13
Pablo iskafakĩ ato yoini: “Anã afaa chakafayamakãfe,” ixõ ato yoini
1 Mẽ mato õikĩ rafe faa. Iskaratĩari anã ẽ mato õikaikai. Ẽ anã mato õikaikai mã mãto chaka mã xateamãkĩ. Akka kirika ano Epa Niospa meka kenenifo iskafakĩ: “Fẽtsa afara chakafaito õixõ yõfaito, ‘Nato afara chakafaa,’ ixõ rafeta yoiaifono, askayamakĩ trespa yoiaino askayamakĩ ranãfai yoiaifono chanĩmara nõ fatiro,” ixõ kirika ano Niospa meka kenenifo. Nãskafakĩri ẽ mato ano nokoxõ ẽ nikai mã afara chakafaito mã afara chaka xateyamaito. Akka ẽ mato õitiro mã chaka ikamãki, askayamai shara mã ikamãki.
2 Akka anã ẽ mato ano kayoxõ mẽ mato yoiyoni mã afara chakafanõma. “Mã afara chakafakĩ xateyamaino ẽ mato omiskõimaxii,” ixõ ẽ mato yoiyoni. Anã iskaratĩari chai ixõ ẽ mato yoi kirika kenexõ iskafakĩ: “Ẽ anã kaxõ ẽ mato õikai mã mã chaka xateamãki. Akka mã chaka xateyamaito ẽ mato omiskõimaxii. Akka tsoa pishtakai ẽ finõmaxima.”
3 Akka mã tãpipai Cristo eõxõ mato yoiaino. Chanĩma, mã samama tãpinõ xafakĩakõi ẽ mato õimani. Akka ẽakai ẽ mato yoima, Cristoõxõ ẽ mato yoi. Jesucristo mitsisipakõikai mato tãpimani mãto chaka mã xatenõ.
4 Chanĩma, Jesucristo nokoõxõ ifi cruz ikakĩ mastaifono nã feronãfake pachikõi keskara ini. Nokoõnoax nai ãakai ifimenima. Nãskafinixakĩ iskaratĩa Niospa sharaõnoax nia. Nãskarifiai nõri mitsisipama. Nãskafixõ Jesús feta nã Niospa apaiyai keskara nõ atiro Epa Niospa sharaõxõ.
5 Akka mãto shinã mẽraxõ shinãsharakãfe chanĩmamãkĩ mã mã Jesús Ifofasharamãkĩ. Mãa tãpimesharakãfe. Akka, ¿mã mã tãpiamẽ Jesucristo mato fe ikano? Askayamai mã mã chanĩmis rakikĩa nõ Jesús Ifofaira ifiaxõ mã Ifofaama.
6 Akka mã mã ea õikĩ tãpia ẽ Jesucristoõxõ yonosharakõimiskẽ mato mẽraxõ. Nã mã chanĩmara fakõipainõ.
7 Ẽ mato Epa Nios kĩfixomis mã afaa chakafanõma. Nokoõnoa shinãnõfo ixokai ẽ Epa Nios kĩfimisma. Iskafakĩ fetsafãfe nokoõnoa shinãkani rakikĩa: “Pablo fe rafeafãfe ato yonoxosharafoma,” ixõ nokoõnoa yoikani rakikĩa. Akka noko askafafiaifono mã Jesús Ifosharakõifai nãskara nõ fichipai.
8 Akka Niospa meka shara fistiõnoa nõ yoitiro. Aõnoakai meka chaka nõ yoitiroma ãfe mekamãi sharakõikẽ.
9 Akka fetsafãfe nõ afama noko askafakĩ shinãfiaifono nõ shinãchakaima. Akka mã Jesúsnoax isharakõikẽ nõ fãsi inimakõitiro. Akka nõ mato Epa Nios kĩfixona mã a keskara sharakõi inõ.
10 Akka ẽ mato kirika kenexona mato ari kayoxoma mã ea nikanõ. Mẽ mato ari nokoxõ õia mã Cristo Ifo sharakõifaino ẽ mato õitoshinõ. Nãskakẽ mã isharakõiaino Niosxõ fãsi mekakai ẽ mato yoima mã isharakõinõ. Epa Niospa ea yoia ẽ mato yoisharanõ mã Nios Ifo sharakõifanõ isharakõixõ.
Mã Pablo ãfe meka xatekĩ ato yoisharani
11 Mẽ mekai xatekĩ ẽ mato yoisharai. Jesús keskara isharakãfe. Ea nikasharakãfe. Nãnori fisti shinãkãfe. Isharakãfe. Mã askaino Niospa mato noikõikĩ mato inimamasharai ãfe Yõshi Sharaõxõ mato fe ixõ.
12 Keyokõi nã mã Nios Ifofaa tii yoinõnãsharakãfe.
13 Keyokõi nõko Ifo Jesús chanĩmara faafãfe nã efe ikafãfe mato yoisharapaikani.
14 Nõko Ifo Jesucristo mato axosharapai. Epa Niospari mato noikõi. Niospa Yõshi Shara mato fe rafepakexanõ. Nã tii.
Ẽkĩa Pablo