32
Bunumakau Mwanavauna Gonudi Nenei Si Fufuniya
Visime Nuvinavinana 9:6-29
1 Namoḡa si kitanisaiya vitana Mosese yana sobunemi koyei i vimwanenemataiya. Na fasinei Anoni si yokokwafuya keta si iyaviya si bwaduwa, “Kuta kita, guyau tamo kuta fufuniya be ita viketanunita. Noko namoḡanama Mosese Itifitei i kikinomana-nemiita eatu muka tata sanamanei avao i kanasiya.”
2 Eketa Anoni i nufata i bwaduwa, “Kakawami, natunatumi namoḡa be vivine kasi taniyanowanowa vigonudisi kwana kikakiya keta kwana nemiisiya nenekuwai.”
3 Eketa matatafusi kasi taniyanowanowa taniyasiyai si kikakiya keta si nemiina Anoni nenei.
4 Gonudi i visiya keta i vitava-budanisiya eketa bunumakau mwanavauna kana fusafusa maise, kaivakuku i fufuniya. Tovanama namoḡa kaivakukunama si kitiya, si bwauwa si bwaduwa, “Ake, Isineni! Nofe guyaunama o Itifitei i kikinomana-nemiita.”
5 Tovanama Anoni i kitiya namoḡa yasi fufuna, didiḡa i didiiya kaivakuku naunei keta i matakawa, “Kumana Yave yana ka tana fufuniya.”
6 Eketa tova i katakiya nuwabuniyai, namoḡa yasi yomuyomu si nemiina, vikanakooḡa bwanaosena keta keiya bwanaosena si savivinisiya. Si nuvitoḡa yasi ka be yasi ukowayu nenei, i nuvikwavisiya eketa si fufunakaokaoḡowa.
7 Eketa Yave Mosese i iyaviya i bwaduwa, “Ku sobu, uḡuna namoḡasima Itifitei ku nemiisiya, naki si go'yona nenekuwai eketa si dibutoyoikuwa.
8 Ketanama a visimeisiya sina muniiya, si visaḡaketuketuwiya. Tututausi fasisiyai bunumakau mwanavauna vigonudina si fufuniya, nenei si kodukoduwa keta si vivibwanaoseya. Avage si bwaduwa, ‘Ake, Isineni! Nofe guyaunama o Itifitei i kikinomana-nemiita.’
9 Namoḡa katekatesi i guamoka a sanamaniya.
10 Nofe tova ku teneiku be yaku kayokuḡa ina nuyauyauniya nenesiyai be ana nuyaunisiya. Eatu kwaḡa susukwauḡa ana givinakasiya be ina vikunuma nakasina.”
11 Eatu Mosese i gwaeiya yana Guyau Yave nenei, “Ae Yave, ya fiwana utubasinei Itifitei ku kikinomana-nemiisiya, na fasinei muka ya kayokuḡa nenei kuna nuyauneisi.
12 Taki kuna fufuniya, nao Itifita namoisi sina bwaduwa vitana fiyao Isineni waisi kuta fufuniya be fwayafwaya nofe etanei kuta nuyaune-koḡoisi tovanama ku kikinomana-nemiisiya keta ku nemiisiya koyai. Eketa ya kayokuḡa busubusuwanina nenei kuta onoviya ebe muka kuta nuyauneisi.
13 Kuta tukuya ka kaetoḡa Ebenaamu, Aisake keta Yakobo nenesiyai tauḡu ka wavai ya bwadudabadaba fifiwanina ku iyavisiya tovanama ku bwaduwa, ‘Susukwau ana givigeyanisiya maise kinavinavi kawasasakaoḡowai yota fwayafwaya nofe matatafuna a bwadudabedabiwa ana venisiya yasi fwayafwayavaḡata.’ ”
14 Noko nenei Yave yana nuwanuwa i kaviniya fiyao Isineni kasi nuyauneina fasinei.
15 Eketa Mosese i saḡaviniya gabana nuwesi beyabeyasi nimanei nukusi koyei i sobunemiya. Gabanasima nafafanisi nenesiyai Guyau yana visime i viginiwisiya.
16 Guyau tauna gabanasima beyabeyasi i fufunisiya eketa tauna i viginiwisiya.
19 Tovanama Mosese i nemiya kabaḡa niniunei keta bunumakau mwanavauna si fufunavikuvikukuniya i kitiya yota namoḡa si vaḡavaḡa eketa kayona i nubusubusuwaniya nenei, gabana beyabeyasi i tuḡaisiya fwayafwayai eketa koya uḡunei i biyavayavanisiya.
