8
Yesu ndi Mteta witu Mkulu
1 Hinu, lijambu likulu pa genaga leajovili ndi lenili, tete tivii na Mteta Mkulu wa Chapanga ngati uyu, mweitama na pandu pa utopesa pa chiwoko cha kulyelela wa chigoda ya cha Chapanga cha kulongosa ukulu kunani kwa Chapanga.
2 Mwene ihenga lihengu ngati Mteta Mkulu pandu Pamsopi neju, palindanda la chakaka la Chapanga, lelijengiwi na Bambu lepi na mundu.
3 Kila Mteta Mkulu ahaguliwi kumuwusila Chapanga luteta lwa hinyama ya kuhinjwa na luteta lungi, ndi mewa Mteta mkulu witu yiganikiwa avyai na chindu cha kumuwusila Chapanga.
4 Ngati kuvya avi apa pamulima, ngaavili lepi Mteta, muni vamali kuvya vamteta veviwusa luteta ngati cheavalagazili mu Malagizu ga Musa.
5 Lihengu lavi la uteta ndi luhumu ndu na chiwili cha gala gegavi kunani kwa Chapanga. Muni Musa peavi papipi kujenga lindanda lila, Chapanga amjovili, “Lola ujengayi ngati luhumu lula lwenakulangisi kuchitumbi cha Sinai.”
6 Nambu hinu Yesu apewili lihengu la uteta lelivili likulu kuliku lavi, ndava muni lilaganu leavikili pagati ya Chapanga na vandu lavili labwina neju, ndava muni liyima panani ya lilagizu la mambu gegavi gabwina neju.
7 Muni ngati lilaganu lila la kutumbula langabuda, langaganikiwi lilaganu la pili.
8 Nambu Chapanga alolili kubuda kwa vandu ndi akajova,
“Magono gibwela, Bambu ijova,
yati nikita lilaganu la mupya, na vandu va Isilaeli na vandu va Yuda.
9 Lilaganu lenili yati liwanangana lepi ngati lila lenakitili na vagogo vavi,
mu ligono panavatolili kwa chiwoko changu kuhuma pamulima wa Misili.
Muni vayidakili lepi lilaganu langu lenakiti nawu,
ndava yeniyo nene navabelili, Bambu ijova.
10 Hinu lenili ndi lilaganu yati lenikita na vandu va Isilaeli,
magono gegibwela,
Yati nivika Malagizu gangu muluhala lwavi,
na kuzivika mu mitima yavi.
Nene yati nivya Chapanga wavi,
navene yati vivya vandu vangu.
11 Kawaka mundu mweakumuwula muyaki,
amala kumjovela mlongo waki,
‘Mmanya Bambu.’
Muni voha vadebe na vavaha,
yati vakunimanya.
12 Yati nikuvalekekesa kumbudila Chapanga wavi,
yati nizihololela lepi kavili mabudili gavi.”
13 Chapanga peakulikemela lilaganu lenili lamupya, lila la kadeni lilalili, na chindu chochoha chechivya chigogolo na chechilalili chivii papipi na kuyaga.