40
Eketa Mosese kavenenakaoḡo fasinei namoḡa i vikokonisiya. Kavenena kaoḡonama nenei, Vada Tafutafuna sina yoniya na kana nogonogo nukusi keta yota tovibwanaose kasi nuya tafutafusi. Namoḡa yasi fuyonama naki kana fata nuwanuwasima kasi savivina fasinei. Besanenu, Ooniyabi keta kasi toovivita namoḡa be vivine tasike toginiginivava nukusi, ibasima si fufunisiya maisemoka Guyau Mosese i visawaveniya.
Vada Tafutafuna Kana Vimisiniyeina
1 Keta Yave Mosese i nusifufuwiya i bwaduwa,
2 “Manamana kiouna kuyadayada kana kafa viuḡu nenei, yaku Vada Tafutafuna kuna vimisiniiya.
3 Dedeni kana koni namai visime 10 sinenei kuna tenekanasuniya eyo kafa dawanafafana kana nuya naunei kuna teniya.
4 Sonama kuna kanasuniya keta kana nogonogo etanei kuna dawana. Yota kimayeta yana kafa misini kuna nemiiya keta kimayeta kuna tenisiya etanei.
5 Eyo kafa guvimamadi kana didiḡa vigonudina, kuna teniya dedeni kana koni naunei eketa nuya kuna nuvitanuniya Vada kana kawai.
6 Kafa vikanakooḡa bwanaosena kana didiḡa kuna teniya Vada kana kawa naunei.
7 Kaboma nakasina kafa katumimi kuna teniya Vada keta kafa vikanakooḡa bwanaosena kana didiḡa kasi sinefouwai, eketa ukowa kuna vininiwatotoiya.
8 Vada keta kafa vikanakooḡa bwanaosena kana didiḡa kuna sifafifiniya keta nuya kuna nukanekaneneiya wasiketa kana kawai.
9 Eyo muniyai givikanatafu kana bubu kuna viya keta Vada etana be iba matatafuna sinenei kuna vitowisiya. Kuna tenesiniya fasikuwai ebe ina vitafuwa.
10 Yota bubu nenei kafa vikanakooḡa bwanaosena kana didiḡa keta kana nogonogo nukusi kuna vitowisiya. Kuna tenesiniya fasikuwai ebe ina vitafuwa venemokena.
11 Kaboma nakasina kafa katumimi na kana kafa misini nukusi, bubu nenei kuna vitowisiya keta kuna tenesinisiya.
12 Anoni na natunatuna kuna kanasunisiya Vada Tafutafuna kawanei keta ukowa nenei kuna vitowisiya.
13 Nuya tafutafusi nenesiyai Anoni kuna okanikanibubuniya keta bubu nenei kuna vitowiya keta kuna tenesiniya ebe ina vitovibwanaoseya be ina vikaetoikuwa.
14 Yota natunatuna kuna nemiisiya keta kasi nuya kuna vikotonisiya.
15 Bubu nenei amasi ku vitowiya maise, tasike kuna vitowisiya ebe sina vitovibwanaoseya be sina vikaetoikuwa. Vitowanama nenei tasike be susukwasi si nenemiya, tova matatafuna sina vivitovibwanaoseya.”
16 Iba matatafuna Mosese i fufuniya, naki maisemoka Yave i visimeiya.
17 Eketa yamayamana kana kafa viuḡu manamana kana vinuwa nenei keta yamayamananama kana kuyadayada kafa viuḡu nenei, Vada Tafutafuna si vimisiniiya.
18 Mosese koḡona yasi kafa misini i didiisiya muniyai yo koḡona i vimisiniina. Eyo dawanabanebaneina keta ketoviyewa i dawana.
19 Muniyai kafa dawanafafana nenei, Vada seḡaseḡanaḡa nenei i teweiya. Eyo kafa dawanafafana yomuyomu kwafinisiyai si fufunisiya nenei, etanei i teweisiya naki maisemoka Yave i visimeiya.
20 Eketa Mosese gabanasima nuwesi beyabeyasi i visiya keta dedeni kana koni sinenei i totoisiya. Eyo dedeni kana koni kafakainei kana nowanowa nenesiyai, kewa i duisiya. Eketa koni kana gudu nenei i vitanaguduya.
21 Muninei dedeni kana koni i kanasuniya Vada Tafutafuna sinenei keta kafa dawanafafana kana nuya i nuvitanuniya eketa dedeni kana koni i tenefotiya, naki maisemoka Yave i visimeiya.
22 Yota sonama i una-kanasuniya Vada Tafutafuna sinenei keta bomatu kuweyaina i teniya, Totomu Tafutafumokena kana kafa dawanafafana kana nuya kwaunei.
23 Eketa manekasima i gidewidewisiya kana bobotai Yave naunei sonama etanei i tenisiya, naki maisemoka Yave i visimeiya.
24 Kimayeta yana kafa misini i kanasuniya keta Totomu Tafutafuna nanakoya kuweyaina i vimisiniiya keta sonama i visaiya.
25 Eyo Yave matanei kimayeta i guwanisiya, naki maisemoka Yave i visimeiya.
26 Eketa kafa guvimamadi kana didiḡa vigonudina, dawanafafana naunei i teniya Totomu Tafutafuna sinenei,
27 eyo iba mamadisi i guwanisiya, naki maisemoka Yave i visimeiya.
28 Eketa dawanafafana i nuvikaneneiya Vada kana kawa nenei.
29 Kafa vikanakooḡa bwanaosena kana didiḡa i teniya Vada kawanei ebe etanei yawane yomuyomu be kausibi ina vibwanaoseiisiya, naki maisemoka Yave i visimeiya.
30 Vada keta didiḡa kasi kawasasai, kaboma nakasina i vimisiniiya eketa ukowa i vininiwiya kafa katumimi.
31 Eketa nokomai Mosese keta Anoni na natunatuna namoḡa nimasi be kaesi kana kafa kikigona.
32 Tovasima yasi kanasuna Vada sinenei o yasi nai kafa vikanakooḡa bwanaosena kana didiḡa nenei, tututausi sina gonisiya, naki maisemoka Yave i visimeiya.
33 Vada keta kafa vikanakooḡa bwanaosena kana didiḡa i sifafifiniya keta nuya ina nukanekaneneiya wasiketa kana kawai. Eketa Mosese bunanige matatafuna i nusafuya.
Yave Yana Mayesina Matakikikwanena
Vada Tafutafuna I Vimaiya
Ginaḡanaḡa 9:15-23
34 Eyo muniyai busibusi Vada Tafutafuna i sowiya keta Yave yana mayesina matakikikwanena i vimaiya.
35 Busibusi i nuvitoiya Vada etanei keta Yave yana mayesina matakikikwanena i vimaiya eketa Mosese muka kana fata be ina kanasuna Vada sinenei.
36 Tova matatafuna tovanama busibusi Vada ina teweiya atu ina kanakasiya, nao fiyao Isineni si misimisiniya keta si niniya tamo menana nenei.
37 Eatu taki busibusi muka ita kakanakasiya, nao yota muka sita ninai kana nivaniva ina kanakasiya.
38 Tova matatafuna Isineni yasi toḡavenudadananama kana kawasasa nenei, kuyadayadai Vada etanei Yave yana busibusi si kitakitiya. Eatu nuwabuna nenei, nao kai atai i nununuḡa busibusi sinenei Isineni namoisi matatafusi si kitakitiya.