20 Namoḡa bunumakau mwanavauna kaivakukuna si fufuniya, i viya keta kaiyai i guwaniya. Eyo i usuya kausibi maise keta ukowai i viniya eyo fiyao Isineni i visimeisiya keta si yumiya.
21 Eketa Mosese Anoni i nutoninuvenuviya i bwaduwa, “Avamasi namoḡa nofe si fufuniya neneweu yo go'yona kunukubana nenei ku kanasuneisi?”
22 Eketa Anoni i nufata i bwaduwa, “Aiye, muka kuna kayokuḡa. Namoḡa nofe fufuna goyona kana diḡadiḡaina nenesiyai, naki ku sanamanisiya.
23 Na fasinei keta si iyavikuwa si bwaduwa, ‘Guyau tamo kuta fufuniya be ita viketanunikiya. Noko namoḡanama Mosese Itifitei i kikinomana-nemiikiya, eatu muka kata sanamanei avao i kanasiya?’
24 Na fasinei a iyavisiya keta aviyaonana na kasi kanibubuna gonudi si kikakiya. Tovanama si venikuwa, naki a teweye-kaoḡowiya kaiyai eketa nofe bunumakau mwanavauna kaivakukuna i kikinomana.”
25 Atu Mosese i kitiya Anoni namoḡa i gionovisiya eketa si akaokaoḡowa, keta nifanifaisi matasiyai o kafa sawaviniḡa nenesiyai.
26 Eketa Mosese i misiniya kabaḡa kana ketakawanai keta i bwauwa, “Kwaḡa aitevana Yave nenei ku kodukoduwa, ku nemai nenekuwai!” Eketa Nebi fasekwina nenei matatafusi namoḡa si nemiya keta si yokofifiniya.
27 Keta i iyavisiya i bwaduwa, “Isineni yami Guyau Yave nofemaise i visimeya, ‘Matatafumi na yami feto, kabaḡa kana matatafu bwatanei tu bwatanei, kwana kanasuniya keta yami sabu, unaunami keta unafafanimi kaivakuku nenei si kodukoduwa, kwana nuvimateya.’ ”
28 Nebi namoisi Mosese yana visime si muniiya keta kuyadayadanama nenei namoḡa 3,000 maise si nuvimatisiya.
29 Eketa Mosese i iyavisiya i bwaduwa, “Kwami Yave yana ketaketa kwa muniiya keta dawaniniina kwa fufuniya tovanama natunatumi keta unaunami kwa nuvimatisiya. Kimoki Yave naki i sawanuwagabubuwimiya keta i tenesinimiya be kwana vitovibwanaoseya fasinei.”
30 Kuyadayada kana vinuwa nenei Mosese namoḡa i iyavisiya i bwaduwa, “Go'yona goyomataina naki kwa fufuniya. Nofe tova ana makavinikuwa ana vaneya koyai Yave nenei ebe yami go'yona kana kioḡona fasinei, taki ita vinowaniya o muka.”
31 Eketa Mosese i savaviniya Yave nenei keta i nusifufuwiya i bwaduwa, “Eiyoi, namoḡa nofe naki go'yona goyomataina si fufuniya. Tututausi gonudi nenei kaivakuku si fufuniya eketa nenei si kodukoduwa.
32 Eatu naki yasi go'yona kuta vinuwateweiya. Eatu taki muka, nao nufunufunama namai ya namonamoḡa kasi wava ku viginiwisiya, nenei kaku wava ku viyaunei.”
33 Eatu Yave Mosese i iyaviya i bwaduwa, “Aitevana nenekuwai i go'yona, namoinama kana wava ana viyauniya yaku nufunufu nenei.
34 Nofe tova ku nai be namoḡa ku viketanuneisi kabainama a iyaviwa nenei keta kaku kaetoḡa abamei ina viketanuniwa. Eatu tovanama vimatadawana kana tova ina nemiya nenei, yasi go'yona fasinei ana vimatadawanisiya.”
35 Eketa kaivakukunama Anoni i fufuniya be nenei si kodukoduwa fasinei, Yave i vimatadawanisiya visafwavinaḡa goyona nenei.