8
1-2 Ma Saul kampa da Stephen ana iraḡe i ʼnanai ma i vianinei. Rava patupatutui ḡelaui ana toutoui ma ana tarakwatui i nei ma Stephen taubeuna i naiei ma au kokoaga i terei.
Saul Ekalesia i rau-iviapoapoelei
Nai maranaina rau-iviapoapoe ḡaeḡaena i vikarei ekalesia awarii au Jerusalem, Ma anatapui i viruba-tomana au Judea provins ma Samaria provins. Apasol ava au Jerusalem i mae.
3 Wate Saul i vikarei da ekalesia ai boru ita viamoai. Numa anatapui i ruini ma nelara ma waivine i taina-opunei ma i paritawanei au panipani-numana.
Philip au Samaria
4 Wate tauvitumaḡana Jerusalem i rubaruba-tawanei taon ma dobu anatapuna i naeni ma Riwana Aiaina i raugugulei.
5 Ma Philip i nae au taon tagogi au Samaria ma kampa Bada ana Vinevine Keriso i raugugulei.
6 Maranai patarana, Philip i raraugugula i nonori, ma i ʼnanai kaua babai ma mataira ḡaeḡae i kaukauei taui anatapui orai taputapunei i rautaniḡana.
7 Tauna arua-apoapoei rava maḡamaḡaui au orai i egari da ana garagararai i viopuopuana, ma nanare rava maḡamaḡaui gwaḡagwaḡai ma sigesigei i vilawani.
8 Ma nuaiai ḡaeḡaena i mae nai au taona.
Simon tauna barabaravuna
9 Wenanare, nai au taona oroto tagogi i mae wavana Simon, ma tauna wariaḡa ava ana baravu i kaukauei ma mai Samaria i baibaiei. Ma i voepaepana-melei da tauna rava ḡaeḡaena.
10 Rava labalababa, ma wavai naenaei anatapui ana babani i rarautaniḡana-kauei ma i ririwa, “Tauna, God ana rewapana e ḡoreḡorei, Rewapana Ḡaeḡaena.”
11 Taui i vineneḡanana-kauei aubaina mara nonoa taui Simon ana baravu i baebaei.
12 Wate taui Philip i vitumaḡanei maranai, God ana vigulau Riwana Aiaina ma Iesu Keriso rava awari i raugugulei. Ma lamna aubaina nelara da waivine i nei da i babataito.
13 Simon maiteni i vitumaḡana ma i babataito. Ma Philip mepa i nenae tauna kampa aubaina kaua babai ma mataira vivirewapanai i kaukauei. Tauna wei pulona i bana-kauei.
14 Maranai Apasol au Jerusalem i nonori da mai Samaria, God Riwana i vitumaḡanei, taui Peter ma John i paritawanei awari.
15-16 Ma auSamaria i ḡeta ma taui i raupariei da Arua Vivivireina ita rui au orai. Aubaina taui Iesu wavanei ava i babataito. Ma arua vivivireina eḡa ita rui.
17 Peter ma John urai taui au tepai i terei ma i raupari da Arua Vivivireina au orai i rui.
18 Maranai Simon i ʼnanai da mai Samaria Arua Vivivireina i vaia, maranai Apasol urai au kolai i terei, ma Simon mane i vilololoi,
19 ma i vibaḡa i pa, “Tau maiteni nai rewapanana ma vereu da rava au kolai urau ana terei ma taui Arua Vivivireina ina vaia.”
20 Wate Peter i paribelei i pa, “Anina da God tam am mane maiteni ina tawanem ai au menamenana, aubaina tam e notanotai da God ana pulo manelei ma gimarai!
21 Tam wei nolana au orana am gabu eḡa ita mamae, aubaina oram eḡa ita ai God au matana.
22 Am nota apoapoe ma votere-tawanei. Ma mae-tavirem Bada awarina ma ma vibaḡai da am nota apoapoe ina nota-tawanei.
23 Aubaina a inanaim da unura oram i oai tauai awariai ma wei notai apoapoei e panipanim.”
24 Simon marina Peter ma John i riwei, “Aubaiu Bada awarina ona raupari da aiwai o ririwei eḡa ina tupua awariu!”
25 Ma Peter ma John ai lawana ma Bada Riwana Aiaina ekalesia voui awari i raugugulei. Ma i raugugula nae Mai Samaria ai au taon nununai da i ḡeta au Jerusalem.
Philip ma Ethiopiei
26 Mara tagogi Bada ana anela, Philip i riwei, “Ma vokaukaua ma ma nae au rauanaḡei, etanai au Jerusalem da e ḡaiḡaira au Gaza.” (Wei etanaina lamna au mutulua).
27 Anina ma Philip i vokaukaua ma i nae. Ma wei au etanaina oroto Ethiopiei i ʼnanai. Tauna mai Ethiopia ai kwin Kandake, ana mane taupainina. Wei orotona i nae au Jerusalem God viborumana aubaina,
28 ma i nenae-me ana au dobu. Ma ana au chariot i kiala ma wariaḡa peroveta Isaiah buka i girugirumia i ʼaiavi.
29 Ma Arua Vivivireina Philip i riwei, “Ma nae ma chariot au ririvana ma babara-nae.”
30 Anina ma Philip i ruba chariot au ririvana ma i nonori badana peroveta Isaiah ana buka i ʼaiavi. Ma Philip i paridadana, “Aiwai e iaiavia e araramanei bo eḡa?”
31 Orotona i paribelei, “Menanare ana ʼramananei mepa da rava eḡa ita parivai-araramaniu!” Ma Philip i vibaḡai da i ḡeta da au ririvana i kiala.
32 Buka au orana, wei riwana i ʼaiavi,
Tauna i taravaina-naiei me sipu viraḡenana aubaina
me sipu natuna e genugenuana maranai aparana e boribori,
tauna eḡa aiwai ita latoni.
33 Tauna i vijiboḡi ma i vinimalamalai ma eḡa ita kauana-kauei awarina.
Aiai ana epaepaia ina babaniei.
Aubaina ana mara au dobu i vaitawanei.” (Isaiah 53:7-8)
34 Ma orotona, Philip i paridadanei, “Isaiah e babaniana-melei bo rava ḡelauna e babaniei?”
35 Ma Philip, wei riwana awarina i vikarei ma riwa ḡelaui maiteni ma Iesu Riwana Aiaina i viararamani.
36 Ma i nenae da waira i ʼnanai ma Ethiopiei i riwa, “Ma inana waira noi, aiwai aubaina da eḡa ana babataito?”
37
38 Badana, chariot taurubeina i riwei, “Chariot ma vojijini” Ma tauna ma Philip i ḡaira waira au orana ma Philip, badana i babataitoi.
39 Maranai wairei i ḡeta, Bada Aruana maratagogi Philip i vai-tawanei ma turana eḡa ita inana-melei, ma ana morelanana i nae ana au dobu.
40 Wate Philip au Asotus i raueḡa ma dobuna i naeni ma Riwana Aiaina i raugugulei da au Caesarea taon i ḡeta.