23
1 Neeni deriyaa haariyaagaara qumaa maanau uttido wode, ne sinttan de7iyaagaa loittada akeeka.
2 Neeni daro yora asa gidikko, naagetta.
3 I nena paaccanau danddayiyo gishshau, aadhdhida mal77o qumau yiiqetoppa.
4 Duretanau daafuroppa; hegaa mala keesiyaa agganau cincca gida.
5 Hegaa mala duretettai neeni xeellishin xayana; qefiyaa kessidi argganttaagaadan, saluwaa paallana.
6 Uuziyaa qumaa mooppa; a mal77o qumaakka maanau amottoppa.
7 Milatissanau i nena, “Ma; uya” yaageesippe attin, a wozanai nenaara de7enna.
8 Neeni miido qiiba qumaa cooyana; ne galataikka hada gidana.
9 Eeyyaassi payyabaa haasayoppa; aissi giikko, ne aadhdhida era haasayaa i karana.
10 Beni zawaa shoddoppa; qassi aawi bainna naatu gadiyaa zawaa sugoppa;
11 aissi giikko, eta ashshiya GODAI mino; i eta gishshaa nenaara mootettana.
12 Ne asttamaaree neessi odiyoogaa ezgga; ne haittaakka eraa qaalaakko yegga.
13 Na7a seerennan aggoppa; neeni a qaixaariyan wadhdhikko, i haiqqenna.
14 Neeni a qaixaariyan wadhdhikko, a shemppuwaa haiquwaappe ashshaasa.
15 Ta na7au, neeni aadhdhida eranchcha gidikko, ta wozanaikka ufaittana;
16 ne inxxarssai suurebaa haasayiyo wode, ta wozanai ufaittees.
17 Nagaranchchata qanaatoppa; shin ubbatoo GODAASSI yayyiyoogaa aggoppa.
18 Yaanikko neeyyo sinttanau sa7i kehana; sinttappe yaana kehikka neeyyo xayenna.
19 Ta na7au, siya; wozannaama gida; ne wozanaa suure ogiyan wotta.
20 Daro woine eessaa uyiyaageetuuranne ashuwaa muussau yaaretiyaageetuura zuppetoppa;
21 aissi giikko, mattottiyaageetinne yoranchchati manqqana; xiskkuwaa daroi asaa wurida curqqaa maizissees.
22 Nena yelida ne aawai odiyoobaa siya; ne aayyiyaakka ceeggido wode karoppa.
23 Tumaa, aadhdhida eratettaa, timirttiyaanne akeekaa shammappe attin, mulekka baizzoppa.
24 Xillo na7aa aawai keehippe ufaittana; wozannaama na7aa yelida urikka an poccu gaana.
25 Ne aawainne ne aayyiyaa ufaittona; nena yelidaarakka poccu gu.
26 Ta na7au, ta zoriyaa ezgga; taani haniyoogaadan hana.
27 Aissi giikko, shaaramuxiya maccaasiyaa ciimma ollaa mala; laggettuwaa oiqqiya machchiyaakka un77o ollaa mala.
28 A panggadan zuggada naagausu; ammanettenna attumaasaa asaa giddon darissausu.
29 “Woo!” giyo waasoi oossee? Azzanoi oossee? Ooshshi oossee? Zuuzuntti oossee? Gaasoi bainnan masunxxiyai oonee? Aifee zo77iyoi oossee?
30 Woine eessaa uyiiddi gam77iyaageetussa gidennee? Walahettida woine eessaa uyi uyi be7iyaageetussa gidennee?
31 Woine eessai zo77ido wode, a merai birilliyaa giddon phooliyo wode, uyishin yalalattiiddi geliyo wode, a xeelloppa.
32 Wurssettan i shooshshadan dukkees; mulumuqqe shooshshadankka ba yiishshaa yiishshees.
33 Ne aifee be7i erennabaa be7ana; ne wozanaikka suure qoppanaunne haasayanau danddayenna.
34 Neeni abbaa giddon dambbalai qaattiyo markkabiyaa xeeran zin77ida uraa mala gidana.
35 Neeni, “Eti tana dechchidosona; shin taani qohettabeikke. Eti tana wadhdhidosona; shin tau erettibeenna. Hara ushshaa uyanau taani aude denddanddinaashsha?” yaagana.