappe denddidi, Nabo Deriyaa matan Abaarima deretun dunkkaanidosona.
48 Abaarima deretuppe denddidi, Yarkkoppe hefinttaara, Yorddaanoosa SHaafaa matan de7iya Moo7aaba Dembban dunkkaanidosona.
49 Yorddaanoosa SHaafaa matan de7iya Moo7aaba Dembban, Beeti-Yashimootappenne SHiixima Zanggaaraappe gidduwan dunkkaanidosona.
50 Yarkko hefinttaara, Yorddaanoosa SHaafaa matan de7iya Moo7aaba Dembban GODAI Muusa hagaadan yaagiis;
51 “Israa7eelata neeni yaaga; ‘Yorddaanoosa SHaafaa pinnidi, Kanaane biitti intte geliyo wode,
52 he biittan de7iya asaa ubbaa intte sinttappe yedettite; yedettidi shuchchaappe masettida eta misileta ubbaanne seerissidi medhdhido eeqata ubbaa xaissite. Eti goinniyo xoqqa sohota ubbaakka laalite.
53 Taani intteyyo he biittaa laatau immido gishshau, he biittaa laattidi, an de7ite.
54 Intte zariyan zariyan saamaa kessidi, biittaa shaakkite. Qoodan corattiya zaretuyyo daro laataa immite; qoodan guuxxiya zaretuyyo guutta laataa immite. Saaman eta gakkida augeenne etaagaa gidana. Biittaa intte maizza aawatu zariyan zariyan shaakki ekkite.
55 “ ‘SHin he biittan de7iya asaa intte yedettennan aggikko, intte ashshidoogeeti intteyyo intte aifiyaayyo pincco, intte miyyiyaayyo aguntta gidana; intte de7ana biittan eti inttena waayissana.
56 Intte eta yedettennan aggikko, eta bolli taani oottanau halchchidobaa intte bolli oottana’ yaagada yoota” yaagiis.