3
Yipm Yimp Wulapm Weink Yupulp Nako Kil Yikiwat Yipmel
Et yipm ampu eipm sankel kile apm'a nikimp yipmel. Yipm yimp Sepmel Antelel ko kil mintenkitneip an, et sopilelel sank ankilel ko sikir etn la wampwamp. Kona nti eipm sank ankilelel, nti kako yep sank keielel ntoka sinsi suknel sop ka kumpueik yipm apulel. Yipm ka ntinkirai, nti omoule koretel ka aimp yapmonemp ntupmuel nak sank wael apulp sank Wulapm Weinkel. Et an aiyimp yipm nako yipm markipninket Jisas ko kil mpuanink an yupulp nti kakorokn yupul an koret. Sepmel Antelel ka omoule akosepmel, et an ko yekei kil nkael apulp kil kako yupul sop sank etet kuntoel eikusukn ka kil nakel, nako kil mintenkitneip yipm yapmonemp, mpuanink yipm yupulp Satan kakorokn yupul yipm milminel. Yapmonemp antelel, an nak na sank salpikninel sukurel an nakimp yipmel, karep yipm apul sopel, epe kileyar aninkaninkel kako yipm yupul sopel. Sepmel Antelel ka ok an yapmonemp irpm keielel. Et an na nimpil nikimp yipm ko yipm yupul soplekekn aninkaninkel. An aiyimp Sepmel Antelel ko kil yekei su lep yipm yapmonemp nako yipm ser yoworel Wulapm Weink ka kil akei ontoniupuknel ankilel nkrawomp yipmel ko yipm ser yoworel minamp mintenkel Kraisel, kil karokn nkarkemp wankepm. Et sopilelel, ko yipm nkis minamp sepmel soplekekn.
Nti Omoule Eikusukn Ko Yekei Onto Antuol Yupul Nioknelmp
An nkamp mpunti Jisas Kraisel ka Sepmel Antelel nako an nikimp yipm sank salpikninel lekekn. Nti mamuntomp aiyipmel ka yuwa likipel apulp niokn antuolel, et yipm ontonisep nti na yer antuol yatel. Nti karokn apul sop sank an ka nakimp yuwap yipmel. An antemp yipm arel, sankminamp antelel ka sop muati kana tikiremp yipm aiyapel nako yipm nekerpmel. An karokn eik likipel, karokn. An ka ntinkiliemp apul niokn wunoump awun, apulp nako an semp wuntokn yuwulmp an yupulp miepm irpm sinsiel. An karokn apulp na yipm ko yorkuos wankepm yuwulmp anel. Mpunti ka sil anel ko an nikimp yipm na yuwulmp anel. Aser upuikn antelel, sankminamp antelel kako tikiremp yuwap yipm sop muatiel, nako yipm yupul soplekeknel. 10 An antemp yipm arel, sank salpikninel lekekn an nakimp yipmel nak na, “Kona emel karokn na yupul nioknel, et kil ko yer nilmpel. Yipm korokn yuwa kil miepm yel.” 11 Aser an eipm sank na nti omoule mpurel aiyipmel ka ar kuserel, nti karokn apul niokn. Sankminamp antuol ka nti ar nkisel, nti karokn onto wat o pmin, nti ka nkis eik wakerp yipmel. 12 Sepmel Antelel Jisas Krais, ka ok an salpiknin ankilel, et an nakimp nti kuorelel mintenkel nak na, “Yipm nkis yitonk ntemp yo kitapm, ko yipm yupul nioknelmp irpm aiyipmel, nako niumuapm yuwa yipmel!” 13 Mamuntoump antelel nti, yipm korokn sirkemp sankminamp sepmel, et yipm korokn likip yupulp. 14 Kona emel korokn yupul sop sank kipe an apul sil wupm kipelelel, et yipm ko niuknuyuwap kil aipopelel. Yipm korokn yentempil yer nkis, et kil ko semp wulemaiak yupulp minamp koretel ankilel. 15 An karokn nak nako yipm nker kil nuarep omoule ka antemp yipm nkisemp wurokn yankerel. Karokn. Ko yipm yekei yapmonemp niuluknunel yoworkwonempil, sankantempil. Kil ka mamuntomp aiyipmel.
Pol Nakimp Nti Sank Uknuael
16 An aiyimp Sepmel Antelel ko kil yentemp yipm eikusukn yer, yok yipm yapmonemp eperiepm. Et ko sopilelel, kipminkiriekn aiyipmel kako yer niuluknun waiepm. Kil ka weink yapmonemp niuluknunel eikusuknel. 17 Apm Pol, apm sankar yipm, awun sepm. Apm ankil akei onto apmelel apul sank akopiteknel apmelel keiye. Wupm eikusukn apmelel ko yipm serel, yitomparai sopilelel ka silel ka yitomparai apmelel. 18 Sepmel Antelel Jisas Krais kako wonempyupulp yipm ntitmuaken eikusukn na yupul yipm sepm. Kakilpe. Sank apmelel ka kipe, ka miniat.